ಆನೇಕಲ್​: ಬಾರ್​ನಿಂದ ಮದ್ಯ ತಂದು ಮನೆಯಲ್ಲಿ ಮಾರುತ್ತಿದ್ದ ಮಾಲೀಕನ ಬಂಧನ

ಬೆಂಗಳೂರು ಹೊರವಲಯ ಆನೇಕಲ್ ತಾಲೂಕಿನ ಬೊಮ್ಮಸಂದ್ರದಲ್ಲಿ ತನ್ನ ಬಾರ್​ನಲ್ಲಿನ ಮದ್ಯ ಕದ್ದು ಮಾರುತ್ತಿದ್ದ ಮಾಲೀಕನನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ.

ಆನೇಕಲ್​: ತನ್ನ ಬಾರ್​ನಲ್ಲಿ ರಾತ್ರಿ ವೇಳೆ ತಾನೇ ಹೋಗಿ ಮದ್ಯ ತಂದು ಮನೆಯಲ್ಲಿ ದುಪ್ಪಟ್ಟು ದರಕ್ಕೆ ಮಾರುತ್ತಿದ್ದ ಮಾಲೀಕನನ್ನು ಪೊಲೀಸರು ಬಂಧಿಸಿದ್ದಾರೆ.

ಬೆಂಗಳೂರು ಹೊರವಲಯ ಆನೇಕಲ್ ತಾಲೂಕಿನ ಬೊಮ್ಮಸಂದ್ರದಲ್ಲಿ ಈ ಘಟನೆ ನಡೆದಿದೆ. ಬಾರ್ ಮಾಲೀಕ ಶ್ರೀನಿವಾಸ್ ಬಂಧಿತ. ಲಾಕ್​​ಡೌನ್​​ನಿಂದಾಗಿ ಮದ್ಯದ ಬೇಡಿಕೆ ಹಚ್ಚಿದೆ. ಎಷ್ಟೋ ಮಂದಿ ಬ್ಲಾಕ್​​ನಲ್ಲಿ ದುಪ್ಪಟ್ಟು ಹಣ ನೀಡಿ ಖರೀದಿಸಲು ಮುಂದಾಗುತ್ತಿದ್ದಾರೆ. ಹಾಗಾಗಿ ಶ್ರೀನಿವಾಸ್ ತನ್ನದೇ ಬಾರ್​ನಿಂದ ಮದ್ಯ ತಂದು ಮನೆಯಲ್ಲೇ ನಿತ್ಯ ಮಾರುತ್ತಿದ್ದ ಎನ್ನಲಾಗಿದೆ.

‌ಎಂದಿನಂತೆ ಇಂದು ಸಹ ಬೆಳಗಿನ ಜಾವ 4 ಗಂಟೆ ಸುಮಾರಿಗೆ ಶ್ರೀನಿವಾಸ್ ಹಾಗೂ ಸ್ನೇಹಿತ ಶಾಮುಲು ಮದ್ಯ ತರಲು ಹೋಗಿದ್ದಾರೆ. ಖಚಿತ ಮಾಹಿತಿ ಮೇರೆಗೆ ಸ್ಥಳಕ್ಕೆ ಬಂದಿದ್ದ ಹೆಬ್ಬುಗೋಡಿ ಪೊಲೀಸರು ಆರೋಪಿಗಳನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅಲ್ಲದೆ ಈ ಸಂಬಂಧ ಪ್ರಕರಣ ದಾಖಲಿಸಿಕೊಂಡಿದ್ದಾರೆ.