ಹೈದರಾಬಾದ್: ಕೋವಿಡ್ ಕಾಲದಲ್ಲಿ ವಲಸೆ ಹೋಗುವುದು ಎಂದರೆ ಬಡವರು ತಮ್ಮ ಸಾಮಾನು ಸರಂಜಾಮುಗಳೊಂದಿಗೆ ವಲಸೆ ಹೋಗುವುದಾಗಿತ್ತು. ಕೊರೊನಾ ಕಡಿಮೆಯಾದಂತೆ ಆ ವಲಸೆ ಪ್ರಕ್ರಿಯೆಗಳು ಕಡಿಮೆಯಾದವು. ಆದರೆ, ವಿವಿಧ ದೇಶಗಳಿಂದ ಅಲ್ಲಿನ ಶ್ರೀಮಂತರು ಇತರ ದೇಶಗಳಿಗೆ ವಲಸೆ ಹೋಗುವುದು ಮಾತ್ರ ದಶಕಗಳಿಂದಲೂ ನಡೆದಿದೆ. ಯಾವೆಲ್ಲ ದೇಶಗಳಿಂದ ಜನ ಯಾವ ದೇಶಗಳಿಗೆ ವಲಸೆ ಹೋಗುತ್ತಿದ್ದಾರೆ ಎಂಬುದನ್ನು ನೋಡೋಣ.
ಶ್ರೀಮಂತರು ಯಾರು.. 10 ಲಕ್ಷ ಅಮೆರಿಕನ್ ಡಾಲರ್ಗಳಷ್ಟು ಅಥವಾ ಅದಕ್ಕೂ ಹೆಚ್ಚು ಸಂಪತ್ತು ಹೊಂದಿರುವವರನ್ನು ಶ್ರೀಮಂತರು ಎನ್ನಲಾಗುತ್ತದೆ.( ಅಂದರೆ ಭಾರತೀಯ ರೂಪಾಯಿ ಲೆಕ್ಕದಲ್ಲಿ 8,11,90,500 ರೂ ಆಗುತ್ತದೆ) ಗ್ಲೋಬಲ್ ಕನ್ಸಲ್ಟಂಟ್ ಹೆನ್ಲೇ ಅಂಡ್ ಪಾರ್ಟನರ್ ಪ್ರಕಾರ ಶ್ರೀಮಂತರ ವಲಸೆ ಈ ವರ್ಷ ಹೆಚ್ಚಾಗಿದೆಯಂತೆ. ಕಳೆದ ಒಂದು ದಶಕದಲ್ಲಿ ಅವರ ವಲಸೆ ಪ್ರಮಾಣ ಹೆಚ್ಚಾಗಿದ್ದರೂ ಕೋವಿಡ್ ಸಮಯದಲ್ಲಿ ಕಡಿಮೆಯಾಗಿತ್ತು.
ಎಲ್ಲಿಂದ ಎಲ್ಲಿಗೆ? : ಜಗತ್ತಿನಲ್ಲಿ ರಷ್ಯಾದಿಂದ (15 ಸಾವಿರ), ಚೀನಾದಿಂದ (10 ಸಾವಿರ) ಮತ್ತು ಭಾರತದಿಂದ (8 ಸಾವಿರ) ಜನ ಬೇರೆ ದೇಶಗಳಿಗೆ ವಲಸೆ ಹೋಗಿದ್ದಾರೆ. ಇವುಗಳ ಜೊತೆಗೆ, ಹಾಂಕಾಂಗ್, ಉಕ್ರೇನ್, ಬ್ರೆಜಿಲ್, ಮೆಕ್ಸಿಕೋ, ಯುನೈಟೆಡ್ ಕಿಂಗ್‌ಡಮ್, ಸೌದಿ ಅರೇಬಿಯಾ ಮತ್ತು ಇಂಡೋನೇಷ್ಯಾದಿಂದ ವಲಸೆ ಹೋದವರ ಸಂಖ್ಯೆ ಕೂಡ ದೊಡ್ಡದಾಗಿದೆ.
ಎಲ್ಲಿಗೆ ಮತ್ತು ಯಾಕೆ?: ಸುಭದ್ರವಾದ ಆರ್ಥಿಕತೆ, ಕಡಿಮೆ ಅಪರಾಧ, ಕನಿಷ್ಠ ತೆರಿಗೆಗಳು ಮತ್ತು ಹೆಚ್ಚಿನ ವ್ಯಾಪಾರ ಅವಕಾಶಗಳನ್ನು ಹೊಂದಿರುವ ದೇಶಗಳಿಗೆ ತೆರಳಲು ಜನ ಒಲವು ತೋರುತ್ತಾರೆ. ಯುನೈಟೆಡ್ ಅರಬ್ ಎಮಿರೇಟ್ಸ್, ಇಸ್ರೇಲ್, ಅಮೆರಿಕ, ಪೋರ್ಚುಗಲ್, ಕೆನಡಾ, ಸಿಂಗಾಪುರ್, ಆಸ್ಟ್ರೇಲಿಯಾ, ನ್ಯೂಜಿಲ್ಯಾಂಡ್, ಗ್ರೀಸ್, ಸ್ವಿಟ್ಜರ್ಲೆಂಡ್ ಮುಂತಾದ ದೇಶಗಳಿಗೆ ಇತರ ದೇಶಗಳಿಂದ ಶ್ರೀಮಂತರ ವಲಸೆ ಹೋಗಿದ್ದಾರೆ.
ಇವುಗಳ ಜೊತೆಗೆ ಮಾಲ್ಟಾ, ಮಾರಿಷಸ್ ಮತ್ತು ಮೊನಾಕೊ ದೇಶಗಳಿಗೂ ಜನ ವಲಸೆ ಹೋಗಿದ್ದಾರೆ. ಎಲ್ಲಕ್ಕಿಂತ ಹೆಚ್ಚಾಗಿ, 4,000 ಜನರು ಯುನೈಟೆಡ್ ಅರಬ್ ಎಮಿರೇಟ್ಸ್‌ಗೆ ಮತ್ತು 2,800 ಜನರು ಸಿಂಗಾಪುರಕ್ಕೆ ವಲಸೆ ಹೋಗುವ ನಿರೀಕ್ಷೆಯಿದೆ. ಅವರಲ್ಲಿ ಹೆಚ್ಚಿನವರು ರಷ್ಯಾ, ಭಾರತ, ಆಫ್ರಿಕಾ ಮತ್ತು ಮಧ್ಯ ಏಷ್ಯಾದವರು. ಕೋವಿಡ್‌ಗೆ ಒಂದು ವರ್ಷ ಮೊದಲು ಸಾವಿರಾರು ಶ್ರೀಮಂತ ವಲಸಿಗರನ್ನು ಕಂಡ ಯುಎಇ ಈ ಬಾರಿ ಹೆಚ್ಚು ಜನರನ್ನು ಆಕರ್ಷಿಸುತ್ತಿದೆ.
ಭಾರತದ ಶ್ರೀಮಂತರ ಪಟ್ಟಿಗೆ ವಲಸಿಗರಿಗಿಂತ ಹೊಸಬರ ಸಂಖ್ಯೆ ಪ್ರತಿ ವರ್ಷ ಹೆಚ್ಚುತ್ತಿದೆ. 2031ರ ವೇಳೆಗೆ ಭಾರತದಲ್ಲಿ ಇವರ ಸಂಖ್ಯೆ ದೊಡ್ಡ ಪ್ರಮಾಣದಲ್ಲಿರಲಿದೆ ಎಂದು ವರದಿಗಳು ಹೇಳಿವೆ.
ಇದನ್ನೂ ಓದಿ: ಕರಾವಳಿಯಲ್ಲಿ ನಡೆಯಬೇಕಿದೆ ಹೊರ ರಾಜ್ಯದ ವಲಸೆ ಕಾರ್ಮಿಕರ ತಪಾಸಣಾ ಕಾರ್ಯ
