ತೆರಿಗೆ ಸಂಗ್ರಹದಲ್ಲಿ ಹು-ಧಾ ಪಾಲಿಕೆಗೆ ಹಿನ್ನಡೆ: ಸಾರ್ವಜನಿಕ ವಲಯದ ದೊಡ್ಡ ಮೊತ್ತ ಬಾಕಿ

ಹುಬ್ಬಳ್ಳಿ-ಧಾರವಾಡ ಮಹಾನಗರ ಪಾಲಿಕೆಗೆ ಸಾರ್ವಜನಿಕರು, ಉದ್ಯಮ ಘಟಕಗಳು ಹಾಗು ಸರ್ಕಾರದ ಕಚೇರಿಗಳು ಸುಮಾರು 60 ಕೋಟಿ ರೂಪಾಯಿ ತೆರಿಗೆ ಬಾಕಿ ಉಳಿಸಿಕೊಂಡಿವೆ.

ಹುಬ್ಬಳ್ಳಿ: ಹುಬ್ಬಳ್ಳಿ-ಧಾರವಾಡ ಮಹಾನಗರ ಪಾಲಿಕೆ ಕೋವಿಡ್ ಸಂದರ್ಭದಲ್ಲಿಯೂ ಕೂಡ ದಾಖಲೆಯ ತೆರಿಗೆ ಸಂಗ್ರಹಿಸಿ ಸುದ್ದಿಯಲ್ಲಿತ್ತು. ಆದರೆ ಈಗ ಸಾರ್ವಜನಿಕರು, ಉದ್ಯಮ ಘಟಕಗಳು ಹಾಗೂ ಸರ್ಕಾರಗಳ ಕಚೇರಿಗಳು ಸರಿಯಾದ ರೀತಿಯಲ್ಲಿ ತೆರಿಗೆ ಕಟ್ಟದೆ ಬಾಕಿ ಉಳಿಸಿಕೊಂಡಿದ್ದು ಪಾಲಿಕೆ ಆರ್ಥಿಕ ಸಂಕಷ್ಟ ಎದುರಿಸುತ್ತಿದೆ.

ಪಾಲಿಕೆಗೆ ಬರಬೇಕಿದ್ದ 100 ಕೋಟಿ ರೂ ತೆರಿಗೆ ಹಣದಲ್ಲಿ ಈವರೆಗೆ ಶೇ 40ರಷ್ಟು ಮಾತ್ರ ಸಂಗ್ರಹವಾಗಿದೆ. 60 ಕೋಟಿಗೂ ಅಧಿಕ ತೆರಿಗೆ ಹಣ ಇನ್ನಷ್ಟೇ ಸಂಗ್ರಹವಾಗಬೇಕು. ಸರ್ಕಾರದ ಹಂತದಲ್ಲಿಯೂ ಕೂಡ ಬಾಕಿ ಉಳಿಸಿಕೊಳ್ಳಲಾಗಿದೆ. ಹೀಗಾಗಿ, ಅಭಿವೃದ್ಧಿ ಕಾರ್ಯಗಳಿಗೆ ಹಣದ ಕೊರತೆಯಾಗುತ್ತಿದೆ. ಈ ಸಂಗತಿಯನ್ನು ಈಗಾಗಲೇ ಸರ್ಕಾರದ ಗಮನಕ್ಕೆ ತಂದು ಪತ್ರ ಕೂಡ ಬರೆದಿದ್ದೇವೆ ಅಂತಾರೆ ಪಾಲಿಕೆ ಮೇಯರ್.

ಎರಡು ವಾಣಿಜ್ಯ ಉದ್ಯಮಗಳು ಸುಮಾರು ವರ್ಷಗಳಿಂದ ಬಹುದೊಡ್ಡ ಮೊತ್ತದ ತೆರಿಗೆ ಹಣವನ್ನು ಪಾವತಿಸದೇ ಬಾಕಿ‌ ಉಳಿಸಿಕೊಂಡಿವೆ. ಸಾರ್ವಜನಿಕ ವಲಯದಲ್ಲಿ ಆರ್ಥಿಕ ಚಟುವಟಿಕೆಗಳು ನಡೆಯುತ್ತಿದ್ದರೂ ಕೂಡ ಪಾಲಿಕೆಗೆ ಸಮರ್ಪಕವಾಗಿ ತೆರಿಗೆ ಮಾತ್ರ ಸಂದಾಯವಾಗುತ್ತಿಲ್ಲ. ಈ ಕುರಿತು ಕಟ್ಟುನಿಟ್ಟಿನ ಕ್ರಮಗಳನ್ನು ಜರುಗಿಸಿ ನಿರ್ದಾಕ್ಷಿಣ್ಯವಾಗಿ ತೆರಿಗೆ ವಸೂಲಿಗೆ ಕ್ರಮ ಜರುಗಿಸುವುದಾಗಿ ಮೇಯರ್ ಭರವಸೆ ನೀಡಿದ್ದಾರೆ.

ಇದನ್ನೂ ಓದಿ: 'ಬಿಜೆಪಿ ಸರ್ಕಾರದ ಬೊಕ್ಕಸದಲ್ಲಿ ಹಣವಿದೆ, ಬೊಮ್ಮಾಯಿ ಸರ್ಕಾರ ಹೆಚ್ಚು ತೆರಿಗೆ ಸಂಗ್ರಹಿಸಿದೆ'