ಕೊರೊನಾದಿಂದ ಪೊಲೀಸರ ರಕ್ಷಣೆಗೆ ಹೊಸ ಪ್ಲಾನ್: ಮಾರ್ಗಸೂಚಿಯಲ್ಲಿ ಏನೆಲ್ಲಾ ಇದೆ ಗೊತ್ತಾ?

ದೈನಂದಿನ ಪೊಲೀಸ್ ಚಟುವಟಿಕೆ ಕೈಪಿಡಿಯೊಂದನ್ನು ಬಿಡುಗಡೆ ಮಾಡಲಾಗಿದ್ದು, ಇದರಲ್ಲಿ ಕೊರೊನಾದಿಂದ ರಕ್ಷಿಸಿಕೊಳ್ಳಲು ಸಿಬ್ಬಂದಿಗೆ ಮಾರ್ಗಸೂಚಿಗಳನ್ನು ನೀಡಲಾಗಿದೆ.

ಬೆಂಗಳೂರು: ಕೊರೊನಾ ವಾರಿಯರ್ಸ್​ ಆಗಿ ದಿನನಿತ್ಯ ಕೆಲಸದಲ್ಲಿ ನಿರತರಾಗಿರುವ ಪೊಲೀಸ್​ ಸಿಬ್ಬಂದಿಯ ರಕ್ಷಣೆಗೆ ಹಿರಿಯ ಅಧಿಕಾರಿಗಳು ಪಣ ತೊಟ್ಟಿದ್ದಾರೆ. ನೂತನ ನಗರ ಪೊಲೀಸ್​ ಆಯುಕ್ತ ಕಮಲ್ ಪಂತ್​​ ಹಾಗೂ ಆಗ್ನೇಯ ವಿಭಾಗದ ಡಿಸಿಪಿ ಇಶಾ ಪಂತ್​​ ಆರೋಗ್ಯ ಕಾಪಾಡಿಕೊಳ್ಳಲು ಹಾಗೂ ಕೊರೊನಾದಿಂದ ರಕ್ಷಿಸಿಕೊಳ್ಳಲು ಸಲಹೆ - ಮಾರ್ಗಸೂಚಿಗಳಿರುವ ಕೈಪಿಡಿಯೊಂದನ್ನು ಸಿಬ್ಬಂದಿಗೆ ನೀಡಿದ್ದಾರೆ.

ಈ ಕುರಿತು ಇಶಾ ಪಂತ್​​ ಮಾತನಾಡಿ, ನಾವು ಮುಖ್ಯಮಂತ್ರಿ ಯಡಿಯೂರಪ್ಪ ಹಾಗೂ ಗೃಹ ಸಚಿವ ಬಸವರಾಜ ಬೊಮ್ಮಾಯಿ ಅವರ ನೇತೃತ್ವದಲ್ಲಿ ಪೊಲೀಸರ ಆರೊಗ್ಯದ ದೃಷ್ಟಿಯಿಂದ ಈ ಪುಸ್ತಕ ಬಿಡುಗಡೆ ಮಾಡಿದ್ದೇವೆ. ಕೆಲವು ಸಿಬ್ಬಂದಿಗೆ ಕೊರೊನಾ ಬಗ್ಗೆ ಭಯ, ಆತಂಕ, ಗೊಂದಲ ಇದೆ. ಆದರೆ ಈ ದೈನಂದಿನ ಪೊಲೀಸ್ ಚಟುವಟಿಕೆ ಕೈಪಿಡಿಯಲ್ಲಿ ಪ್ರತಿಯೊಂದಕ್ಕೂ ಪರಿಹಾರ ಇದೆ ಎಂದು ತಿಳಿಸಿದ್ದಾರೆ.

ಕರ್ತವ್ಯದ ವೇಳೆ ಪೊಲೀಸ್​ ಸಿಬ್ಬಂದಿ ಪಾಲಿಸಬೇಕಾದ ಮಾರ್ಗಸೂಚಿಗಳು:

• ಠಾಣೆಯಲ್ಲಿ ಹಾಜರಾತಿ ತೆಗೆದುಕೊಳ್ಳುವ ಸಮಯದಲ್ಲಿ ಸಾಮಾಜಿಕ ಅಂತರ ಪಾಲನೆ
• ಗುಣಮಟ್ಟದ ಮಾಸ್ಕ್ ಧರಿಸುವುದು
• ಎಲ್ಲ ಠಾಣೆಗಳಲ್ಲಿ ಸಾಮಾಜಿಕ ಅಂತರದ ಮಾರ್ಕ್ ಮಾಡುವುದು
• ಠಾಣೆಗಳಲ್ಲಿ ಸಿಬ್ಬಂದಿ ಗುಂಪು ಗುಂಪಾಗಿ ಸೇರುವಂತಿಲ್ಲ
• ಹೊರಗಡೆ ಕರ್ತವ್ಯನಿರತ ಸಿಬ್ಬಂದಿ ನೇರವಾಗಿ ಮನೆಗೆ ಹೋಗಬೇಕು
• ಯಾವುದೇ ಸಂಬಂಧಿಕರ ಮನೆ ಸ್ನೇಹಿತರ ಮನೆ ಇತರ ಸ್ಥಳಗಳಿಗೆ ಹೋಗಬಾರದು
• ಸ್ಥಳಕ್ಕೆ ಅನುಗುಣವಾಗಿ ಸುರಕ್ಷತೆ ಕ್ರಮ ಕೈಗೊಳ್ಳಬೇಕು
• ಸಿಬ್ಬಂದಿ ಪ್ರತಿದಿನ ಮನೆಯಿಂದಲೇ ಊಟ-ತಿಂಡಿ ತರಬೇಕು
• ಹೊರಗಿನ ಪದಾರ್ಥಗಳಿಗೆ ಅವಲಂಬಿತರಾಗಬಾರದು
• ಉಪವಾಸದ ನಿಯಮ ಪಾಲಿಸಬಾರದು
• ಪೌಷ್ಠಿಕ ಆಹಾರವನ್ನು ಸೇವಿಸಿ
• ದೈಹಿಕ ವ್ಯಾಯಾಮ, ಯೋಗ ಮಾಡಿ
• ಒಂದು ವೇಳೆ ಆರೋಗ್ಯ ಕೆಟ್ಟಲ್ಲಿ ಹಿರಿಯ ಅಧಿಕಾರಿಗೆ ತಿಳಿಸಿ ಸೂಕ್ತ ಚಿಕಿತ್ಸೆ ತೆಗೆದುಕೊಳ್ಳಬೇಕು
• ಆರೋಗ್ಯ ಸಂಬಂಧಪಟ್ಟ ಸಲಹೆ ಸೂಚನೆಗಳನ್ನು ಸಿಬ್ಬಂದಿಗೆ ವಾಟ್ಸಾಪ್ ಗ್ರೂಪ್ ಮೂಲಕ ಅಧಿಕಾರಿಗಳು ತಿಳಿಸಬೇಕು
• ಸಣ್ಣ-ಪುಟ್ಟ ಪ್ರಕರಣಗಳಲ್ಲಿ ಆರೋಪಿಯನ್ನ ಬಂಧಿಸುವುದನ್ನು ಕಡಿತಗೊಳಿಸಬೇಕು
• ಗಂಭೀರ ಪ್ರಕರಣದ ಆರೋಪಿಗಳ ತನಿಖೆಗೆ ಸಿಸಿಟಿವಿ ಕ್ಯಾಮರಾ ಬಳಕೆ ಮಾಡುವುದು
• ಪೊಲೀಸರು ಬೇರೆ ಯಾವುದೇ ಖಾಸಗಿ ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳಬಾರದು
• ಠಾಣಾ ಸಿಬ್ಬಂದಿ ಬಿಡುವಿನ ಸಂಧರ್ಭದಲ್ಲಿ‌ ಒಬ್ಬರ ಫೋನ್​ನಲ್ಲಿ ಇನ್ನೊಬ್ಬರು ಮಾತನಾಡುವ ವೇಳೆ ಲೌಡ್​ ಸ್ಪೀಕರ್ ಆನ್​ ಮಾಡಬೇಕು
• ಸಾರ್ವಜನಿಕರ ಸಮಸ್ಯೆಯನ್ನ ಇಮೇಲ್, ವಾಟ್ಸಪ್ ಅಥವಾ ಡಯಲ್ 100 ಮೂಲಕ ದೂರು ತೆಗೆದುಕೊಳ್ಳುವ ಕಡೆ ಗಮನ ಕೊಡಬೇಕು
• ಜನಸಂದಣಿ ಪ್ರದೇಶಕ್ಕೆ 55 ವರ್ಷ ಮೇಲ್ಪಟ್ಟ ಪೊಲೀಸ್ ಅಧಿಕಾರಿ, ಸಿಬ್ಬಂದಿಯ ಹೋಗದಂತೆ ತಡೆಯುವುದು
• ಗರ್ಭಿಣಿ ಸಿಬ್ಬಂದಿಗೆ ಕಚೇರಿಯಲ್ಲಿ ಕಂಪ್ಯೂಟರ್ ಅಥವಾ ಹೆಲ್ಪ್​​ಲೈನ್​ ಕರ್ತವ್ಯಕ್ಕೆ ನೇಮಕ‌ ಮಾಡಬೇಕು
• ಒಬ್ಬ ಸಿಬ್ಬಂದಿ ಬಳಸಿದ ಹಾಸಿಗೆ, ನೀರಿನ ಬಾಟಲ್, ಚಮಚ, ಬಾಕ್ಸ್ ಸೇರಿದಂತೆ ಇತರ ವಸ್ತುಗಳನ್ನು ಇನ್ನೊಬ್ಬ ಸಿಬ್ಬಂದಿ ಬಳಕೆ ಮಾಡಬಾರದು
• ಸಿಬ್ಬಂದಿ ಚಿನ್ನದ ನೆಕ್ಲೇಸ್, ಕಿವಿ ಓಲೆ, ಬಳೆ, ಉಂಗುರಗಳ ಬಳಕೆ ಮಾಡಬಾರದು. ಯಾಕಂದ್ರೆ ಅವುಗಳ ಮೂಲಕ ಸೋಂಕು ಹರಡುವ ಸಾಧ್ಯತೆ ಇದೆ
• ಶೂಗಳನ್ನು ನಿತ್ಯ ಒಣಗಿಸಿ ಹಾಕಿಕೊಂಡು ಬರಬೇಕು
• ಠಾಣಾಧಿಕಾರಿಗಳು ತಕ್ಕಮಟ್ಟಿಗೆ ಕ್ಯಾಪ್ ಧರಿಸುವುದನ್ನು ಕಡಿಮೆ ಮಾಡಬೇಕು
• ಠಾಣೆಗಳಲ್ಲಿ ಕುಡಿಯಲು, ಕೈಕಾಲು ತೊಳೆಯಲು ಬಿಸಿ ನೀರನ್ನು ಒದಗಿಸಬೇಕು
• ಯಾವುದೇ ಸಿಬ್ಬಂದಿಗೆ ಪಾಸಿಟಿವ್ ಬಂದರೂ ಭಯ ಪಡಬಾರದು, ಆತ್ಮಸ್ಥೈರ್ಯ ಕಳೆದುಕೊಳ್ಳಬಾರದು