ಬೆಂಗಳೂರು: ಕೋವಿಡ್-19 ಹಾಗೂ ಉದ್ಯಮ ಜಾಗೃತಿ ಚರ್ಚೆಯಲ್ಲಿ ಮಾತನಾಡಿದ ಜಯದೇವ ಆಸ್ಪತ್ರೆ ಮುಖ್ಯಸ್ಥ ಡಾ.ಮಂಜುನಾಥ್ ಮೇ ಮೊದಲ ವಾರದಲ್ಲಿ ಬೆಂಗಳೂರಿನಲ್ಲಿ ನಿತ್ಯ 20-25 ಸಾವಿರ ಕೇಸ್ ಬರುವ ಸಾಧ್ಯತೆ ಇದೆ ಎಂದು ಎಚ್ಚರಿಕೆ ನೀಡಿದರು.
ಚುನಾವಣೆ ಆಯೋಗ ರಾಜ್ಯಗಳಲ್ಲಿ ಈ ಸಂದರ್ಭದಲ್ಲಿ ಚುನಾವಣೆ ಆಯೋಜನೆ ಮಾಡಬಾರದಿತ್ತು ಹಾಗೂ ಕುಂಭ ಮೇಳ ಸೇರಿದಂತೆ ಜಾತ್ರೆಗಳನ್ನ ನಿರ್ಬಂಧನೆ ಮಾಡಬೇಕು ಎಂದು ಇವರು ಅಭಿಪ್ರಾಯ ವ್ಯಕ್ತಪಡಿಸಿದರು.
ಕೋವಿಡ್ ದಿನದಿಂದ ದಿನಕ್ಕೆ ದ್ವಿಗುಣ ಆಗುತ್ತಿದೆ. ಪಾಸಿಟಿವಿಟಿ ರೇಟ್ ಕೂಡ ಡಬಲ್ ಸಂಖ್ಯೆಯಲ್ಲಿ ಮೊದಲ ಬಾರಿಗೆ ತಲುಪಿದೆ. ಅನ್ಲಾಕ್ ನಂತರ ಮದುವೆ ಹಾಗೂ ಇನ್ನಿತರ ಸಮಾರಂಭಗಳು ಯಾವುದೇ ರೀತಿ ಕೋವಿಡ್ ನಿಯಮ ಪಾಲನೆ ಮಾಡದೇ ನಡೆದಿದೆ. ಇನ್ನು 6 ತಿಂಗಳು ಮಾಸ್ಕ್ ನಮ್ಮ ಸಂಸ್ಕೃತಿ ಆಗಬೇಕು, ಕೋವಾಕ್ಸಿನ್ ಹಾಗೂ ಕೋವಿಶೀಲ್ಡ್ ಎರಡು ಸಮರ್ಪಕವಾಗಿ ಇದೆ. ಲಸಿಕೆ ಪಡೆದ ನಂತರ ಜ್ವರ ಮೈ ನೋವು ಬಂದರೆ ಅದು ಲಸಿಕೆ ಅಡ್ಡ ಪರಿಣಾಮ ಅಲ್ಲ ಎಂದು ವಿವರಿಸಿದರು.
ಕೋವಿಡ್ ಲಸಿಕೆ ಪಡೆದ ನಂತರ ಮಾಸ್ಕ್ ಹಾಗೂ ಕೋವಿಡ್ ನಿಯಮ ಪಾಲನೆ ಮಾಡಬೇಕು. ಲಸಿಕೆ ಪಡೆದ ನಂತರವೂ ಕೋವಿಡ್ ಬರುವ ಸಾಧ್ಯತೆ ಇದೆ. ಇದು ಕಾರಿನಲ್ಲಿ ಸೀಟ್ ಬೆಲ್ಟ್ ಹಾಗೂ ಏರ್ಬ್ಯಾಗ್ ಇರುವ ರೀತಿ ಎಂದರು.
ಎಲ್ಲರಿಗೂ ರೆಮಿಡಿಸಿವಿರ್ ಬೇಡ, ಹೋಮ್ ಐಸೋಲೇಷನ್ ಇದ್ದರೆ ಆಮ್ಲಜನಕ ಪ್ರಮಾಣ ಬಗ್ಗೆ ಗಮನ ಇರಬೇಕು. ಇನ್ನು 3-4 ದಿನದಲ್ಲಿ ರೆಮಿಡಿಸಿವಿರ್ ಸಿಗಲಿದೆ. ಕಾರ್ಮಿಕರಿಗೆ ಶಕ್ತಿ ತುಂಬಬೇಕು, ಸದ್ಯಕ್ಕೆ ಯಾವುದೇ ಲಾಕ್ಡೌನ್ ಇರಲ್ಲ ಎಂದರು.
ಇದೇ ಸಂದರ್ಭದಲ್ಲಿ ರೈಲ್ವೆ ಎಡಿಜಿಪಿ ಭಾಸ್ಕರ್ ರಾವ್ ಸರ್ಕಾರ ಹಲವಾರು ನಿಯಮ ರೂಪಿಸಿದೆ. ಆದರೆ ಜನರಿಗೆ ಅದು ಮುಟುತ್ತಿಲ್ಲ. ಹೀಗಾಗಿ ಸರ್ಕಾರಕ್ಕೆ ಇದರ ಬಗ್ಗೆ ಸಲಹೆ ನೀಡಿ ಎಂದು ಹೇಳಿದರು. ನಾವೆಲ್ಲರೂ ಮಾಸ್ಕ್ ವಿತರಣೆ ಮಾಡಬೇಕು, ಜಾಗೃತಿ ಮೂಡಿಸಬೇಕು, ಇಲ್ಲದಿದ್ರೆ ಮತ್ತೆ ಎಲ್ಲರಿಗೂ ಅಕ್ಕಿ ಬೆಲೆ ಕೊಡುವ ಪರಿಸ್ಥಿತಿ ಬರಲಿದೆ ಎಂದರು.
