ನಮ್ಮಲ್ಲಿ ಮಂಚ ಮುರಿಯುವವರು ಇಲ್ಲ, ಬರೀ ನೆಲನೇ ಇರೋದು : ಸಿ.ಎಂ.ಇಬ್ರಾಹಿಂ

ವಲಸೆ ನಾಯಕರು ಮರಳಿ ಕಾಂಗ್ರೆಸ್ ಸೇರ್ಪಡೆ ವಿಚಾರವಾಗಿ ಪ್ರತಿಕ್ರಿಯೆ ನೀಡಿರುವ ಮಾಜಿ ಸಚಿವ ಸಿ. ಎಂ. ಇಬ್ರಾಹಿಂ, ಮಂಚ ಮುರಿಯುವವರು ಕೋರ್ಟ್​ಗೆ ಹೋಗುತ್ತಿದ್ದಾರೆ. ನಮ್ಮಲ್ಲಿ ಮಂಚ ಮುರಿಯೋರು ಇಲ್ಲ.‌ ನೆಲವೇ ಇರೋದು ಎಂದು ವ್ಯಂಗ್ಯವಾಡಿದರು.

ಬೆಳಗಾವಿ : ನಮ್ಮಲ್ಲಿ ಮಂಚ ಮುರಿಯೋರು ಇಲ್ಲ.‌ ಬರೀ ನೆಲನೇ ಇರೋದು ಎಂದು ಮಾಜಿ ಸಚಿವ ಸಿ.ಎಂ.ಇಬ್ರಾಹಿಂ ಮಾರ್ಮಿಕವಾಗಿ ನುಡಿದರು.

ಸುವರ್ಣಸೌಧದಲ್ಲಿ ಮಾತನಾಡಿದ ಅವರು, ಸಿಡಿ ಸಂಬಂಧ ಇಂಜಕ್ಷನ್ ಆರ್ಡರ್ ಪಡೆದ ವಲಸಿಗರು ವಾಪಸ್​​ ಕಾಂಗ್ರೆಸ್​ಗೆ ಮರಳುವ ಬಗ್ಗೆ ಪ್ರತಿಕ್ರಿಯಿಸಿದ ಅವರು, ಮಂಚ ಮುರಿಯುವವರು ಕೋರ್ಟ್​ಗೆ ಹೋಗುತ್ತಿದ್ದಾರೆ. ನಮ್ಮಲ್ಲಿ ಮಂಚ ಮುರಿಯೋರು ಇಲ್ಲ.‌ ನೆಲವೇ ಇರೋದು ಎಂದು ವ್ಯಂಗ್ಯವಾಡಿದರು.

ಸಿದ್ದರಾಮಯ್ಯ ಇಬ್ರಾಹಿಂ ಸಂಭಾಷಣೆ ವೈರಲ್​ : ಕಾಂಗ್ರೆಸ್ ಶಾಸಕಾಂಗ ಸಭೆಯಲ್ಲಿನ ನನ್ನ ಸಂಭಾಷಣೆಯ ವಿಡಿಯೋ ನಿನ್ನೆ ವೈರಲ್ ಆಗಿತ್ತು. ಆ ಬಗ್ಗೆ ಸೈಬರ್ ಕ್ರೈಮ್​ಗೆ ದೂರು ಕೊಡುತ್ತಿದ್ದೇನೆ ಎಂದು ತಿಳಿಸಿದರು. ಅಲ್ಲದೆ, ಅದೊಂದು ನೀಚ ಕೆಲಸ. ಧೈರ್ಯವಾಗಿ ಎದುರಿಸಲು ಶಕ್ತಿ ಇಲ್ಲದವರು ಈ ರೀತಿಯ ಕೆಲಸ ಮಾಡಿದ್ದಾರೆ. ಇದನ್ನು ಯಾರೂ ಮಾಡಿದ್ದಾರೆ ಎಂದು ಗೊತ್ತಿಲ್ಲ. ಬಿಜೆಪಿಯವರೋ, ಸಂಘದವರೋ ತಿಳಿದಿಲ್ಲ. ಹಿಂಬಾಗಿಲಿನಿಂದ ಈ ರೀತಿ ಏಕೆ ಕೆಲಸ ಮಾಡುವುದು ಎಂದು ಪ್ರಶ್ನಿಸಿದರು.

ಧಮ್​ ಇದ್ರೆ ತನಿಖೆ ಮಾಡಿ : ಪರ್ಸೆಂಟೇಜ್ ಪಡೆಯುವ ಬಗ್ಗೆ ನೋಂದಾಯಿತ ಗುತ್ತಿಗೆದಾರರ ಸಂಘ ಆರೋಪ ಮಾಡಿದೆ. ಆರೋಪ ಸುಳ್ಳಿದ್ದರೆ ಗುತ್ತಿಗೆದಾರರ ವಿರುದ್ಧ ಕ್ರಮ ಕೈಗೊಳ್ಳಲಿ. ಇಲ್ಲವಾದರೆ ಒಪ್ಪಿಕೊಳ್ಳಲಿ ಎಂದು ಬೊಮ್ಮಾಯಿಗೆ ಸವಾಲು ಹಾಕುತ್ತೇನೆ. ಮೈದಾನಕ್ಕೆ ಬನ್ನಿ, ಧಮ್ ಇದ್ದರೆ ತನಿಖೆ ಮಾಡಿ ಎಂದು ಸವಾಲು ಹಾಕಿದರು.