ಬೆಂಗಳೂರು: ಜಿಲ್ಲಾ ಚುನಾವಣಾಧಿಕಾರಿಗಳ ವ್ಯಾಪ್ತಿಯ 3 ಲೋಕಸಭಾ ಕ್ಷೇತ್ರಗಳಿಗೆ 2ನೇ ಹಂತದಲ್ಲಿ ಚುನಾವಣೆ ನಿಗದಿಯಾಗಿದ್ದು, ಬೆಂಗಳೂರು ಪೊಲೀಸರು ಫುಲ್ ಅಲರ್ಟ್ ಆಗಿದ್ದಾರೆ.
ಬೆಂಗಳೂರು ಕೇಂದ್ರ, ಬೆಂಗಳೂರು ಉತ್ತರ ಹಾಗೂ ದಕ್ಷಿಣ ಲೋಕಸಭಾ ಕ್ಷೇತ್ರಗಳಿಗೆ ಚುನಾವಣೆ ದಿನಾಂಕ ಫಿಕ್ಸ್ ಆಗಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರು ಪೊಲೀಸರು ಚೆಕ್ಪೋಸ್ಟ್ ಹಾಕಿ ಭದ್ರತೆ ವ್ಯವಸ್ಥೆ ಮಾಡಿದ್ದಾರೆ. ಅನುಮಾನಾಸ್ಪದ ವ್ಯಕ್ತಿ, ವಾಹನಗಳ ಮೇಲೆ ಕಣ್ಣಿಟ್ಟು ಪರಿಶೀಲನೆಯಲ್ಲಿ ತೊಡಗಿದ್ದಾರೆ.
ಭದ್ರತಾ ವಿಚಾರವಾಗಿ ಈಟಿವಿ ಭಾರತ್ ಜೊತೆಗೆ ಮಾತನಾಡಿರುವ ಆಗ್ನೇಯ ವಿಭಾಗ ಡಿಸಿಪಿ ಇಶಾ ಪಂಥ್, ಆಗ್ನೇಯ ವಿಭಾಗದ ಎಲ್ಲಾ ಪೊಲೀಸರಿಗೆ ಅಲರ್ಟ್ ಆಗಿರುವಂತೆ ಸೂಚಿಸಲಾಗಿದೆ. ಈ ವಿಚಾರವಾಗಿ ಈಗಾಗಲೇ ದೆಹಲಿಗೆ ತೆರಳಿ ಚುನಾವಣಾ ಅಧಿಕಾರಿಗಳ ಜೊತೆ ಮಾತುಕತೆ ನಡೆಸಿದ್ದೇವೆ. ನಾಳೆ ನಮ್ಮ ವಿಭಾಗದ ಎಲ್ಲಾ ರೌಡಿಗಳನ್ನ ಕರೆದು ರೌಡಿ ಪರೇಡ್ ನಡೆಸಲಿದ್ದೇವೆ. ಚುನಾವಣಾ ಸಂದರ್ಭ ಈ ರೌಡಿಗಳು ತಮ್ಮ ಅಟ್ಟಹಾಸ ತೋರಿಸುವ ಸಾಧ್ಯತೆ ಇದೆ. ಯಾರು ಬೇಲ್ನಲ್ಲಿ ಹೊರಗಿದ್ದಾರೆ, ಅವರು ಮಾರಕಾಸ್ತ್ರ ಹೊಂದಿದ್ದಾರೋ ಇಲ್ಲವೋ ಅನ್ನೋದರ ತಪಾಸಣೆ ನಡೆಸಲಿದ್ದೇವೆ ಎಂದು ಮಾಹಿತಿ ನೀಡಿದರು.
ಇಷ್ಟು ಮಾತ್ರವಲ್ಲದೆ, ಬಾರ್ ಮಾಲೀಕರುಗಳಿಗೆ ಕೆಲ ನಿಯಮಗಳನ್ನ ಪಾಲಿಸುವಂತೆ ಕೂಡ ಸೂಚನೆ ನೀಡಿದ್ದೇವೆ. ಹಾಗೆಯೇ ಸಿಆರ್ಪಿಎಫ್ ಸಿಬ್ಬಂದಿ ಈಗಾಗಲೇ ರೂಟ್ ಮಾರ್ಚ್ ಮಾಡಿದ್ದಾರೆ. ಹೆಚ್ಚಿನ ಭದ್ರತೆಗೆ ತುಕಡಿಗಳ ನಿಯೋಜಿಸಿದ್ದೇವೆ ಎಂದರು.
ಭದ್ರತೆ ವಿಚಾರವಾಗಿ ಯಾರೂ ಕೂಡ ಭಯಪಡಬೇಕಿಲ್ಲ. ಎಲೆಕ್ಷನ್ ಸಂಬಂಧ ಯಾವುದೇ ಮಾಹಿತಿ ಬೇಕಾದರೆ, c_vigil citizen app ಮೂಲಕ ಮಾಹಿತಿ ಪಡೆಯಬಹುದು. ಹಾಗೆಯೇ 100 ಸಂಖ್ಯೆಗೆ ಕರೆ ಮಾಡಿ ದೂರನ್ನ ಕೂಡ ನೀಡಬಹುದು. ಪೊಲೀಸ್ ಸಿಬ್ಬಂದಿ ಕೂಡ ಅಲರ್ಟ್ ಆಗಿರುತ್ತಾರೆ ಎಂದು ಡಿಸಿಪಿ ಇಶಾ ಪಂಥ್ ಹೇಳಿದ್ದಾರೆ.
