ಹೈದರಾಬಾದ್: ರಾತ್ರಿ ರೈಲಿನಲ್ಲಿ ಪ್ರಯಾಣಿಸುವಾಗ ಕೆಲವೊಮ್ಮೆ ಬೆಳ್ಳಂಬೆಳಗ್ಗೆಯೇ ಇಳಿಯಬೇಕಾಗಿ ಬರುತ್ತದೆ. ನಮ್ಮ ಗಮ್ಯಸ್ಥಾನ ಕೊನೆಯ ನಿಲ್ದಾಣವಾಗಿದ್ದರೆ ಪರವಾಗಿಲ್ಲ. ಅದಕ್ಕೂ ಮೊದಲಾಗಿದ್ದರೆ ನಿದ್ದೆ ಮಾಡುವಾಗ ನಿಲ್ದಾಣ ದಾಟಿ ಹೋಗುವ ಸಾಧ್ಯತೆ ಇರುತ್ತದೆ. ಇದನ್ನು ತಪ್ಪಿಸಲು ಪ್ರಯಾಣಿಕರಿಗಾಗಿ ರೈಲ್ವೆ ಇಲಾಖೆ 'ವೇಕಪ್ ಅಲರಾಂ' ಸೇವೆಯನ್ನು ಆರಂಭಿಸಿದೆ. ಇದು ಪ್ರಯಾಣಿಕರನ್ನು ಎಚ್ಚರಿಸುವ ಕರೆಗಂಟೆಯಂತೆ ಕೆಲಸ ಮಾಡುತ್ತದೆ.
ಬೋರ್ಡಿಂಗ್ ನಿಲ್ದಾಣವನ್ನು ದಾಟದಂತೆ ಪ್ರಯಾಣಿಕರ ನೆರವಿಗಾಗಿ ಐಆರ್ಸಿಟಿಸಿ 139 ಎಂಬ ಸಹಾಯವಾಣಿ ಮಾದರಿಯ ಸೇವೆಯನ್ನು ಪ್ರಾರಂಭಿಸಿದೆ. ಇದಕ್ಕೆ ಮೊದಲೇ ಕರೆ ಮಾಡಿ ತಾವು ಇಳಿಯಬೇಕಾದ ನಿಲ್ದಾಣದ ಬಗ್ಗೆ ನಮೂದಿಸಿದರೆ, ಅವರ ಮೊಬೈಲ್ಗೆ ಕರೆ ರೀತಿಯ ಗಂಟೆ ಮೊಳಗಿ 20 ನಿಮಿಷಗಳ ಮುಂಚೆಯೇ ಎಚ್ಚರ ಮಾಡುತ್ತದೆ.
ಈ ಅಲರ್ಟ್ ಪಡೆಯುವುದು ಹೇಗೆ?: ವೇಕಪ್ ಅಲಾರಂ ವೈಶಿಷ್ಟ್ಯವನ್ನು ಪಡೆಯಲು ಪ್ರಯಾಣಿಕರು ಮೊದಲು ತಮ್ಮ ಫೋನ್‌ನಿಂದ ಐಆರ್ಸಿಟಿಸಿ ಸಂಖ್ಯೆ 139 ಗೆ ಕರೆ ಮಾಡಬೇಕು. ಬಳಿಕ ಗಮ್ಯಸ್ಥಾನದ ಎಚ್ಚರಿಕೆಯನ್ನು ನಮೂದಿಸಬೇಕು. ನಂತರ ಅದು ನಿಮ್ಮ 10 ಅಂಕಿಗಳ ಪಿಎನ್ಆರ್ ಸಂಖ್ಯೆಯನ್ನು ಕೇಳುತ್ತದೆ. PNR ಅನ್ನು ಪರಿಶೀಲಿಸಲು 1 ಅನ್ನು ಡಯಲ್ ಮಾಡಬೇಕಾಗಿದೆ.
ಈ ಪ್ರಕ್ರಿಯೆ ಪೂರ್ಣಗೊಂಡಾಗ, ಪಿಎನ್ಆರ್ ಸಂಖ್ಯೆ ಮತ್ತು ಗಮ್ಯಸ್ಥಾನದ ಎಚ್ಚರಿಕೆಯನ್ನು ದೃಢೀಕರಿಸುವ ಸಂದೇಶವನ್ನು ಕಳುಹಿಸಲಾಗುತ್ತದೆ. ನೀವು ಗಮ್ಯಸ್ಥಾನವನ್ನು ತಲುಪುವ 20 ನಿಮಿಷಗಳ ಮೊದಲು ನಿಮ್ಮ ಫೋನ್‌ಗೆ ಕರೆ ರೂಪದಲ್ಲಿ ಎಚ್ಚರಿಕೆಯನ್ನು ಪಡೆಯುವಿರಿ. ಪ್ರಸ್ತುತ ಐಆರ್ಸಿಟಿಸಿ ಈ ಸೌಲಭ್ಯವನ್ನು ರಾತ್ರಿ 11 ರಿಂದ ಬೆಳಗ್ಗೆ 7 ರವರೆಗೆ ಲಭ್ಯವಾಗುವಂತೆ ಮಾಡಿದೆ.
ಕರೆ ಮಾಡುವ ಮೂಲಕವಲ್ಲದೇ, ALERT ಎಂದು ಟೈಪ್ ಮಾಡಿ PNR ಸಂಖ್ಯೆಯನ್ನು ನಮೂದಿಸಿ 139 ಗೆ ಸಂದೇಶ ಕಳುಹಿಸುವ ಮೂಲಕವೂ ವೇಕಪ್ ಅಲಾರಂ ಸೌಲಭ್ಯವನ್ನು ಪಡೆಯಬಹುದು.
ಓದಿ: ಟೀ ಅಂಗಡಿಯಲ್ಲಿ ಸೋಲಾರ್ ಪ್ಯಾನಲ್‌ ಅಳವಡಿಕೆ: ತಿಂಗಳಿಗೆ ಭಾರಿ ಹಣ ಉಳಿಸುತ್ತಿದ್ದಾನೆ ಚಾಯ್ ವಾಲಾ
