ಚಿಕ್ಕೋಡಿ: ಯಾರ ಮನೆಯಲ್ಲಿ ಗೋಮಾತೆ ಇರುತ್ತೋ ಆ ಮನೆಯಲ್ಲಿ ನೆಮ್ಮದಿ, ಸುಖ, ಶಾಂತಿ ನೆಲೆಸಿರುತ್ತದೆ ಎಂಬುವುದು ವಾಡಿಕೆ. ಇಲ್ಲೊಬ್ಬ ರೈತ ಗೋಮಾತೆಗೆ ತನ್ನ ಮಗಳ ಸ್ಥಾನ ನೀಡಿ, ಚೆಂದದ ಹೆಸರಿಡುವ ಜೊತೆಗೆ ಸೀಮಂತ ನೆರವೇರಿಸುವ ಮೂಲಕ ಗ್ರಾಮಸ್ಥರಿಗೆ ಅದ್ಧೂರಿ ಊಟ ಹಾಕಿಸಿ ಸಂಭ್ರಮಿಸಿದ್ದಾರೆ.
ಗೋಮಾತೆ ಸೀಮಂತ ಕಾರ್ಯಕ್ರಮ
ಬೆಳಗಾವಿ ಜಿಲ್ಲೆಯ ಚಿಕ್ಕೋಡಿ ತಾಲೂಕಿನ ಯಕ್ಸಂಬಾ ಗ್ರಾಮದ ನಿವಾಸಿ ತುಕಾರಾಮ ಮಾಳಿ ಎಂಬುವರ ಕುಟುಂಬದಲ್ಲಿ ಕಳೆದ ಒಂದು ವರ್ಷದ ಹಿಂದೆ ಮನೆಯಲ್ಲಿ ಶಾಂತಿ ಇಲ್ಲದೇ ಚಿಕ್ಕಪುಟ್ಟ ವಿಷಯಕ್ಕೆ ಜಗಳವಾಗುತ್ತಿತ್ತಂತೆ. ಹಿರಿಯರು ಶಾಂತಿಗಾಗಿ ಮನೆಯಲ್ಲಿ ಗೋವು ಸಾಕು ಎಂದಾಗ ತುಕಾರಾಮ ಅವರು ವರ್ಷದ ಹಿಂದೆ ಆಕಳನ್ನು ಖರೀದಿ ಮಾಡಿದ್ದಾರೆ. ಕ್ರಮೇಣ ಮನೆಯಲ್ಲಿ ನಡೆಯುತ್ತಿದ್ದ ಸಣ್ಣಪುಟ್ಟ ಜಗಳಗಳು ಬಂದ್ ಆಗುವ ಜೊತೆಗೆ ಆರ್ಥಿಕ ಸ್ಥಿತಿಗತಿ ಕೂಡ ಸುಧಾರಿಸಿದೆ. ಇದನ್ನೆಲ್ಲಾ ನೋಡಿದ ತುಕಾರಾಮ್, ಆಕಳನ್ನು ಮನೆ ಮಗಳಂತೆ ನೋಡಿಕೊಳ್ಳಲು ಆರಂಭಿಸಿದರು. ಅಷ್ಟೇ ಅಲ್ಲದೆ ಇದಕ್ಕೆ ಗೌರಿ ಅಂತಾ ಹೆಸರಿಟ್ಟು, ಪ್ರೀತಿಯಿಂದ ಸಾಕುತ್ತಿದ್ದಾರೆ.
