ಬೆಂಗಳೂರು: ಲಾಕ್ಡೌನ್ನ ಮೂರನೇ ಬಾರಿಗೆ ವಿಸ್ತರಣೆಗೊಂಡಿದೆ. ಈ ಲಾಕ್ಡೌನ್ ಘೋಷಣೆಯಾದ ದಿನದಿಂದ ತಟಸ್ಥವಾಗಿದ್ದ ಕಾರುಗಳು ಬಳಕೆಯಾಗದೇ ದುಸ್ಥಿತಿ ತಲುಪಿವೆ. ಕೆಲವು ಸಡಿಲಿಕೆಗಳನ್ನು ಸರ್ಕಾರ ನೀಡಿದೆಯಾದರೂ ಕೂಡಾ ವಾಹನ ಸಂಚಾರ ಸಂಪೂರ್ಣವಾಗಿ ಆರಂಭವಾಗಿಲ್ಲ. ಅದರಲ್ಲೂ ಬಾಡಿಗೆ ಕಾರುಗಳ ಓಡಾಡಕ್ಕೆ ಸಮಯ ನಿಗದಿಪಡಿಸಲಾಗಿದೆ. ಸಾಫ್ಟ್ವೇರ್ ಸೇರಿದಂತೆ ವಿವಿಧ ಕ್ಷೇತ್ರ ಹಾಗೂ ಉದ್ಯಮಗಳಲ್ಲಿ ಕೆಲಸ ಮಾಡುವವರಿಗೆ ಪೂರ್ಣ ಪ್ರಮಾಣದಲ್ಲಿ ಕಚೇರಿಗೆ ತೆರಳಲು ಅನುಮತಿ ಸಿಕ್ಕಿಲ್ಲ. ಈ ಹಿನ್ನೆಲೆ ಲಾಕ್ಡೌನ್ ಸಡಿಲಿಕೆಗೊಂಡಿದ್ದರೂ ಇನ್ನೂ ಶೇಕಡಾ 70ರಷ್ಟು ವಾಹನಗಳು ಈಗಲೂ ಮನೆಗಳ ಮುಂದೆ ನಿಂತಿವೆ.
ರಾಜ್ಯ ಸರ್ಕಾರ ಸಮಯ ಮಿತಿ ಹೇರಿದ್ದು ಇದರ ಉಲ್ಲಂಘನೆ ಆದರೆ ಪೊಲೀಸ್ ಇಲಾಖೆ ದಂಡ ವಿಧಿಸುತ್ತದೆ. ಕಂಪನಿಗಳು 24 ಗಂಟೆ ಕಾರ್ಯನಿರ್ವಹಿಸುವುದಾದರೆ ಮಾತ್ರ ಕೆಲಸಕ್ಕೆ ಅವಕಾಶ ನೀಡುತ್ತವೆ. ಆದರೆ ಸರ್ಕಾರದ ಸಮಯ ಮೀರಿ ಸಂಚರಿಸಿದರೆ ಬೀಳುವ ದಂಡವನ್ನು ಕಟ್ಟಿಕೊಡಲು ಸಿದ್ಧವಿಲ್ಲ. ಈ ಕಂಪನಿಗಳನ್ನು ನಂಬಿಕೊಂಡು ತಿಂಗಳ ಪ್ರೀಮಿಯಂ ಕಟ್ಟುವವರ ಸ್ಥಿತಿಯಂತೂ ಶೋಚನೀಯವಾಗಿದೆ.
ರಾಜ್ಯ ಸರ್ಕಾರ ಬಾಡಿಗೆ ವಾಹನ ಚಾಲಕರ ಅನುಕೂಲಕ್ಕೆ ಒಂದಿಷ್ಟು ಕ್ರಮ ಕೈಗೊಳ್ಳಬೇಕು. ನಾವು ಕಾರ್ಯನಿರ್ವಹಿಸಲು ಸಿದ್ಧವಿದ್ದೇವೆ. ಸರ್ಕಾರ ನಮಗೆ ವಿಶೇಷ ಪಾಸ್ ಒದಗಿಸಿದರೆ ಅನುಕೂಲ. ಬಾಡಿಗೆ ಕ್ಯಾಬ್ ಸೇವೆ 24 ಗಂಟೆ ಇದ್ದು, ಸರ್ಕಾರ ಸಮಯ ಮಿತಿ ಹೇರಿದರೆ ಬಹಳ ಕಷ್ಟವಾಗಲಿದೆ ಎನ್ನುತ್ತಾರೆ ಕೆಲವು ಚಾಲಕರು.
ಇದು ಬಾಡಿಗೆ ವಾಹನ ಮಾಲೀಕರ ಕಷ್ಟವಾದರೆ, ಖಾಸಗಿ ವಾಹನ ಮಾಲೀಕರು ಕೂಡ ಕಳೆದ ಒಂದೂವರೆ ತಿಂಗಳಿಂದ ತಮ್ಮ ವಾಹನವನ್ನು ಆಚೆ ತೆಗೆದಿಲ್ಲ. ಇದೀಗ ಅವುಗಳ ಸ್ಥಿತಿ ಹೇಗಿದೆ ಎನ್ನುವುದನ್ನು ಊಹಿಸಲಾಗುತ್ತಿಲ್ಲ. ಲಾಕ್ ಡೌನ್ ತೆರವಾಗುತ್ತಿದ್ದಂತೆ ಗ್ಯಾರೇಜುಗಳು ಮುಂದೆ ಸಾಕಷ್ಟು ವಾಹನಗಳು ಬಂದು ನಿಲ್ಲುವಲ್ಲಿ ಯಾವುದೇ ಸಂಶಯವಿಲ್ಲ. ನಾವು ಹೊರ ಹೋಗುವ ಸಂದರ್ಭ ಎದುರಾದಾಗ ಅಸಲಿ ಸಮಸ್ಯೆ ತಿಳಿದುಬರಲಿದೆ ಎಂದು ಕೆಲ ಕಾರಿನ ಮಾಲೀಕರು ಅಭಿಪ್ರಾಯ ವ್ಯಕ್ತಪಡಿಸುತ್ತಾರೆ.
