ಬೆಂಗಳೂರು: ಇಂದಿನಿಂದ ವಿಮಾನ ಯಾನ ಸೇವೆ ಆರಂಭವಾಗಿದೆ. ಸಾವಿರಾರು ಜನರು ತಮ್ಮ ತಮ್ಮ ಸ್ಥಳಗಳಿಗೆ ಬರುತ್ತಿದ್ದಾರೆ. ಈ ಮಧ್ಯೆ ನವದೆಹಲಿಯಿಂದ ವಿಶೇಷ ಅತಿಥಿಯೊಬ್ಬರು ದೇವನಹಳ್ಳಿಯ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದ್ದಾರೆ.
ಹೌದು, ದೆಹಲಿಯಿಂದ ಐದು ವರ್ಷದ ಪೋರ ಏಕಾಂಗಿಯಾಗಿ ಬೆಂಗಳೂರು ಕೆಂಪೇಗೌಡ ವಿಮಾನ ನಿಲ್ದಾಣಕ್ಕೆ ಬಂದಿಳಿದಿದ್ದಾನೆ. ವಿಮಾನ ನಿಲ್ದಾಣದಲ್ಲಿ ಐದು ವರ್ಷ ವಯಸ್ಸಿನ ವಿಹಾನ್ ಶರ್ಮಾ ಎಂಬಾತ ಎಲ್ಲರ ಕೇಂದ್ರಬಿಂದುವಾಗಿದ್ದ. ಮೂರು ತಿಂಗಳ ಬಳಿಕ ವಿಹಾನ್ ಬೆಂಗಳೂರಿಗೆ ಬಂದಿದ್ದಾನೆ. ಅಧಿಕಾರಿಗಳು ವಿಶೇಷ ಪ್ರಕರಣವೆಂದು ಪರಿಗಣಿಸಿ ಬಾಲಕನನ್ನು ಬೆಂಗಳೂರಿಗೆ ಕಳುಹಿಸಿದ್ದಾರೆ.
ಕಳೆದ ಫೆಬ್ರವರಿಯಲ್ಲಿ ವಿಹಾನ್ ಶರ್ಮಾನ ಅಜ್ಜಿ, ತಾತ ಬೆಂಗಳೂರಿಗೆ ಬಂದಿದ್ದರು. ದೆಹಲಿಗೆ ಮರಳುವಾಗ ಮೊಮ್ಮಗ ವಿಹಾನ್ ಶರ್ಮಾನನ್ನ ಕೂಡ ಕರೆದುಕೊಂಡು ಹೋಗಿದ್ದರು. ಕೆಲವು ದಿನಗಳ ನಂತರ ಬಾಲಕನ ತಂದೆ-ತಾಯಿ ದೆಹಲಿಗೆ ಹೋಗಿ ಬಾಲಕನನ್ನ ಕರೆತರಬೇಕಿತ್ತು. ಆದ್ರೆ ಅಷ್ಟರಲ್ಲಿ ದೇಶಾದ್ಯಂತ ಲಾಕ್ಡೌನ್ ಜಾರಿಯಾದ ಹಿನ್ನೆಲೆ ಬಾಲಕ ದೆಹಲಿಯಲ್ಲಿಯೇ ಸಿಲುಕಿಕೊಂಡಿದ್ದ. ಇಂದಿನಿಂದ ಮತ್ತೆ ದೇಶಿ ವಿಮಾನಗಳ ಹಾರಾಟ ಪ್ರಾರಂಭವಾದ ನಂತರ ನಿಹಾನ್ ಶರ್ಮಾ ದೆಹಲಿಯಿಂದ ಏಕಾಂಗಿಯಾಗಿ ಬೆಂಗಳೂರಿನ ಕೆಐಎಎಲ್ಗೆ ಬಂದಿದ್ದಾನೆ. ಅಜ್ಜಿ, ತಾತ ವಯಸ್ಸಾದವರಾಗಿದ್ದರಿಂದ ಅವರು ಮೊಮ್ಮಗನನ್ನು ಬೆಂಗಳೂರಿಗೆ ಕರೆತರಲು ಸಾಧ್ಯವಾಗಿಲ್ಲ. ದೆಹಲಿ ವಿಮಾನ ನಿಲ್ದಾಣದವರೆಗೂ ಮೊಮ್ಮಗನನ್ನು ಬಿಳ್ಕೊಟ್ಟಿದ್ದಾರೆ. ಸ್ಪೈಸ್ ಜೆಟ್ನಲ್ಲಿ ಬೆಂಗಳೂರಿನ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಇಂದು ಬೆಳಗ್ಗೆ ಬಾಲಕ ಬಂದಿಳಿದ್ದಾನೆ. ಸ್ಪೆಷಲ್ ಕೆಟಗಿರಿಯಲ್ಲಿ ಬಾಲಕನನ್ನು ಹೋಮ್ ಕಾರಂಟೈನ್ ಮಾಡಲಾಗಿದೆ.
