ಬೆಂಗಳೂರು: ಕೊರೊನಾ ಸಮಯದಲ್ಲಿ ಹೆಚ್ಚು ತಾಪತ್ರಯಕ್ಕೆ ಒಳಗಾಗಿದ್ದು, ಕೋವಿಡೇತರ ರೋಗಿಗಳು. ರಾಜ್ಯದಲ್ಲಿ ಲಭ್ಯವಿದ್ದ ಆ್ಯಂಬುಲೆನ್ಸ್ಗಳನ್ನ ಸಂಪೂರ್ಣ ಕೊರೊನಾ ರೋಗಿಗಳಿಗೆ ಮೀಸಲಿಡಲಾಯಿತು. ಹೀಗಾಗಿ ತುರ್ತು ಎಂದು ಆ್ಯಂಬುಲೆನ್ಸ್ಗೆ ಮಾಡಿದರೂ ಬರೋದು ತಡವಾಗುತ್ತಿತ್ತು. ಈ ವೇಳೆ, ಅದೆಷ್ಟೋ ಮಂದಿ ಜೀವ ಕಳೆದುಕೊಂಡಿದ್ದೂ ಇದೆ. ಇಂದಿಗೂ ಈ ಕುರಿತು ವರದಿಯಾಗುತ್ತಿವೆ.
ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲೂ ಮಾನವೀಯತೆ ತೋರುತ್ತಿರುವವರು ನಮ್ಮ ನಡುವೆಯೇ ಇದ್ದಾರೆ. ಉದಾಹರಣೆಗೆ ಬೆಂಗಳೂರಿನ ಹೆಬ್ಬಾಳದ ಭುವನೇಶ್ವರಿನಗರದ ನಿವಾಸಿ ಆಟೋ ಚಾಲಕ ಅಬ್ದುಲ್ ಮಜೀದ್ ಸೌದಾಗರ್. ತಮ್ಮ ಆಟೋವನ್ನೇ ಆ್ಯಂಬುಲೆನ್ಸ್ನಂತೆ ಪರಿವರ್ತಿಸಿಕೊಂಡಿದ್ದಾರೆ. ಈ ಮೂಲಕ ಅವರು, ದಿನಪೂರ್ತಿ ಸೇವೆಯಲ್ಲಿ ತೊಡಗಿದ್ದಾರೆ. ಅನಾರೋಗ್ಯ ಸಮಸ್ಯೆಯುಳ್ಳ ಬಡವರನ್ನು ಆಟೋದಲ್ಲೇ ಆಸ್ಪತ್ರೆಗೆ ಸಾಗಿಸುವ ಮೂಲಕ ಮಾದರಿಯಾಗಿದ್ದಾರೆ.
ಸಂಪೂರ್ಣ ಪಿಪಿಇ ಕಿಟ್ ಧರಿಸಿ, ಫೇಸ್ ಶೀಲ್ಡ್, ಮಾಸ್ಕ್, ಕೈಗವಸು ಹೀಗೆ ಎಲ್ಲವನ್ನೂ ಧರಿಸಿರುತ್ತಾರೆ. 24/7 ಸೇವೆ ನೀಡುವ ಅವರು, ಮನುಷ್ಯರಾಗಿ ಹುಟ್ಟಿದ ಮೇಲೆ ಒಬ್ಬರಿಗೆ ಒಬ್ಬರು ನೆರವಾಗಬೇಕು. ಈ ಕೆಲಸಕ್ಕೆ ಮನೆಯವರ ಪ್ರೋತ್ಸಾಹ ಕೂಡ ಇದೆ. ನಮ್ಮ ಗುರು-ಹಿರಿಯರು ಹೇಳಿಕೊಟ್ಟಂತೆ ನಾವು ಮತ್ತೊಬ್ಬರಿಗೆ ಸಹಾಯ ಮಾಡುತ್ತಾ ಬರುತ್ತಿದ್ದೇವೆ ಎಂದು ಈಟಿವಿ ಭಾರತಕ್ಕೆ ತಿಳಿಸಿದರು.
ಮೆಡಿಕಲ್ ಸೇವೆಗಾಗಿ ಅಷ್ಟೇ ತಮ್ಮ ಆಟೋವನ್ನು ಬಳಸಿಕೊಳ್ಳುತ್ತಿರುವ ಅಬ್ದುಲ್, ಆಟೋ ಮೀಟರ್ ಕೂಡ ತೆಗೆದು ಮನೆಯಲ್ಲಿ ಇಟ್ಟಿದ್ದಾರೆ. ಕೇವಲ ಕೋವಿಡ್-ನಾನ್ ಕೋವಿಡ್ ರೋಗಿಗಳಿಗೆ ಅಲ್ಲದೇ ಆಸ್ಪತ್ರೆ ಸಿಬ್ಬಂದಿಯನ್ನೂ ಆಸ್ಪತ್ರೆಗೆ ತಲುಪಿಸುತ್ತಾರೆ.
ಇದನ್ನೂ ಓದಿ...ಉಚಿತ ಆಂಬುಲೆನ್ಸ್ ಸೇವೆ: ಆಪತ್ ಕಾಲದಲ್ಲಿ ಆದರು ಆಪತ್ಬಾಂಧವರು!
ಅಂತ್ಯಕ್ರಿಯೆಗೂ ಉಚಿತ ಸೇವೆ: ಒಂದು ಕಡೆ ಉಚಿತವಾಗಿ ಆಟೋವನ್ನೇ ಆ್ಯಂಬುಲೆನ್ಸ್ ಮಾಡಿಕೊಂಡು ಜನರಿಗೆ ಆರೋಗ್ಯ ಸೇವೆ ನೀಡುತ್ತಿರುವ ಅಬ್ದುಲ್ ಅವರ ಮಾದರಿ ಕಥೆ ಒಂದು ಕಡೆಯಾದರೆ, ಮತ್ತೊಂದು ಕಡೆ ಕೊರೊನಾದಿಂದ ಮೃತಪಟ್ಟವರಿಗೆ ಇಲ್ಲೊಂದು ತಂಡ ಮುಕ್ತಿದಾತರಾಗಿದ್ದಾರೆ.
ಶಾಸಕ ಜಮ್ಮೀರ್ ಅವರು ನಿಯೋಜಿಸಿರುವ BZ ತಂಡ ಇದಾಗಿದ್ದು, ಅದರಲ್ಲಿ 20-22 ಜನ ಇದ್ದಾರೆ. ಕೊರೊನಾದಿಂದ ಮೃತಪಟ್ಟ ಎಷ್ಟೋ ಅನಾಥ ಶವಗಳಿಗೆ ಮುಕ್ತಿ ನೀಡುತ್ತಿದ್ದಾರೆ. ಸಾವನ್ನಪ್ಪಿದವರ ಧರ್ಮದ ಸಂಪ್ರದಾಯದಂತೆ ಅಂತ್ಯಸಂಸ್ಕಾರವನ್ನು ಈ ತಂಡ ನೆರವೇರಿಸುತ್ತದೆ. ಈವರೆಗೂ ಬೆಂಗಳೂರಿನಲ್ಲಿ ಕೊರೊನಾದಿಂದ ಮೃತಪಟ್ಟ 100ಕ್ಕೂ ಅಧಿಕ ಮೃತ ವ್ಯಕ್ತಿಗಳ ಅಂತ್ಯಕ್ರಿಯೆ ನೆರವೇರಿಸಿದ್ದಾರೆ.
ಇವರಷ್ಟೇ ಅಲ್ಲ, ಬಿಬಿಎಂಪಿ ಸದಸ್ಯ ಶಿವರಾಜು ಅವರು ಸಹ ತಮ್ಮ ವಾರ್ಡ್ನಲ್ಲಿ ಲಾಕ್ಡೌನ್ನಲ್ಲಿ ಪರದಾಡಿದ ಅದೆಷ್ಟೋ ಕುಟುಂಬಗಳಿಗೆ ಆಸರೆಯಾಗಿದ್ದರು. ರೋಗಿಗಳನ್ನ ಆಸ್ಪತ್ರೆಗೆ ದಾಖಲಿಸುವುದಾಗಲಿ, ಬೆಡ್ ವ್ಯವಸ್ಥೆಯಿಂದ ಹಿಡಿದು, ಮೃತಪಟ್ಟ ಸೋಂಕಿತರ ಅಂತ್ಯಕ್ರಿಯೆಯನ್ನು ತಾವೇ ಮುಂದೆ ನಿಂತು ಮುಗಿಸಿದ್ದಾರೆ.
- ಅಬ್ದುಲ್ ಮಜೀದ್ ಅವರ ಸಂಪರ್ಕ: 99869,03424
