ಸಿದ್ದರಾಮೋತ್ಸವ ಶಾಬಾದಿಮಠ ಕ್ಯಾಲೆಂಡರ್​​ನಲ್ಲಿ ಹಾಕಿಸಬೇಕು: ಶ್ರೀರಾಮುಲು ವ್ಯಂಗ್ಯ

ಕಾಂಗ್ರೆಸ್​ನವರು ಸಿದ್ದರಾಮಯ್ಯ ಅವರನ್ನು ಉತ್ಸವ ಮೂರ್ತಿಯಂತೆ ಮಾಡುತ್ತಾರೆ, ಮೆರವಣಿಗೆ ಮಾಡಿ ಅವರನ್ನು ಒಳಗೆ ಇಡುತ್ತಾರೆ ಎಂದು ಶ್ರೀರಾಮುಲು ಸಿದ್ದರಾಮೋತ್ಸವದ ಬಗ್ಗೆ ಲೇವಡಿ ಮಾಡಿದರು.

ಬಳ್ಳಾರಿ : ಸಿದ್ದರಾಮೋತ್ಸವ ಎಂದರೆ ಇದೇನು ಹಂಪಿ ಉತ್ಸವ, ಸಿದ್ಧಗಂಗಾ ಮಠದ ಉತ್ಸವದಂತೆಯೇ? ಇನ್ನು ಮುಂದೆ ಆಗಸ್ಟ್ 3 ಸಿದ್ದರಾಮೋತ್ಸವ ಅಂತ ಶಾಬಾದಿಮಠ ಕ್ಯಾಲೆಂಡರ್​ನಲ್ಲಿ ಹಾಕಿಸಬೇಕು. ಸಿದ್ದರಾಮೋತ್ಸವ ಅಂತ ಕಾಂಗ್ರೆಸ್ಸಿನವರು ಆಚರಿಸುವ ಮೂಲಕ ಸಿದ್ದರಾಮಯ್ಯ ಅವರನ್ನು ಉತ್ಸವ ಮೂರ್ತಿ ಮಾಡುತ್ತಿದ್ದಾರೆ ಎಂದು ಸಾರಿಗೆ ಮತ್ತು ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆಯ ಸಚಿವ ಬಿ. ಶ್ರೀರಾಮುಲು ಲೇವಡಿ ಮಾಡಿದ್ದಾರೆ.

ಬಳ್ಳಾರಿಯಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಎಸ್​ಸಿ ಮತ್ತು ಎಸ್​ಟಿ ಸಮುದಾಯಕ್ಕೆ ಮೀಸಲಾತಿ ಹೆಚ್ಚಳ ವಿಚಾರದ ಬಗ್ಗೆ ಪ್ರತಿಕ್ರಿಯಿಸಿದ ಅವರು ಮೀಸಲಾತಿ ಲಾಭ ಪಡೆದ ರಾಜಕೀಯ ನಾಯಕರಿಗೆ ನಾನು ಉತ್ತರ ಕೊಡಲ್ಲ. ಕಾಂಗ್ರೆಸ್​ನವರು ಕೇವಲ ವೋಟ್​ ಬ್ಯಾಂಕ್​ಗಾಗಿ ಈ ಸಮುದಾಯಗಳನ್ನು ಬಳಸಿಕೊಂಡರು. ಸ್ವಯಂ ಘೋಷಿತ ಹಿಂದುಳಿದ ನಾಯಕ ಸಿದ್ದರಾಮಯ್ಯ ಯಾಕೆ ಮೀಸಲಾತಿ ಕೊಡಲಿಲ್ಲ ಎಂದು ಪ್ರಶ್ನಿಸಿದರು.

ನನ್ನ ಹೇಳಿಕೆಗೆ ಈಗಲೂ ಬದ್ದನಾಗಿದ್ದೇನೆ. 2006 ರಿಂದ ಈ ಸಮುದಾಯಕ್ಕೆ ಯಾವೆಲ್ಲಾ ಮಾತುಕೊಟ್ಟಿದ್ದೆ ಎಲ್ಲವನ್ನೂ ಈಡೇರಿಸಿದ್ದೇನೆ. ವಾಲ್ಮೀಕಿ ಜಯಂತಿ, ವಾಲ್ಮೀಕಿ ನಿಗಮ, ಪ್ರತ್ಯೇಕ ಸಚಿವಾಲಯ, ರಾಜ್ಯದ ಎಲ್ಲ ಕಡೆ ವಾಲ್ಮೀಕಿ ಸಮುದಾಯ ಭವನ ನಿರ್ಮಾಣ ಮಾಡಿದ್ದೇವೆ. ಮೀಸಲಾತಿ ವಿಚಾರದ ಬಗ್ಗೆ ಈಗಾಗಲೇ ಸಿಎಂ ಜೊತೆ ಮಾತನಾಡಿದ್ದೇನೆ. ಶೀಘ್ರದಲ್ಲೇ ಎಸ್​ಸಿ ಮತ್ತು ಎಸ್​ಟಿ ಸಮುದಾಯಕ್ಕೆ ಸಿಹಿ ಸುದ್ದಿ ಕೊಡುತ್ತೇವೆ ಎಂದರು.

ಇದನ್ನೂ ಓದಿ : ಸಿದ್ದರಾಮೋತ್ಸವ ಆಚರಣೆ ಅಗತ್ಯವಿರಲಿಲ್ಲ: ಸಂಸದ ಶ್ರೀನಿವಾಸ್ ಪ್ರಸಾದ್