ಗಂಗಾವತಿ/ಹುಬ್ಬಳ್ಳಿ : ನಟ ಪುನೀತ್ ರಾಜಕುಮಾರ್ ಅವರು ಇಷ್ಟಪಡುತ್ತಿದ್ದ ಕೋಳಿ ಮತ್ತು ಕುರಿಯ ಬಾಡೂಟದ ರುಚಿಯನ್ನು ಅವರ ಕೆಲ ಅಭಿಮಾನಿಗಳು ಸೇರಿ ಸಾವಿರಾರು ಫ್ಯಾನ್ಸ್ಗೆ ಉಣಬಡಿಸಿ ಪುನೀತ್ ಅವರನ್ನು ಸ್ಮರಿಸಿದ ಘಟನೆ ನಗರದಲ್ಲಿ ನಡೆದಿದೆ.
ನಗರದ ಶಿವೆ ಚಿತ್ರಮಂದಿರದಲ್ಲಿ ಸುಮಾರು ಮೂರು ಲಕ್ಷ ರೂ. ವೆಚ್ಚದಲ್ಲಿ ಒಂದು ಸಾವಿರಕ್ಕೂ ಅಧಿಕ ಜನರಿಗೆ ಅಚ್ಚುಕಟ್ಟಾದ ಬಾಡೂಟದ ವ್ಯವಸ್ಥೆ ಮಾಡಿ ಅಭಿಮಾನಿಗಳಿಗೆ ಉಣಬಡಿಸಲಾಗಿದೆ.
ಪುನೀತ್ ಅವರ ಜನ್ಮದಿನ ಮತ್ತು ಜೇಮ್ಸ್ ಸಿನಿಮಾ ರಿಲೀಸ್ ಇದ್ದ ಕಾರಣ ಮಾರ್ಚ್ 17ರಂದು ಬಾಡೂಟದ ಕಾರ್ಯಕ್ರಮವನ್ನು ಮುಂದೂಡಲಾಗಿತ್ತು. ಶನಿವಾರ ಹೋಳಿ ಹಬ್ಬದ ಕಾರಣಕ್ಕೆ ಅಭಿಮಾನಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಊಟಕ್ಕೆ ಬರುವುದಿಲ್ಲ ಎಂದು ಭಾವಿಸಿದ್ದ ಆಯೋಜಕರು, ಭಾನುವಾರ ಭರ್ಜರಿಯಾಗಿ ಬಾಡೂಟ ಹಾಕಿಸಿ ಪುನೀತ್ ಅವರನ್ನು ವಿಭಿನ್ನವಾಗಿ ಸ್ಮರಿಸಿದ್ದಾರೆ.
ಪುನೀತ್ ರಾಜಕುಮಾರ್ ಗೆ ಇಷ್ಟವಾದ ಸಾವಜಿ ಮಟನ್ ಊಟ ವಿತರಿಸಿ ವಿಭಿನ್ನವಾಗಿ ಅಪ್ಪು ಸ್ಮರಿಸಿದ ಅಭಿಮಾನಿಗಳು:
ಹುಬ್ಬಳ್ಳಿ : ದಿ. ಪುನೀತ್ ರಾಜಕುಮಾರ ಅವರಿಗೂ ಹುಬ್ಬಳ್ಳಿಗೂ ಅವಿನಾಭಾವ ಸಂಬಂಧ. ಪುನೀತ್ ರಾಜಕುಮಾರ್ ಹುಬ್ಬಳ್ಳಿಗೆ ಭೇಟಿ ನೀಡಿದರೆ ಸಾವಜಿ ಮಟನ್ ಊಟ ಸವಿಯದೆ ತೆರಳುತ್ತಿರಲಿಲ್ಲ.
ಈ ಸಲುವಾಗಿ ಜೈ ರಾಜವಂಶ ಅಭಿಮಾನಿಗಳ ಸಂಘದ ರಘು ಬದ್ದಿಯವರ ನೇತೃತ್ವದಲ್ಲಿ ಅಪ್ಪು ಅಭಿಮಾನಿಗಳಿಗೆ ಸಾವಜಿ ಮಟನ್ ಊಟವನ್ನು ವಿತರಿಸುವ ಮೂಲಕ ದಿ. ಪುನೀತ್ ರಾಜಕುಮಾರ ಅವರನ್ನು ಸ್ಮರಿಸಿದರು.
ನಗರದ ಅಪ್ಸರಾ ಚಿತ್ರಮಂದಿರ ಬಳಿ ಸಾವಜಿ ಮಟನ್ ಊಟವನ್ನು ವಿತರಿಸುವ ಮೂಲಕ ದಿ. ಪುನೀತ್ ರಾಜಕುಮಾರ್ ಅವರ ಹೆಸರು ಯಾವಾಗಲೂ ಅಜರಾಮರವಾಗಿರಲಿ ಎಂದು ಇದೇ ವೇಳೆ ಹೇಳಿದ್ದಾರೆ. ಪುನೀತ್ ರಾಜಕುಮಾರ ಅವರ ಹುಟ್ಟುಹಬ್ಬ ಹಾಗೂ ಜೇಮ್ಸ್ ಚಲನಚಿತ್ರ ನೂರು ದಿನ ಪೂರೈಸಲಿ ಇದೇ ವೇಳೆ ಅಭಿಮಾನಿಗಳು ಹಾರೈಸಿದ್ದಾರೆ.
ಓದಿ : ಹೋಳಿ ಹಬ್ಬದ ವೇಳೆ ಕಲಬುರಗಿ ಎಸ್ಪಿ ಇಶಾ ಪಂತ್ ಭರ್ಜರಿ ಡ್ಯಾನ್ಸ್- ವಿಡಿಯೋ
