ನವದೆಹಲಿ : 2023 ರ ಅಂತ್ಯದ ವೇಳೆಗೆ ಭಾರತದ ಮುಂಬೈ ಷೇರುಪೇಟೆ ಸಂವೇದಿ ಸೂಚ್ಯಂಕ ಸೆನ್ಸೆಕ್ಸ್ ಅತ್ಯಂತ ಕನಿಷ್ಠ ಸನ್ನಿವೇಶಗಳಲ್ಲಿ 68,500 ಅಂಶಗಳ ಆಸುಪಾಸಿನಲ್ಲಿ ಇರಬಹುದೆಂದು ಮಾರುಕಟ್ಟೆ ವಿಶ್ಲೇಷಕ ಕಂಪನಿ ಮಾರ್ಗನ್ ಸ್ಟಾನ್ಲಿ ಹೇಳಿದೆ. ಸದ್ಯದ ಮಾರುಕಟ್ಟೆ ಮಟ್ಟದಿಂದ ಇದು ಶೇ 10ರಷ್ಟು ಏರಿಕೆಯಾಗಿದೆ. ವಿಶೇಷವಾಗಿ ತೈಲ ಮತ್ತು ರಸಗೊಬ್ಬರ, ಸ್ಥಿರವಾದ ದೇಶೀಯ ಬೆಳವಣಿಗೆ, ಅಮೆರಿಕ ಆರ್ಥಿಕ ಹಿಂಜರಿತಕ್ಕೆ ಜಾರುವುದಿಲ್ಲ ಎಂಬ ನಿರೀಕ್ಷೆ, ಸರಕುಗಳ ಬೆಲೆಗಳಲ್ಲಿ ಯಾವುದೇ ಪ್ರಮುಖ ಏರಿಕೆಯಾಗುವುದಿಲ್ಲ ಎಂಬ ನಿರೀಕ್ಷೆ ಮತ್ತು ಭಾರತದಲ್ಲಿ ಸರ್ಕಾರದ ಬೆಂಬಲಿತ ನೀತಿ ಈ ಎಲ್ಲ ವಿಷಯಗಳನ್ನು ಗಣನೆಗೆ ತೆಗೆದುಕೊಂಡು ಇದನ್ನು ಊಹಿಸಲಾಗಿದೆ.
ಬೆಂಚ್‌ಮಾರ್ಕ್ ಸೂಚ್ಯಂಕದ 25 ವರ್ಷದ ಸರಾಸರಿ 20 ಪಟ್ಟು ಹೋಲಿಸಿದರೆ 20.5 ಪಟ್ಟು ಗಳಿಕೆಗೆ (P/E) ಟ್ರೇಲಿಂಗ್ ಬೆಲೆಯಲ್ಲಿ ವ್ಯಾಪಾರವನ್ನು ಮಾರ್ಗನ್ ಸ್ಟಾನ್ಲಿ ನಿರೀಕ್ಷಿಸಿದೆ. "ಐತಿಹಾಸಿಕ ಸರಾಸರಿಗಿಂತ ಹೆಚ್ಚಿನ ಪ್ರೀಮಿಯಂ ಮಧ್ಯಮ ಅವಧಿಯ ಬೆಳವಣಿಗೆಯಲ್ಲಿ ಹೆಚ್ಚಿನ ವಿಶ್ವಾಸವನ್ನು ಪ್ರತಿಬಿಂಬಿಸುತ್ತದೆ" ಎಂದು ಮಾರ್ಗನ್ ಸ್ಟಾನ್ಲಿ ತನ್ನ 'ಇಂಡಿಯಾ ಇಕ್ವಿಟಿ ಸ್ಟ್ರಾಟಜಿ ಪ್ಲೇಬುಕ್: ಇಂಡಿಯಾಸ್ ಟ್ರಾನ್ಸ್‌ಫರ್ಮೇಷನ್ ಅಂಡ್ ಇಟ್ಸ್ ಇಂಪ್ಲಿಕೇಶನ್ಸ್' ಎಂಬ ಶೀರ್ಷಿಕೆಯ ವರದಿಯಲ್ಲಿ ಹೇಳಿದೆ. ರಿದಮ್ ದೇಸಾಯಿ, ಶೀಲಾ ರಥಿ, ನಯಂತ್ ಪರೇಖ್ ಈ ವರದಿ ಸಿದ್ಧಪಡಿಸಿದ್ದಾರೆ.
ಅತ್ಯಧಿಕ ಗಳಿಕೆಯ ಬೆಳವಣಿಗೆಯ ನಿರೀಕ್ಷೆಗಳು ಮತ್ತು ದೇಶೀಯ ಮತ್ತು ವಿದೇಶಿ ಹೂಡಿಕೆದಾರರಿಂದ ಹೆಚ್ಚಾಗುವ ಬೇಡಿಕೆಯಿಂದಾಗಿ ತುಲನಾತ್ಮಕವಾಗಿ ಹೆಚ್ಚಿನ ಮೌಲ್ಯಮಾಪನಗಳ ಹೊರತಾಗಿಯೂ ಈಕ್ವಿಟಿ ಮಾರುಕಟ್ಟೆಯು ಆಕರ್ಷಕವಾಗಿ ಮುಂದುವರಿಯುತ್ತದೆ. ಸದ್ಯ ಸೆನ್ಸೆಕ್ಸ್ 62,629 ಅಂಶಗಳಲ್ಲಿ ವಹಿವಾಟು ನಡೆಸುತ್ತಿದೆ. ಸೆನ್ಸೆಕ್ಸ್ ಇದುವರೆಗೆ ಈ ವರ್ಷ ಮತ್ತು ಕಳೆದ ವರ್ಷ ಕ್ರಮವಾಗಿ ಶೇ 2.4 ಮತ್ತು ಶೇ 12.5ರಷ್ಟು ಏರಿಕೆಯಾಗಿದೆ.
ಈಕ್ವಿಟಿ ಮಾರುಕಟ್ಟೆ ಎಂಬುದು ಷೇರು ಮಾರುಕಟ್ಟೆಯಾಗಿದ್ದು, ಇದರಲ್ಲಿ ಕಂಪನಿಗಳ ಷೇರುಗಳನ್ನು ವಿನಿಮಯ ಅಥವಾ ಪ್ರತ್ಯಕ್ಷ ಮಾರುಕಟ್ಟೆಗಳ ಮೂಲಕ ವಿತರಿಸಲಾಗುತ್ತದೆ ಮತ್ತು ವ್ಯಾಪಾರ ಮಾಡಲಾಗುತ್ತದೆ. ಸ್ಟಾಕ್ ಮಾರುಕಟ್ಟೆ ಎಂದೂ ಕರೆಯಲ್ಪಡುವ ಇದು ಮಾರುಕಟ್ಟೆ ಆರ್ಥಿಕತೆಯ ಅತ್ಯಂತ ಪ್ರಮುಖ ಕ್ಷೇತ್ರಗಳಲ್ಲಿ ಒಂದಾಗಿದೆ. ಇದು ಕಂಪನಿಗಳಿಗೆ ತಮ್ಮ ವ್ಯವಹಾರವನ್ನು ಬೆಳೆಸಲು ಬಂಡವಾಳ ಕ್ರೋಢೀಕರಣಕ್ಕೆ ಅವಕಾಶ ನೀಡುತ್ತದೆ.
ಮಾರ್ಗನ್ ಸ್ಟಾನ್ಲಿ ಇದು ಹೂಡಿಕೆ ಬ್ಯಾಂಕ್ ಮತ್ತು ಹಣಕಾಸು ಸೇವೆಗಳ ಕಂಪನಿಯಾಗಿದ್ದು, ಪ್ರಸ್ತುತ ರೂಪದಲ್ಲಿ ಮೂಲ ಮಾರ್ಗನ್ ಸ್ಟಾನ್ಲಿ ಕಂಪನಿ ಮತ್ತು ಡೀನ್ ವಿಟ್ಟರ್ ಡಿಸ್ಕವರ್ & ಕಂ ನಡುವಿನ 1997 ರ ವಿಲೀನದ ನಂತರ ಸ್ಥಾಪನೆಯಾಗಿರುವ ಕಂಪನಿಯಾಗಿದೆ. ಮೋರ್ಗನ್ ಸ್ಟಾನ್ಲಿ 42 ದೇಶಗಳಲ್ಲಿ ಕಚೇರಿಗಳನ್ನು ಹೊಂದಿದ್ದು, 60,000 ಜನ ಉದ್ಯೋಗಿಗಳಿದ್ದಾರೆ. ಕಂಪನಿಯು ಮೂಲಭೂತವಾಗಿ ಸಂಪತ್ತು ನಿರ್ವಹಣೆ, ಹೂಡಿಕೆ ನಿರ್ವಹಣೆ ಮತ್ತು ಸಾಂಸ್ಥಿಕ ಭದ್ರತೆಗಳಲ್ಲಿ ವ್ಯವಹರಿಸುತ್ತದೆ. ಆದರೆ ಇತ್ತೀಚಿನ ವರ್ಷಗಳಲ್ಲಿ ಇದು ತನ್ನ ಆದಾಯದ ಮುಖ್ಯ ಮೂಲವಾಗಿ ಸಂಪತ್ತು ನಿರ್ವಹಣೆ ವಿಭಾಗವನ್ನು ಅವಲಂಬಿಸಿದೆ. ವ್ಯಕ್ತಿಗಳು, ಕುಟುಂಬಗಳು, ಸಂಸ್ಥೆಗಳು ಮತ್ತು ಸರ್ಕಾರಗಳು ತಮ್ಮ ಗುರಿಗಳನ್ನು ಸಾಧಿಸಲು ಅಗತ್ಯವಿರುವ ಬಂಡವಾಳವನ್ನು ಸಂಗ್ರಹಿಸಲು, ನಿರ್ವಹಿಸಲು ಮತ್ತು ವಿತರಿಸಲು ಮೋರ್ಗನ್ ಸ್ಟಾನ್ಲಿ ಸಹಾಯ ಮಾಡುತ್ತದೆ.
ಇದನ್ನೂ ಓದಿ : ಅಪಘಾತ ಸಂತ್ರಸ್ತರಿಗೆ ರಿಲಯನ್ಸ್ ಫೌಂಡೇಶನ್ ನೆರವು: 10 ಅಂಶಗಳ ಯೋಜನೆ ಜಾರಿ
