ಆನೇಕಲ್: ರಾಜ್ಯ ರಾಜಧಾನಿಗೆ ಕಾವೇರಿ ನದಿಯೇ ನೀರಿನ ಮೂಲವಾದರೂ ಜಿಲ್ಲೆಯ ಕೆಲ ಭಾಗಗಳಿಗೆ ಕುಡಿಯುವ ನೀರಿನ ಕೊರತೆ ಮತ್ತು ನೀರಿನ ಘಟಕಗಳು ಹಾಳಾಗಿ ಸಮಸ್ಯೆ ತಲೆದೋರಿದೆ. ಬೆಂಗಳೂರು- ಬನ್ನೇರುಘಟ್ಟ ಮುಖ್ಯರಸ್ತೆಯ ಬಸವನಪುರದ ವಾರ್ಡ್ ಸಂಖ್ಯೆ 192ರಲ್ಲಿ ಕಳೆದ 6 ತಿಂಗಳಿನಿಂದ ಸಮರ್ಪಕ ನೀರಿನ ಸರಬರಾಜು ಇಲ್ಲದೇ ಜನರು ಪರದಾಡುವಂತಾಗಿದೆ.
ಇದರಿಂದ ರೋಸಿ ಹೋದ ಜನರು ಇಂದು ಖಾಲಿ ಕೊಡಗಳ ಸಮೇತ ರಸ್ತೆಗೆ ಇಳಿದು ಪ್ರತಿಭಟನೆ ನಡೆಸಿದರು. ಚುನಾವಣೆ ವೇಳೆ ವೋಟು ಕೇಳಲು ಬಂದ ಶಾಸಕರು ಈವರೆಗೂ ಈ ಕಡೆ ಬಂದಿಲ್ಲ. ಇದರಿಂದ ವಾರ್ಡ್ನಲ್ಲಿ ಸಮಸ್ಯೆಗಳು ಇನ್ನಷ್ಟು ಬಿಗಡಾಯಿಸಿವೆ. ಶೀಘ್ರವೇ ಜನಪ್ರತಿನಿಧಿಗಳು ಕ್ರಮ ಕೈಗೊಂಡು ವಾರ್ಡ್ಗೆ ನೀರು ಹರಿಸಬೇಕು ಎಂದು ಒತ್ತಾಯಿಸಿದರು.
ಬಿಬಿಎಂಪಿ ಎಇಇ ಮೊಬೈಲ್ ಕರೆ ಸ್ವೀಕರಿಸುತ್ತಿಲ್ಲ. ಇರುವ ಬೋರ್ವೆಲ್ ಕೆಟ್ಟು ವರ್ಷಗಳಾಗಿವೆ. ಅದನ್ನು ಸರಿಪಡಿಸದೇ ರಸ್ತೆಗೆ ಹಾಗೆಯೇ ಬಿಸಾಡಲಾಗಿದೆ. ಬಸವನಪುರದ ವಾರ್ಡ್ನ ಮುಖ್ಯ ರಸ್ತೆಯೂ ಹಾಳಾಗಿದೆ. ಚರಂಡಿಗಳು ಸಮರ್ಪಕವಾಗಿಲ್ಲ. ಬೀದಿ ದೀಪಗಳು ನಿರ್ವಹಣೆಯಿಲ್ಲದೇ ಹಾಳಾಗಿವೆ. ಶಾಸಕರನ್ನು ಚುನಾವಣೆ ಸಂದರ್ಭದಲ್ಲಿ ಮತ ಕೇಳಲು ಬಂದಾಗ ಕಂಡಿರುವುದು ಬಿಟ್ಟರೆ, ಈವರೆಗೆ ಅವರ ಸುಳಿವಿಲ್ಲ ಎಂದು ನಿವಾಸಿಗಳು ದೂರಿದರು.
ಚುನಾವಣೆ ಮುನ್ನ ದಿನಕ್ಕೆ ನಾಲ್ಕು ಬಾರಿ ಕುಡಿಯುವ ವಾರ್ಡ್ಗೆ ಬಿಡಿಸುತ್ತಿದ್ದ ಶಾಸಕರು ಇದೀಗ ಕಣ್ಮರೆಯಾಗಿದ್ದಾರೆ. ಇದ್ದ 7 ಕೊಳವೆ ಬಾವಿಗಳಲ್ಲಿ 5 ನೀರಿಲ್ಲದೆ ಬತ್ತಿ ಹೋಗಿವೆ. ಉಳಿದ ಎರೆಡರಲ್ಲಿ 1 ದುರಸ್ತಿ ವೇಳೆ ಕೇಬಲ್ ತುಂಡರಿಸಿ ಮೋಟರ್ ಕೊಳವೆ ಬಾವಿಯೊಳಕ್ಕೆ ಬಿದ್ದಿದೆ. ಉಳಿದ ಒಂದು ಕೊಳವೆಬಾವಿ ದುರಸ್ತಿಯಲ್ಲಿದೆ. ಇದರಿಂದಾಗಿ 15 ದಿನಕ್ಕೊಮ್ಮೆ ಟ್ಯಾಂಕರ್ ಮೂಲಕ ನೀರು ಸರಬರಾಜು ಮಾಡಲಾಗುತ್ತಿದೆ.
ಸಮಸ್ಯೆಯ ಬಗ್ಗೆ ಬಿಬಿಎಂಪಿ ಎಇಇ ಅವರನ್ನು ಸಂಪರ್ಕಿಸಿದರೆ ಅವರು, ತಾತ್ಸಾರವಾಗಿ ಕಾಣುತ್ತಾರೆ ಎಂದು ದೂರಿದ ಪ್ರತಿಭಟನಾಕಾರರು, ಕೊಳವೆಬಾವಿಗಳನ್ನು ದುರಸ್ತಿ ಮಾಡಿ, ಅದಕ್ಕೂ ಮೊದಲು ಸಮರ್ಪಕ ನೀರು ಪೂರೈಸಿ ಎಂದು ಜನರು ಆಗ್ರಹಿಸಿದರು.
ಇದನ್ನೂ ಓದಿ: ಬಿಜೆಪಿಯವರಿಗೆ ಅಧಿಕಾರದ ಮದ, ದೇಶದಲ್ಲಿ ಅಘೋಷಿತ ತುರ್ತು ಪರಿಸ್ಥಿತಿ: ಸಿದ್ದರಾಮಯ್ಯ
