ಬೆಂಗಳೂರು: ಕೋವಿಡ್ ಹಿನ್ನೆಲೆ ಎರಡು ವರ್ಷಗಳಿಂದ ನಿಂತುಹೋಗಿದ್ದ ಮಾವು ಮೇಳಕ್ಕೆ ಈ ವರ್ಷ ಚಾಲನೆ ಸಿಗಲಿದೆ. ಇದಕ್ಕಾಗಿ ತೋಟಗಾರಿಕಾ ಇಲಾಖೆ ಲಾಲ್ಬಾಗ್ನಲ್ಲಿ ಅಗತ್ಯ ಸಿದ್ಧತೆಯನ್ನೂ ಆರಂಭಿಸಿದೆ. ಅಲ್ಲದೇ ಈ ವರ್ಷ ಕಬ್ಬನ್ ಉದ್ಯಾನ ಸೇರಿದಂತೆ ವಿವಿಧೆಡೆ ಮಾವು ಮೇಳವನ್ನು ಆಯೋಜಿಸಲು ಚಿಂತನೆ ನಡೆಸಲಾಗಿದೆ. ರಾಜ್ಯಕ್ಕೆ ಕೋವಿಡ್ ನಾಲ್ಕನೇ ಅಲೆ ಅಪ್ಪಳಿಸುವ ಆತಂಕ ಕೇಳಿ ಬರುತ್ತಿರುವ ಹಿನ್ನೆಲೆ ಜನರಿಗೆ ನಾವು ಖರೀದಿಯಲ್ಲಿ ಯಾವುದೇ ತೊಂದರೆ ಆಗದಿರಲಿ ಎಂಬ ಉದ್ದೇಶದಿಂದ ವಿವಿಧ ಆನ್ಲೈನ್ ವೇದಿಕೆಗಳ ಮೂಲಕ ಮಾವಿನ ಹಣ್ಣು ಪೂರೈಕೆ ಮಾಡಲು ಇಲಾಖೆ ತೀರ್ಮಾನಿಸಿದೆ.
ಆನ್ಲೈನ್ ವೇದಿಕೆ ಸಿದ್ಧ: ಮಾವಿನಹಣ್ಣನ್ನು ಆನ್ಲೈನ್ ಮೂಲಕವೂ ಜನರ ಮನೆ ಬಾಗಿಲಿಗೆ ತಲುಪಿಸಲು ತೀರ್ಮಾನಿಸಿದ್ದು, ಇದೇ ಬರುವ ಸೋಮವಾರದಿಂದ ಬೆಂಗಳೂರು ನಗರದ ಗ್ರಾಹಕರು ಈ ಸೇವೆಯ ಲಾಭ ಪಡೆಯಲಿದ್ದಾರೆ. ಇದಕ್ಕೆ ಅಗತ್ಯ ಸಿದ್ಧತೆ ಕೈಗೊಳ್ಳಲಾಗಿದ್ದು, ಜನರಿಗೆ ನಾವು ಅತ್ಯಂತ ವ್ಯವಸ್ಥಿತವಾಗಿ ಮಾವು ಲಭ್ಯತೆಯ ಮಾಹಿತಿಯನ್ನು ನೀಡಲಿದ್ದೇವೆ. ಇಲಾಖೆಯ ವೆಬ್ಸೈಟ್ ಮೂಲಕ ಹಾಗೂ ವಿವಿಧ ಮಾರ್ಗಗಳಲ್ಲಿ ಜನರಿಗೆ ಮಾವು ಖರೀದಿಯ ಆನ್ಲೈನ್ ವಿಳಾಸವನ್ನು ತಲುಪಿಸುವ ಕಾರ್ಯ ಮಾಡುತ್ತೇವೆ ಎಂದು ರಾಜ್ಯ ಮಾವು ಅಭಿವೃದ್ಧಿ ಮತ್ತು ಮಾರುಕಟ್ಟೆ ನಿಗಮದ ವ್ಯವಸ್ಥಾಪಕ ನಿರ್ದೇಶಕ ಸಿ.ಜಿ.ನಾಗರಾಜ್‌ ತಿಳಿಸಿದ್ದಾರೆ.
ಕಳೆದ ಮೂರು ವರ್ಷಗಳಿಂದ ಆನ್ಲೈನ್ ಮೂಲಕ ಮಾವು ಮಾರಾಟ ಮಾಡುವ ಕಾರ್ಯದಲ್ಲಿ ತೋಟಗಾರಿಕೆ ಇಲಾಖೆ ತೊಡಗಿದೆ. ಜನರಿಂದ ಉತ್ತಮ ಸ್ಪಂದನೆ ಸಿಗುತ್ತಿದೆ. ಕೋವಿಡ್ ಸಂದರ್ಭದಲ್ಲಿಯೂ ದೊಡ್ಡ ಪ್ರಮಾಣದಲ್ಲಿ ಮಾವು ಮಾರಾಟ ಆನ್ಲೈನ್ ಮೂಲಕ ಆಗಿತ್ತು. ಕಳೆದ ವರ್ಷ 40 ಸಾವಿರ ಗ್ರಾಹಕರು ಅಂಚೆ ಮೂಲಕ ಮಾವು ಖರೀದಿಸಿದ್ದರು. ಈ ಬಾರಿ ಇನ್ನೂ ಹೆಚ್ಚಿನ ಸಂಖ್ಯೆಯ ಗ್ರಾಹಕರು ನೋಂದಣಿ ಮಾಡಿ ಖರೀದಿಸುವ ಸಾಧ್ಯತೆಯಿದೆ ಎಂದಿದ್ದಾರೆ.
ಪ್ರತ್ಯೇಕ ಮೇಳ: ಮಾವು ಖರೀದಿಗೆ ಆನ್ಲೈನ್ ವೇದಿಕೆ ಒದಗಿಸುವ ಜೊತೆಗೆ ಸಾಕಷ್ಟು ಗ್ರಾಹಕರ ಅನುಕೂಲವನ್ನು ಉದ್ದೇಶವಾಗಿಟ್ಟುಕೊಂಡು ಆಫ್ಲೈನ್ ವೇದಿಕೆಯಲ್ಲಿಯೂ ಮಾವು ಮಾರಾಟ ಮಾಡಲು ತೀರ್ಮಾನ ಕೈಗೊಳ್ಳಲಾಗಿದೆ. ಲಾಲ್ಬಾಗ್ನಲ್ಲಿ ಈ ಬಾರಿ 100 ಮಳಿಗೆಗಳನ್ನು ತೆರೆಯಲಾಗುವುದು. ಜತೆಗೆ, ಕಬ್ಬನ್‌ಪಾರ್ಕ್‌ನಲ್ಲಿ ಕೂಡ ಮಾವು ಮೇಳ ಆಯೋಜಿಸಲು ಚಿಂತನೆ ನಡೆಸಲಾಗಿದೆ.
ಮೊದಲು ಲಾಲ್ಬಾಗ್ನಲ್ಲಿ ಮೇಳ ಆಯೋಜಿಸಿ ಅದರ ಯಶಸ್ಸು ಗಮನಿಸಿ ಕಬ್ಬನ್ ಉದ್ಯಾನದಲ್ಲಿ ಮೇಳ ಆಯೋಜಿಸುವ ತೀರ್ಮಾನ ಕೈಗೊಳ್ಳುತ್ತೇವೆ. ಗ್ರಾಹಕರು ಬಯಸಿದಲ್ಲಿ ನಗರದ ಇನ್ನೂ ಕೆಲ ಭಾಗಗಳಿಗೂ ಮೇಳವನ್ನು ವಿಸ್ತರಿಸುವ ಆಶಯ ಹೊಂದಿದ್ದೇವೆ. ಲಾಲ್ಬಾಗ್ನಲ್ಲಿ ಮೇಳ ಆಯೋಜಿಸುವ ಸಿದ್ಧತೆ ನಡೆದಿದೆ. ಕಬ್ಬನ್ ಪಾರ್ಕ್ನಲ್ಲಿಯೂ ನಡೆಸುವ ಸಂಬಂಧ ಸರ್ಕಾರಕ್ಕೆ ಅನುಮತಿ ಕೋರಿದ್ದೇವೆ. ಸರ್ಕಾರದ ಹಸಿರು ನಿಶಾನೆ ಸಿಕ್ಕರೆ ಬೆಂಗಳೂರು ಉತ್ತರ ಭಾಗದ ಗ್ರಾಹಕರ ಅನುಕೂಲಕ್ಕಾಗಿ ಅಲ್ಲಿಯೂ ಮೇಳ ಆಯೋಜಿಸುತ್ತೇವೆ ಎಂದು ತೋಟಗಾರಿಕಾ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ಈಟಿವಿ ಭಾರತ್ಗೆ ತಿಳಿಸಿದ್ದಾರೆ.
ಕಳೆದ ಎರಡು ವರ್ಷಗಳಿಂದ ಕೋವಿಡ್ ಹಿನ್ನೆಲೆ ಲಾಲ್ಬಾಗ್ ಮಾವು ಮೇಳ ನಡೆದಿರಲಿಲ್ಲ. ಅಲ್ಲದೆ ಜನ ಸಹ ಆಚೆ ಬರಲು ಹೆದರುತ್ತಿದ್ದರು. ಆದರೆ ಮೂರನೇ ಅಲೆ ದೇಶದಲ್ಲಿ ಅಂತಹ ಪರಿಣಾಮ ಬೀರದ ಹಿನ್ನೆಲೆ ಜನ ಆಚೆ ಬರುತ್ತಿದ್ದಾರೆ. ಮಾವು ಮೇಳ ಸಹ ಯಶಸ್ವಿಯಾಗಲಿದೆ ಎಂಬ ವಿಶ್ವಾಸವನ್ನು ತೋಟಗಾರಿಕೆ ಇಲಾಖೆ ಹೊಂದಿದೆ.
ಇದನ್ನೂ ಓದಿ: ಬೆಂಗಳೂರು : ಆರೋಗ್ಯ ಇಲಾಖೆಯಿಂದ ಆರೋಗ್ಯ ಮೇಳ ಆಯೋಜನೆ
