ಬೆಂಗಳೂರು : ದೇವಾಲಯಗಳಲ್ಲಿ ಬೆಳಗ್ಗೆ ಪೂಜೆ, ಗಂಟೆ ಸದ್ದು, ಮಂಗಳಾರತಿ, ಧೂಪ-ದೀಪ, ಭಕ್ತಿಯ ವಾತಾವರಣ ಸರ್ವೇ ಸಾಮಾನ್ಯ ದೃಶ್ಯ. ಆದರೆ, ಅಕೊರೊನಾ ವೈರಸ್‌ನಿಂದಾಗಿ ಲಾಕ್ಡೌನ್ ಆದಾಗ ಮೊದಲು ಬೀಗ ಬಿದ್ದಿದ್ದೇ ಧಾರ್ಮಿಕ ಕೇಂದ್ರಗಳಿಗೆ. ಇದರ ಪರಿಣಾಮ ಮಾತ್ರ ರಾಜ್ಯದ ಬೊಕ್ಕಸಕ್ಕೆ ಭಾರೀ ಪೆಟ್ಟು ಕೊಟ್ಟಿದೆ.
ಒಂದು ಕಡೆ ದೇವಸ್ಥಾನಗಳಿಗೆ ತೆರಳದೇ ಮನೆಗಳಲ್ಲೇ ಪೂಜೆ, ಪುನಸ್ಕಾರ ಮಾಡ್ತಾ ಕೊರೊನಾದಿಂದ ನಮ್ಮನ್ನು ಕಾಪಾಡು ಎಂದು ಜನ ದೇವರಿಗೆ ಕೈ ಮುಗಿಯುತ್ತಿದ್ದಾರೆ. ಮತ್ತೊಂದೆಡೆ ಕೋಟಿಗಟ್ಟಲೆ ಆದಾಯ ತರುತ್ತಿದ್ದ ದೇವಾಲಯಗಳ ಹುಂಡಿಗಳು ಖಾಲಿ ಹೊಡೆದು ಮುಜರಾಯಿ ಇಲಾಖೆ ಕಂಗೆಡುವಂತಾಗಿದೆ.
ಲಾಕ್ಡೌನ್ ಆಗಿದ್ದ ದೇವಾಲಯಗಳೇನೋ ಈಗ ಮತ್ತೆ ಓಪನ್ ಆಗಿವೆ. ಈ ಸಂದರ್ಭದಲ್ಲಿ ದೇವಾಲಯಕ್ಕೆ ಬರುವ ಭಕ್ತರ ಸಂಖ್ಯೆ ಶೇ.40ರಷ್ಟು ಮಾತ್ರ. ಇದರಿಂದ ದೇವಾಲಯಕ್ಕೆ ಆದಾಯ ಸಹ ಕಡಿಮೆಯಾಗಿದೆ. ಮೈಸೂರು ಜಿಲ್ಲೆಯಲ್ಲಿ ಮುಜರಾಯಿ ಇಲಾಖೆಗೆ ಸೇರಿದ 1,279 ದೇವಾಲಯಗಳಿವೆ. ಅದರಲ್ಲಿ ಗ್ರೂಪ್ 'ಎ' 5, ಗ್ರೂಪ್ 'ಬಿ' 4, ಗ್ರೂಪ್ 'ಸಿ'ಗೆ ಸೇರಿದ 1,570 ದೇವಾಲಯಗಳಿವೆ.
ಮುಖ್ಯವಾಗಿ ಗ್ರೂಪ್ 'ಎ' ದೇವಾಲಯದಲ್ಲಿ ಚಾಮುಂಡೇಶ್ವರಿ ತಾಯಿ ದೇವಸ್ಥಾನ, ನಂಜನಗೂಡಿನ ಶ್ರೀಕಂಠೇಶ್ವರ, ತಲಕಾಡು ದೇವಸ್ಥಾನ, ಪಿರಿಯಾಪಟ್ಟಣದ ಮಸಣಕಮ್ಮ ದೇವಸ್ಥಾನ ಹಾಗೂ ನಂಜಬಹದ್ದೂರ್ ಛತ್ರ ಸೇರಿದ್ದು, ಗ್ರೂಪ್ 'ಬಿ'ನಲ್ಲಿ ಚುಂಚನಕಟ್ಟೆ ಶ್ರೀರಾಮ ದೇವಸ್ಥಾನ, ಗುಂಜನರಸಿಂಹ ಸ್ವಾಮಿ ದೇವಸ್ಥಾನ, ತ್ರಿಪುರ ಸುಂದರಿ ದೇವಸ್ಥಾನ ಹಾಗೂ ಚಿಕ್ಕಮ್ಮ ಬೆಟ್ಟದ ಚಿಕ್ಕಮ್ಮ ತಾಯಿ ದೇವಸ್ಥಾನ ಪ್ರಮುಖ.
ಚಾಮುಂಡೇಶ್ವರಿ ಹಾಗೂ ನಂಜನಗೂಡಿನ ಶ್ರೀಕಂಠೇಶ್ವರ ದೇವಸ್ಥಾನ ಅತಿ ಹೆಚ್ಚು ಆದಾಯ ತರುವ ದೇವಾಲಯಗಳಾಗಿವೆ. ಲಾಕ್ಡೌನ್ ಸಂದರ್ಭ ಈವರೆಗೂ ಚಾಮುಂಡೇಶ್ವರಿ ದೇವಾಲಯದಲ್ಲಿ ₹18 ಕೋಟಿ ಆದಾಯ ನಷ್ಟವಾಗಿದೆ. ನಂಜನಗೂಡಿನ ಶ್ರೀಕಂಠೇಶ್ವರ ದೇವಾಲಯದಲ್ಲಿ ₹2 ಕೋಟಿಗೂ ಹೆಚ್ಚು ಆದಾಯ ಕಡಿಮೆಯಾಗಿದೆ.
ಬಾಗಲಕೋಟೆಯ ಪ್ರಸಿದ್ಧ ಬಾದಾಮಿ ಬನಶಂಕರಿ ದೇವಾಲಯಕ್ಕೆ ಅಧಿಕ ಮಾಸದ ನಿಮಿತ್ತ ಸಾಕಷ್ಟು ಸಂಖ್ಯೆಯ ಭಕ್ತರು ಬರುತ್ತಿದ್ದರು. ಆದರೆ, ಈಗ ಭಕ್ತರು ಬರದ ಕಾರಣ ಆದಾಯ ಇಲ್ಲದೆ ಸಮಿತಿಯವರು ಸಂಕಷ್ಟ ಪಡುವಂತಾಗಿದೆ.
ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಕುಕ್ಕೆ ಸುಬ್ರಹ್ಮಣ್ಯ, ಧರ್ಮಸ್ಥಳ ಮಂಜುನಾಥೇಶ್ವರ, ಕಟೀಲು ದುರ್ಗಾಪರಮೇಶ್ವರಿ, ಕುದ್ರೋಳಿ ಗೋಕರ್ಣನಾಥ, ಮಂಗಳಾದೇವಿ, ಶರವು ಮಹಾಗಣಪತಿ ಮೊದಲಾದ ಪ್ರಮುಖ ದೇವಸ್ಥಾನಗಳಿದೆ. ಈ ದೇವಸ್ಥಾನಗಳು ಕೊರೊನಾ ಸಂದರ್ಭದಲ್ಲಿ ಲಾಕ್ಡೌನ್ ವೇಳೆ ಸಂಪೂರ್ಣ ಬಂದ್ ಆಗಿದ್ದವು.
ಅನ್ಲಾಕ್ ಬಳಿಕ ದೇವಸ್ಥಾನಗಳು ಪುನಾರಂಭವಾದ್ರೂ ಭಕ್ತರ ಸಂಖ್ಯೆ ಕಡಿಮೆಯಿದೆ. ದೇವಸ್ಥಾನಗಳಲ್ಲಿ ಭಕ್ತರು ನೀಡುವ ಸೇವೆಯ ಸಂಖ್ಯೆಯು ಕಡಿಮೆಯಾಗಿರುವುದರಿಂದ ದೇವಸ್ಥಾನಕ್ಕೆ ಆದಾಯವು ಹರಿದು ಬರುತ್ತಿಲ್ಲ. ಜಿಲ್ಲೆಯಲ್ಲಿ ಯಾವೊಂದು ದೇವಸ್ಥಾನಗಳೂ ಸೇವೆಯ ದರವನ್ನು ಹೆಚ್ಚಿಸುವ ಪ್ರಯತ್ನ ಮಾಡಿಲ್ಲ. ಹಲವು ಪ್ರಮುಖ ದೇವಸ್ಥಾನಗಳು ವಸತಿಗೃಹ, ಅಂಗಡಿ ಬಾಡಿಗೆ ನೀಡುವುದು , ಸಭಾಂಗಣ ಸೇರಿ ಕೆಲ ಮೂಲಗಳಿಂದ ಪಡೆಯುತ್ತಿದ್ದ ಆದಾಯಕ್ಕೆ ಬ್ರೇಕ್ ಬಿದ್ದಿದೆ.
ಈ ಸಂದರ್ಭದಲ್ಲಿ ದೇವಾಲಯಗಳ ನಿರ್ವಹಣೆ, ಸಂಬಳ ಸೇರಿ ಇತರ ವೆಚ್ಚಗಳ ನಿರ್ವಹಣೆಗೆ ಕಷ್ಟವಾಗಿದೆ. ಇದಕ್ಕಾಗಿ ಈ ಹಿಂದೆ ದೇವಾಲಯದ ಆದಾಯವನ್ನು ಬ್ಯಾಂಕ್ನಲ್ಲಿಟ್ಟ ಠೇವಣಿ ಹಣದ ಬಡ್ಡಿಯಿಂದ ಹಾಗೂ ಠೇವಣಿ ಹಣ ಸ್ವಲ್ಪ ತೆಗೆದುಕೊಂಡು ವೆಚ್ಚಕ್ಕೆ ಉಪಯೋಗಿಸಲಾಗುತ್ತಿದೆ ಎನ್ನಲಾಗ್ತಿದೆ.
