ಬೆಂಗಳೂರು : ನೀವು ಸಾಕಷ್ಟು ಬೈಕ್ ಕಳ್ಳರ ಬಗ್ಗೆ ಓದಿರುತ್ತೀರಿ. ಆದರೆ, ನಿಖರವಾಗಿ ಒಂದೇ ಕಂಪನಿಯ ಬೈಕ್ ಕದಿಯುವುದನ್ನು ಕೇಳಿರುವುದಕ್ಕೆ ಸಾಧ್ಯವಿಲ್ಲ. ಆದರೆ, ಟಿವಿಎಸ್ ಎಕ್ಸ್ಎಲ್ ಬೈಕ್ಗಳನ್ನೇ ಟಾರ್ಗೆಟ್ ಮಾಡಿಕೊಂಡು ಕಳ್ಳತನ ಮಾಡುತ್ತಿದ್ದ ಖದೀಮನನ್ನು ಜ್ಞಾನಭಾರತಿ ಪೊಲೀಸರು ಬಂಧಿಸಿದಾರೆ. ಕಳ್ಳತನ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
ರಾಜಾ ಅಲಿಯಾಸ್ ರಘುರಾಮ್ ಬಂಧಿತ ಆರೋಪಿ. ತಮಿಳುನಾಡಿನಿಂದ ಬೆಂಗಳೂರಿಗೆ ಬಂದು ಬೈಕ್ ಕಳ್ಳತನ ಮಾಡುತ್ತಿದ್ದ ಆರೋಪಿಯನ್ನು ಬಂಧಿಸುವಲ್ಲಿ ಜ್ಞಾನಭಾರತಿ ಪೊಲೀಸ್ ಠಾಣೆ ಇನ್ಸ್ಪೆಕ್ಟರ್ ಲಕ್ಷ್ಮಣ್ ನಾಯಕ್ ಮತ್ತು ಪಿಎಸ್ಐ ದತ್ತುಬಾ ತಂಡ ಯಶಸ್ವಿಯಾಗಿದೆ. ಬಂಧಿತನಿಂದ 3 ಲಕ್ಷ ಮೌಲ್ಯದ ಒಟ್ಟು 7 ಟಿವಿಎಸ್ ಎಕ್ಸ್ಎಲ್ಗಳನ್ನ ವಶಪಡಿಸಿಕೊಂಡು ಆರೋಪಿಯನ್ನ ಜೈಲಿಗಟ್ಟಿದ್ದಾರೆ.
ಈತ ಕಳ್ಳತನ ಮಾಡೋದು ಕೇವಲ ಟಿವಿಎಸ್ ಎಕ್ಸ್ಎಲ್ ಹೆವಿ ಡ್ಯೂಟಿ ಮತ್ತು ಎಕ್ಸ್ಎಲ್ 100 ಬೈಕ್ಗಳನ್ನ ಮಾತ್ರ. ಅದರ ಪಕ್ಕದಲ್ಲಿ ನೀವು ಅದೆಷ್ಟೋ ಕೋಟಿ ಬೆಲೆ ಬಾಳುವ ಬೈಕ್ ನಿಲ್ಲಿಸಿದ್ದರೂ ಈತ ಮುಟ್ಟೋದಕ್ಕೆ ಹೋಗುವುದಿಲ್ಲ. ಆರೋಪಿಯನ್ನ ಪ್ರಶ್ನಿಸಿದಾಗ ವಿಭಿನ್ನವಾಗಿ ಉತ್ತರಿಸಿದ್ದಾನೆ.
ಟಿವಿಎಸ್ ಎಕ್ಸ್ಎಲ್ ಮಾತ್ರ ಕದಿಯೋಕೆ ಕಾರಣಗಳು
ಈ ಕಳ್ಳನಿಗೆ ಟಿವಿಎಸ್ ಎಕ್ಸ್ಎಲ್ ಗಾಡಿ ಬಿಟ್ಟು ಬೇರೆ ಗಾಡಿ ಓಡಿಸೋಕೆ ಬರೋದಿಲ್ವಂತೆ. ಅಲ್ಲದೆ, ಈ ಬೈಕ್ನ ಕದಿಯೋದು ಬೇರೆ ಎಲ್ಲಾ ಬೈಕ್ಗಳಿಗಿಂತ ತೀರಾ ಸಲೀಸಂತೆ. ಜೊತೆಗೆ ಕಡಿಮೆ ಬೆಲೆ ಬೈಕ್ ಆಗಿರೋದ್ರಿಂದ ಪೊಲೀಸರು ಕೂಡ ಅದರ ಬಗ್ಗೆ ಅಷ್ಟಾಗಿ ತಲೆ ಕೆಡಿಸಿಕೊಂಡು ಹುಡುಕುವುದಿಲ್ಲ ಹಾಗೂ ಈ ಬೈಕ್ನ ಮಾರುವುದು ಕೂಡ ಸುಲಭ. ಹೀಗಾಗಿ, ಟಿವಿಎಸ್ ಎಕ್ಸ್ಎಲ್ ಬೈಕ್ ಕಳ್ಳತನ ಮಾಡುತ್ತಿದ್ದೆ ಎಂದು ವಿಚಾರಣೆ ವೇಳೆ ಬಾಯ್ಬಿಟ್ಟಿದ್ದಾನೆ.
ಇದನ್ನೂ ಓದಿ: ಹುನಗುಂದ ಬಳಿ ಕಾರು ಅಪಘಾತ ಪ್ರಕರಣ: ಘಟನೆ ಬಗ್ಗೆ ಚಿದಾನಂದ ಸವದಿ ಹೇಳಿದ್ದಿಷ್ಟು
