ಬೆಂಗಳೂರು: ನಾಳೆ ಬಹುನಿರೀಕ್ಷಿತ ಉಪಸಮರದ ಮತ ಎಣಿಕೆ ಕಾರ್ಯ ನಡೆಯಲಿದೆ. ಪ್ರತಿಷ್ಠಿತ ಕಣ ಯಶವಂತಪುರ ಕ್ಷೇತ್ರದ ಉಪಕದನದಲ್ಲಿ ಮತದಾರ ಪ್ರಭು ಯಾರಿಗೆ ಮಣೆ ಹಾಕಿದ್ದಾನೆ ಎಂಬುದು ನಾಳೆ ಗೊತ್ತಾಗಲಿದೆ. ಇತ್ತ ಮತ ಎಣಿಕೆಗೆ ಕ್ಷಣಗಣನೆ ಪ್ರಾರಂಭವಾಗುತ್ತಿದ್ದ ಹಾಗೆ ಅತ್ತ ಕಣದಲ್ಲಿನ ಅಭ್ಯರ್ಥಿಗಳ ಹೃದಯ ಬಡಿತವೂ ಹೆಚ್ಚಾಗಿದೆ.
ನಾಳೆ ಯಶವಂತಪುರ ರಣಕಣದ ಕಲಿ ಯಾರು? ಎಂಬ ಕುತೂಹಲಕ್ಕೆ ತೆರೆ ಬೀಳಲಿದೆ. ಕ್ಷೇತ್ರದಲ್ಲಿ ಒಟ್ಟು 12 ಅಭ್ಯರ್ಥಿಗಳು ಸ್ಪರ್ಧೆಗಿಳಿದಿದ್ದರೆ, ಬಿಜೆಪಿ ಅಭ್ಯರ್ಥಿ ಎಸ್. ಟಿ. ಸೋಮಶೇಖರ್, ಜೆಡಿಎಸ್ ಅಭ್ಯರ್ಥಿ ಜವರಾಯಿಗೌಡ ಹಾಗೂ ಕಾಂಗ್ರೆಸ್ ನ ಪಿ. ನಾಗರಾಜ್ ಪ್ರಮುಖರಾಗಿದ್ದಾರೆ. ಆದರೆ, ಜಿದ್ದಾಜಿದ್ದು ಇರುವುದು ಬಿಜೆಪಿಯ ಎಸ್.ಟಿ.ಸೋಮಶೇಖರ್ ಹಾಗು ಜೆಡಿಎಸ್ ನ ಜವರಾಯಿಗೌಡರ ಮಧ್ಯೆ.
ಇಬ್ಬರು ಅಭ್ಯರ್ಥಿಗಳೂ ಬಿರುಸಿನ ಪ್ರಚಾರ ನಡೆಸಿ, ಶತಾಯಗತಾಯ ಗೆಲುವಿಗೆ ಭಾರಿ ಕಸರತ್ತು ನಡೆಸಿದ್ದರು. ತಮ್ಮ ಪಕ್ಷಗಳ ಘಟಾನುಘಟಿ ನಾಯಕರಿಂದ ಮತಬೇಟೆ ಮಾಡಿರುವ ಅಭ್ಯರ್ಥಿಗಳು, ಗೆಲುವಿಗೆ ಬೇಕಾದ ರಣತಂತ್ರಗಳನ್ನೂ ಅನುಸರಿಸಿದ್ದರು. ಅನರ್ಹತೆ ಹಣೆಪಟ್ಟಿ ಕಳಚಿ, ರಾಜಕೀಯ ಭವಿಷ್ಯ ನಿರ್ಧರಿಸಲು ಎಸ್. ಟಿ. ಸೋಮಶೇಖರ್ ಗೆ ಗೆಲುವು ಅನಿವಾರ್ಯವಾಗಿದೆ.
ಇತ್ತ ಜೆಡಿಎಸ್ ಅಭ್ಯರ್ಥಿ ಜವರಾಯಿಗೌಡರಿಗೂ ಇದು ಕೊನೆಯ ಕದನವಾಗಿದೆ. ಎರಡು ಬಾರಿ ಸೋತು ಇದೀಗ ಕೊನೆಯ ಬಾರಿ ತಮ್ಮ ಅದೃಷ್ಟ ಪರೀಕ್ಷೆಗಿಳಿದಿದ್ದಾರೆ. ಅನುಕಂಪ, ಎದುರಾಳಿಯ ಅನರ್ಹತೆಯನ್ನೇ ಮುಂದಿಟ್ಟಕೊಂಡು ಜನರ ಬಳಿ ಹೋಗಿರುವ ಜವರಾಯಿಗೌಡರಿಗೂ ಇದು ಮಾಡು ಇಲ್ಲವೇ ಮಡಿ ಸ್ಪರ್ಧೆ.
ಸುಮಾರು 4,80,953 ಮತದಾರ ಹೊಂದಿರುವ ಕ್ಷೇತ್ರದಲ್ಲಿ ಒಟ್ಟು 2,84,027 ಮತಗಳು ಚಲಾವಣೆಗೊಂಡಿದ್ದು 59% ಮತದಾನ ಆಗಿದೆ. ನಾಳೆ ಆರ್. ವಿ. ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಮತ ಎಣಿಕೆ ನಡೆಯಲಿದೆ. 22 ಸುತ್ತುಗಳಲ್ಲಿ ಮತ ಎಣಿಕೆ ಕಾರ್ಯ ನಡೆಯಲಿದ್ದು, ಈ ನಿಟ್ಟಿನಲ್ಲಿ ಸಕಲ ಸಿದ್ಧತೆಗಳನ್ನು ಕೈಗೊಳ್ಳಲಾಗಿದೆ.
ಒಟ್ಟಿನಲ್ಲಿ ಬಹಳ ಜಿದ್ದಾಜಿದ್ದಿನಿಂದ ಕೂಡಿರುವ ಯಶವಂತಪುರ ಕ್ಷೇತ್ರದಲ್ಲಿ ಮತದಾರ ಪ್ರಭು ಯಾರಿಗೆ ವಿಜಯಮಾಲೆ ಹಾಕುತ್ತಾನೆ ಎಂಬುದು ನಾಳೆ ನಿರ್ಧಾರವಾಗಲಿದೆ. ಹ್ಯಾಟ್ರಿಕ್ ಬಾರಿಸಿ ಎಸ್.ಟಿ.ಸೋಮಶೇಖರ್ ತಮ್ಮ ಅನರ್ಹತೆಯ ಹಣೆಪಟ್ಟಿ ಕಳಚುತ್ತಾರೋ ಅಥವಾ ಜೆಡಿಎಸ್ ನ ಜವರಾಯಿ ಗೌಡ ಚೊಚ್ಚಲ ಜಯಭೇರಿ ಭಾರಿಸಿ, ಗೆಲುವಿನ ನಗೆ ಬೀರುತ್ತಾರೋ ಎಂಬುದು ಎಲ್ಲರ ಕುತೂಹಲ.
