ರೇವಣ್ಣರಿಗೆ ಅಂಚೆ ಮೂಲಕ ಮೇಣದ ಬತ್ತಿ ಕಳುಹಿಸಿದ ಬಿಜೆಪಿ ಕಾರ್ಯಕರ್ತರು

ಹೊಳೆನರಸೀಪುರದ ರೇವಣ್ಣ ಅವರ ನಿವಾಸಕ್ಕೆ ಬಿಜೆಪಿಯ ದಕ್ಷಿಣ ಯುವ ಮೋರ್ಚಾದಿಂದ ಮೇಣದ ಬತ್ತಿಗಳನ್ನು ನಗರದ ಅಂಚೆ ಮೂಲಕ ಕಳುಹಿಸಿಕೊಟ್ಟರು.

ದಾವಣಗೆರೆ: ಕೊರೊನಾ ವೈರಸ್​​ನಿಂದ ಭಾರತ ಅಂಧಕಾರಕ್ಕೆ ಸಿಲುಕಿದೆ. ಏಪ್ರಿಲ್​ 5ರಂದು 9 ಗಂಟೆಗೆ 9 ನಿಮಿಷಗಳ ಕಾಲ ದೀಪ, ಟಾರ್ಚ್​​, ಮೇಣದ ಬತ್ತಿ ಹಚ್ಚುವ ಮೂಲಕ ಅಂಧಕಾರವನ್ನು ಓಡಿಸೋಣ ಎಂದು ಪ್ರಧಾನಿ ಮೋದಿ ಕರೆ ಕೊಟ್ಟಿದ್ದಾರೆ.

ದೀಪ ಪ್ರಜ್ವಲನ ಕುರಿತು ಟೀಕಿಸಿದ್ದ ಶಾಸಕ ಹೆಚ್.ಡಿ.ರೇವಣ್ಣ ಅವರಿಗೆ ಬಿಜೆಪಿ ಯುವ ಮೋರ್ಚಾ ಕಾರ್ಯಕರ್ತರು ಮೇಣದ ಬತ್ತಿಗಳನ್ನು ಅಂಚೆ ಮೂಲಕ ಕಳುಹಿಸಿಕೊಟ್ಟು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಮೇಣದ ಬತ್ತಿಗಳನ್ನು ಏಪ್ರಿಲ್​ 5ರಂದು 9 ಗಂಟೆಗೆ ಹಚ್ಚಿ. ಹೊರ ಹೋಗುವ ಪ್ರಮೇಯವೇ ಬರುವುದಿಲ್ಲ ಎಂದು ರೇವಣ್ಣ ಅವರ ಟೀಕೆಗೆ ಬಿಜೆಪಿ ಕಾರ್ಯಕರ್ತರು ಪ್ರತ್ಯತ್ತರ ನೀಡಿದ್ದಾರೆ.

ಕೊರೊನಾ ಭೀತಿ ಹಿನ್ನೆಲೆಯಲ್ಲಿ ದೇಶವ್ಯಾಪಿ ಲಾಕ್​​​ಡೌನ್ ಜಾರಿಗೆ ತರಲಾಗಿದೆ. ಮೇಣದ ಬತ್ತಿ ತರಲು ಹೊರಗೆ ಹೋದರೆ ಪೊಲೀಸರು ಲಾಠಿ ಚಾರ್ಜ್ ಮಾಡುತ್ತಾರೆ ಎಂದು ಹೆಚ್.‌ಡಿ.ರೇವಣ್ಣ ಟೀಕಿಸಿದ್ದರು.