ಬೆಂಗಳೂರು: ನಗರದಲ್ಲಿ ಮಂಗನಹಳ್ಳಿ ಬ್ರಿಡ್ಜ್ ಬಳಿ ತಂದೆ ಮಗಳು ಡೆಡ್ಲಿ ಟ್ರಾನ್ಸ್ ಫಾರ್ಮರ್ನಿಂದ ಸಾವನ್ನಪ್ಪಿದ ಬೆನ್ನಲ್ಲೇ ಬೆಸ್ಕಾಂ ಅಲರ್ಟ್ ಆಗಿದೆ. ಸಾಲು ಸಾಲು ಅವಘಡಗಳ ಬಳಿಕ ಬೆಸ್ಕಾಂ ಅಧಿಕಾರಿಗಳು ಎಚ್ಚೆತುಕೊಂಡಿದ್ದಾರೆ. ಎಲ್ಲಾ ಕಡೆ ಅವಘಡಗಳನ್ನು ತಪ್ಪಿಸುವ ಕೆಲಸಕ್ಕೆ ಸಮರೋಪಾದಿಯಲ್ಲಿ ಅಧಿಕಾರಿಗಳ ತಂಡ ಮುಂದಾಗಿದೆ.
ರಾಜಧಾನಿಯಲ್ಲಿ ಎಲ್ಲೆಲ್ಲಿ ಡೆಡ್ಲಿ ಟ್ರಾನ್ಸ್ ಫಾರಂಗಳಿವೆಯೋ ಎಲ್ಲೆಲ್ಲಿ ವಿದ್ಯುತ್ ಲೈನ್ಗಳ ಸಮಸ್ಯೆ ಇದೆಯೋ ಅಲ್ಲೆಲ್ಲ ಕೂಡಲೆ ಕಾರ್ಯಾಚರಣೆಗೆ ಮುಂದಾಗಿ ಎಂದು ಸಿಬ್ಬಂದಿಗಳಿಗೆ ಸೂಚಿಸಲಾಗಿದೆ. ಅದರಂತೆ ಬೆಂಗಳೂರು, ಬೆಂಗಳೂರು ಗ್ರಾಮಾಂತರ, ಕೋಲಾರ, ಚಿಕ್ಕಬಳ್ಳಾಪುರ, ರಾಮನಗರ ಸೇರಿದಂತೆ ಬೆಸ್ಕಾಂ ವ್ಯಾಪ್ತಿಯ ಎಲ್ಲಾ ಜಿಲ್ಲಾ ಪ್ರದೇಶಗಳಲ್ಲಿ ಟ್ರಾನ್ಸ್ ಫಾರಂ ರಿಪೇರಿ ಕೆಲಸಕ್ಕೆ ಕೈಹಾಕಿದೆ.
ಅವಘಡಗಳನ್ನು ತಗ್ಗಿಸಲು ಬೆಸ್ಕಾಂ ಅಧಿಕಾರಿಗಳ ಕಾರ್ಯಾಚರಣೆ: ಸಾಕಷ್ಟು ಜಾಗದಲ್ಲಿ ಟ್ರಾನ್ಸ್ ಫಾರಂಗಳ ಸಮಸ್ಯೆ ಇದೆ. ಈ ಬಗ್ಗೆ ಸಾರ್ವಜನಿಕರ ದೂರು ಬಂದರೂ ಅಧಿಕಾರಿಗಳ ಮಾತ್ರ ತಲೆಕೆಡಸಿಕೊಂಡಿರಲಿಲ್ಲ. ಆದರೆ ಇತ್ತೀಚೆಗೆ ಮೃತಪಟ್ಟ ತಂದೆ ಮಗಳ ಪ್ರಕರಣದ ಬಳಿಕ ಎಚ್ಚೆತುಕೊಂಡಿದ್ದಾರೆ. ಅಪಾಯಕಾರಿ ಅನುಪಯುಕ್ತ ಟ್ರಾನ್ಸ್ ಫಾರ್ಮರ್ಗಳ ಸರಿಪಡಿಸುವ ಕೆಲಸ ಮಾಡಲಾಗುತ್ತಿದ್ದು ಕಳೆದ 15 ದಿನಗಳಲ್ಲಿ ಸಾವಿರಾರು ಟ್ರಾನ್ಸ್ ಫಾರಂಗಳನ್ನು ಸರಿಪಡಿಸಲಾಗಿದೆ.
15 ದಿನಗಳಲ್ಲಿ 10,794 ಟಿಸಿಗಳ ರಿಪೇರಿ ಮಾಡಿದ ಬೆಸ್ಕಾಂ: ಮೇ 5 ರಂದು ಟಿಸಿ ನಿರ್ವಹಣೆ ಅಭಿಯಾನಕ್ಕೆ ಚಾಲನೆ ನೀಡಿದ್ದು, ಅಂದಿನಿಂದ ಇಲ್ಲಿವರೆಗೂ 10ಸಾವಿರಕ್ಕೂ ಹೆಚ್ಚು ಟಿಸಿಗಳ ಗುಣಮಟ್ಟದ ಪರೀಕ್ಷಿಸಲಾಗಿದೆ. ಹಾಗೇ ಸರಿಪಡಿಸುವ ಕೆಲಸವೂ ನಡೆದಿದೆ. ತಾಂತ್ರಿಕ ಸಮಸ್ಯೆ ಉಂಟಾಗಿರುವ ಟಿಸಿಗಳಿಗೆ ಶಾಶ್ವತ ಕಾಯಕಲ್ಪಕ್ಕೆ ಬೆಸ್ಕಾಂ ಹೆಜ್ಜೆ ಇಟ್ಟಿದ್ದು, ನಗರದಲ್ಲಿ ಅಪಾಯಕ್ಕೆ ಆಹ್ವಾನ ನೀಡುತ್ತಿದ್ದ ಟಿಸಿಗಳ ನಿರ್ವಹಣೆ ಮಾಡಲಾಗಿದೆ. ಅಲ್ಲದೇ ಕಳೆದ 15 ದಿನಗಳಲ್ಲಿ ನಗರ ವ್ಯಾಪ್ತಿಯಲ್ಲೇ ಬರೊಬ್ಬರಿ 3,476 ಟಿಸಿಗಳ ನಿರ್ವಹಣೆ ನಡೆಸಲಾಗಿದೆ.
ಫಾರಂ ಗಳ ನಿರ್ವಹಣೆಯ ಜಿಲ್ಲಾವಾರು ವಿವರ: ದಾವಣಗೆರೆ ಜಿಲ್ಲೆಯಲ್ಲಿ 1,881, ತುಮಕೂರಿನಲ್ಲಿ 1,602, ಚಿತ್ರದುರ್ಗದಲ್ಲಿ 1,090, ರಾಮನಗರದಲ್ಲಿ 814, ಚಿಕ್ಕಬಳ್ಳಾಪುರದಲ್ಲಿ 797, ಕೋಲಾರದಲ್ಲಿ 598, ಬೆಂಗಳೂರು ಗ್ರಾಮಾಂತರದಲ್ಲಿ 537 ಟ್ರಾನ್ಸ್ ಫಾರಂಗಳನ್ನು ಪರೀಕ್ಷಿಸಲಾಗಿದೆ.
ಬೆಂಗಳೂರು ನಗರ ವ್ಯಾಪ್ತಿ: ಪಶ್ಚಿಮ ವಲಯದಲ್ಲಿ 804, ದಕ್ಷಿಣ ವಲಯದಲ್ಲಿ 760, ಪೂರ್ವ ವಲಯದಲ್ಲಿ 835, ಉತ್ತರ ವಲಯದಲ್ಲಿ 826 ಟಿಸಿಗಳ ನಿರ್ವಹಣೆ ಮಾಡಲಾಗಿದೆ.
ಇದನ್ನೂ ಓದಿ: ಟಿಪ್ಪು ಮೈಸೂರು ಹುಲಿ ಎನ್ನುವುದಕ್ಕೆ ಒಂದು ಕಾರಣ ಕೊಡಿ: ಪ್ರತಾಪ್ ಸಿಂಹ
