ಬೆಂಗಳೂರು: ಒಂದೂವರೆ ದಶಕದಷ್ಟು ಹಳೆಯದಾದ ಹೊರ ವರ್ತುಲ ರಸ್ತೆ (ಪೆರಿಫರಲ್ ರಿಂಗ್ ರೋಡ್) ನಿರ್ಮಾಣಕ್ಕೆ ರಾಜ್ಯ ಸಂಪುಟ ಸಭೆ ಅಸ್ತು ಎಂದಿದೆ.
ಬುಧವಾರ ನಡೆದ ಸಚಿವ ಸಂಪುಟ ಸಭೆಯಲ್ಲಿ ಈ ಬಹುನಿರೀಕ್ಷಿತ ಯೋಜನೆಗೆ ಆಡಳಿತಾತ್ಮಕ ಅನುಮೋದನೆ ನೀಡಲಾಗಿದೆ. ವಿಶೇಷ ಉದ್ದೇಶದ ವಾಹನ (ಎಸ್‌ಪಿವಿ)ವೆಂದು ಗುರುತಿಸಲಾದ ಹೊರ ವರ್ತುಲ ರಸ್ತೆ ನಿರ್ಮಾಣ ಯೋಜನೆಯನ್ನು ಕಾಲಮಿತಿಯೊಳಗೆ ಅನುಷ್ಠಾನಕ್ಕೆ ತರಲು ಸರ್ಕಾರ ಪರ್ಯಾಯ ಪರಿಹಾರ ಮಾರ್ಗ ಕಂಡುಕೊಂಡಿದೆ.
ಹೊರ ವರ್ತುಲ ರಸ್ತೆಯು ಅಷ್ಟಪಥ ಮಾರ್ಗವಾಗಿದೆ. ಈ ರಸ್ತೆ ಮಾರ್ಗದುದ್ದಕ್ಕೂ 100 ಮೀಟರ್ ಅಗಲದ ವಾಣಿಜ್ಯ ಜಾಗದ ಎರಡು ಭಾಗದಲ್ಲಿ 30 ಮೀಟರ್ ಅಳತೆಯ ರಸ್ತೆ ನಿರ್ಮಿಸಲಿದ್ದು, ಒಟ್ಟು 71 ಕಿ.ಮೀ. ಉದ್ದದ ವಿಸ್ತೀರ್ಣ ಹೊಂದಲಿದೆ. ಕೆಲವು ಮಹತ್ವದ ಬದಲಾವಣೆಯೊಂದಿಗೆ ಸುಪ್ರೀಂಕೋರ್ಟ್ ನಿರ್ದೇಶನದಂತೆ ಯೋಜನೆಯ ಜಾರಿಗೆ ಸರ್ಕಾರ ನಿರ್ಧರಿಸಿದೆ.
6,000 ಕೋಟಿ ರೂ.ಗಳಷ್ಟಿದ್ದ ಪ್ರಾರಂಭಿಕ ಅಂದಾಜು ವೆಚ್ಚ 2020ರಲ್ಲಿ 20,000 ಕೋಟಿ ರೂ.ಗಳಿಗೇರಿದೆ. ಈ ಪೈಕಿ ಭೂಸ್ವಾಧೀನ ಪರಿಹಾರಕ್ಕೆಂದೇ 17,000 ಕೋಟಿ ರೂ. ವೆಚ್ಚವಾಗಲಿದೆ ಎಂದು ಅಂದಾಜಿಸಲಾಗಿತ್ತು. ಆರ್ಥಿಕ ಹೊರೆ, ತ್ವರಿತ ಭೂಸ್ವಾಧೀನ ಹಾಗೂ ಅನಗತ್ಯ ವಿಳಂಬ ತಪ್ಪಿಸುವುದಕ್ಕಾಗಿ ಸಾರ್ವಜನಿಕ, ಸಹಭಾಗಿತ್ವ, ವಿನ್ಯಾಸ, ನಿರ್ಮಾಣ, ಆರ್ಥಿಕ, ನಿರ್ವಹಣೆ ಮತ್ತು ವರ್ಗಾವಣೆ (ಪಿಪಿಪಿ ಡಿಬಿಎಫ್ಒಟಿ) ಮಾದರಿ ಅನುಸರಿಸಿ, 50 ವರ್ಷಗಳ ಗುತ್ತಿಗೆ ಹಾಗೂ ಟೋಲ್ ಸಂಗ್ರಹಣೆಗೆ ಸರ್ಕಾರ ಸಮ್ಮತಿಸಿದೆ.
ಇದನ್ನೂ ಓದಿ: ಹಿಜಾಬ್ ಪ್ರಕರಣ: ಸಿಜೆ ನೇತೃತ್ವದಲ್ಲಿ ವಿಶೇಷ ಪೀಠ ರಚನೆ, ಇಂದು ಮಧ್ಯಾಹ್ನವೇ ವಿಚಾರಣೆ
ಈ ಯೋಜನೆಗೆ ಜಾಗತಿಕವಾಗಿ ಟೆಂಡರ್ ಕರೆಯಲು ಸಂಪುಟ ಸಭೆ ಸಹಮತಿಸಿದೆ. ಕಡಿಮೆ ದರ ಸೂಚಿಸುವ ಬಿಡ್‌ದಾರರಿಗೆ ಯೋಜನೆ ಅನುಷ್ಠಾನದ ಗುತ್ತಿಗೆ ನೀಡಲಿದ್ದು, ಸರ್ಕಾರದ ಜಮೀನು ಉಚಿತವಾಗಿ ನೀಡಲಾಗುವುದು. ಉಳಿದ ಭೂಸ್ವಾಧೀನ ವೆಚ್ಚವನ್ನು ಬಿಡ್‌ದಾರರೇ ಭರಿಸುವ ಷರತ್ತು ವಿಧಿಸಲಾಗುತ್ತದೆ.
ಬಿಡ್ಡಿಂಗ್ ದಾಖಲೆಗಳು ಅಥವಾ ರಿಯಾಯಿತಿ ಒಪ್ಪಂದದ ಕರಾರು ತಯಾರಿಸುವ ಜವಾಬ್ದಾರಿ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರಕ್ಕೆ ಒಪ್ಪಿಸಿದ್ದು, ಆರ್ಥಿಕ ಇಲಾಖೆ ಅನುಮತಿ ಪಡೆಯುವುದೂ ಅಗತ್ಯ. ಒಪ್ಪಂದದಲ್ಲಿ ಯೋಜನಾ ವೆಚ್ಚವು ಹೆಚ್ಚಾದಲ್ಲಿ ರಿಯಾಯಿತಿದಾರರೇ ಭರಿಸಬೇಕೆಂಬ ಷರತ್ತು ವಿಧಿಸಲಾಗುತ್ತದೆ. ಜಾಗತಿಕ ಟೆಂಡರ್ ಕರೆಯುವ ಮುನ್ನ ಪರಿಸರ ನಿರಾಕ್ಷೇಪಣಾ ಪತ್ರವನ್ನು ಬಿಡಿಎ ಪಡೆಯಲಿದೆ.
ಯೋಜನೆಗೆ ಬೇಕಾಗುವ ಜಮೀನು ಎಷ್ಟು?: ಹೊರ ವರ್ತುಲ ರಸ್ತೆ ಭಾಗ-1ರ ಮೂಲ ಪಂಕ್ತೀಕರಣ- 1810.18 ಎಕರೆ
- ಜೋಡಣೆ, ಟೋಲ್ ಪ್ಲಾಜಾ ಇತರೆ ಉದ್ದೇಶಕ್ಕೆ- 0167.30 ಎಕರೆ
- ನೈಸ್ ಇಂಟಿಗ್ರೇಷನ್ ತುಮಕೂರು, ಹೊಸೂರು, ಪೆಟ್ರೋನಟ್ ಸೀಗೇಹಳ್ಳಿ, ಬದಲಿ ಪಂಕ್ತೀಕರಣ, ಕ್ಲೋವರ್ ಯೋಜನೆ - 589.13 ಎಕರೆ
- ಒಟ್ಟು ಭೂಮಿ- 2567.22 ಎಕರೆ.
