ಲಾಕ್​ಡೌನ್ ಅಸ್ತ್ರಕ್ಕೆ ಸಿಲುಕಿ ತರಗೆಲೆಯಾಗಿದ್ದ ಬಿಎಂಟಿಸಿಯಲ್ಲಿ ಈಗ ಅಲ್ಪ ಚೇತರಿಕೆ...

ಕೊರೊನಾ ಕಾಲಿಟ್ಟಾಗಿನಿಂದ ಜನ ಭೀತಿಯಲ್ಲೇ ಬದುಕುತ್ತಿದ್ದಾರೆ. ಲಾಕ್​ಡೌನ್​ ವೇಳೆ ಒಂದೆಡೆಯಿಂದ ಮತ್ತೊಂದೆಡೆ ಹೋಗೋದಕ್ಕೆ ನಿರ್ಬಂಧ ಇದ್ದ ಕಾರಣ ಸಾರಿಗೆ ಸೇವೆಗಳ ಮೇಲೆಯೂ ದುಷ್ಪರಿಣಾಮ ಉಂಟಾಗಿತ್ತು. ಈ ವೇಳೆ ಬಿಎಂಟಿಸಿ ನಷ್ಟಕ್ಕೆ ಒಳಗಾಯಿತು.

ಬೆಂಗಳೂರು: ಕೊರೊನಾ ಬಂದ ನಂತರ ಸಿಲಿಕಾನ್ ಸಿಟಿಯ ಅಚ್ಚುಮೆಚ್ಚಿನ ಸಾರಿಗೆ ಬಿಎಂಟಿಸಿ ಸಾಕಷ್ಟು ನಷ್ಟಕ್ಕೆ ಒಳಗಾಗಿತ್ತು. ಲಾಕ್​ಡೌನ್ ಅಸ್ತ್ರಕ್ಕೆ ಸಿಲುಕಿ ತರಗೆಲೆಯಾದ ಬಿಎಂಟಿಸಿ ಅನ್​ಲಾಕ್​ ಪ್ರಕ್ರಿಯೆ ಶುರುವಾದ ನಂತರ ಚೇತರಿಕೆ ಕಾಣುತ್ತಿದೆ.

ಕೊರೊನಾಗೂ ಮುನ್ನ ನಗರದಲ್ಲಿ ದಿನನಿತ್ಯ 6 ಸಾವಿರ ಬಸ್ಸುಗಳು ಓಡಾಡುತ್ತಿದ್ದವು. ಆದರೆ ಇದೀಗ ಅರ್ಧದಷ್ಟು ಅಂದರೆ 3 ಸಾವಿರ ಬಸ್ಸುಗಳು ಕಾರ್ಯಾಚರಣೆ ನಡೆಸುತ್ತಿವೆ. ಪ್ರತಿದಿನ 8 ಲಕ್ಷದಷ್ಟು ಮಂದಿ ಸಂಚಾರ ಮಾಡುತ್ತಿದ್ದರೂ ಸಹ ಇಲಾಖೆ 3 ಕೋಟಿ ರೂ. ನಷ್ಟ ಅನುಭವಿಸುತ್ತಿದೆ.

ಕೊರೊನಾ ಹರಡುವಿಕೆ ತಡೆಯಲು ಆನ್​ಲೈನ್ ಪೇಮೆಂಟ್​..!

ಕೊರೊನಾ ಹರಡುವಿಕೆ ತಡೆಯಲು ಪ್ಲಾನ್​ ಮಾಡಿರುವ ನಿಗಮ ಕ್ಯೂ ಆರ್ ಕೋಡ್ ಮೂಲಕ ಆನ್ ಲೈನ್ ಪೇಮೆಂಟ್ ಮಾಡುವ ವ್ಯವಸ್ಥೆ ಉತ್ತೇಜಿಸಿತು. ಬಿಎಂಟಿಸಿ ಪ್ರಯಾಣಿಕರ ಆನ್​ಲೈನ್ ಪೇಮೆಂಟ್ ಮಾಡೋರ ಸಂಖ್ಯೆ ಹೆಚ್ಚಾಗಿದೆ. ಡಿಜಿಟಲ್ ಪೇಮೆಂಟ್ ಅಪ್ಲಿಕೇಷನ್​ ಮೂಲಕ ಕ್ಯೂಆರ್ ಕೋಡ್ ಸ್ಕ್ಯಾನ್ ಪೇಮೆಂಟ್ ಮಾಡೋದು ತುಂಬಾನೇ ಸುಲಭ.

ಪ್ರಯಾಣಿಕರಿಗೆ-ನಿಗಮದ ಸಿಬ್ಬಂದಿಯ ಸುರಕ್ಷತೆಗೆ ಒತ್ತು:

ಕರ್ತವ್ಯ ನಿರ್ವಹಿಸುವ ಡ್ರೈವರ್, ಕಂಡಕ್ಟರ್ ಕಡ್ಡಾಯವಾಗಿ ಫೇಸ್ ಮಾಸ್ಕ್ ಧರಿಸುವುದು, ಸ್ಯಾನಿಟೈಸರ್ ಬಳಕೆ, ನಿಗದಿತ ನಿಲುಗಡೆಗಳಲ್ಲಿ ಪ್ರಯಾಣಿಕರನ್ನು ಹತ್ತಿಸುವುದು-ಇಳಿಸುವುದು.‌
ಸಾಮಾಜಿಕ ಅಂತರ ಕಾಯ್ದುಕೊಳ್ಳುವುದರ ಜೊತೆಗೆ ಮಾಸ್ಕ್ ಹಾಕದೇ ಇರುವ ಪ್ರಯಾಣಿಕರ ಪ್ರವೇಶಕ್ಕೆ ನಿರ್ಬಂಧ ಮುಂತಾದ ಕ್ರಮಗಳನ್ನು ಕೈಗೊಳ್ಳಲಾಗಿದೆ.