ಸ್ಯಾನ್ ಫ್ರಾನ್ಸಿಸ್ಕೋ : ಪ್ರಸ್ತುತ ದೇಶದಲ್ಲಿ ಸುಮಾರು 65 ಲಕ್ಷ ಚಂದಾದಾರರನ್ನು ಹೊಂದಿರುವ ಸ್ಟ್ರೀಮಿಂಗ್ ದೈತ್ಯ ನೆಟ್ ಫ್ಲಿಕ್ಸ್ ತನ್ನ ಪ್ರಮುಖ ಮಾರುಕಟ್ಟೆಯಾಗಿರುವ ಭಾರತದಲ್ಲಿ ವ್ಯವಹಾರವನ್ನು ವಿಸ್ತರಿಸುವಲ್ಲಿ ಯಶಸ್ವಿಯಾಗಿಲ್ಲ ಎಂದು ವರದಿಯಾಗಿದೆ. ಭಾರತದಲ್ಲಿ ನೆಟ್ಫ್ಲಿಕ್ಸ್ ನ ನಿಧಾನಗತಿಯ ಬೆಳವಣಿಗೆಗೆ ಮುಖ್ಯವಾಗಿ ಸ್ಥಳೀಯ ಕಂಟೆಂಟ್ (ಲೋಕಲ್ ಕಂಟೆಂಟ್) ಕೊರತೆಯೇ ಕಾರಣ ಎಂದು ಜಾಗತಿಕ ಆಸ್ತಿ ನಿರ್ವಹಣಾ ಸಂಸ್ಥೆ ಅಲಯನ್ಸ್ ಬರ್ನ್ ಸ್ಟೀನ್ ವಿಶ್ಲೇಷಕರನ್ನು ಉಲ್ಲೇಖಿಸಿ ಟೆಕ್ ಕ್ರಂಚ್ ಶುಕ್ರವಾರ ವರದಿ ಮಾಡಿದೆ.
ಭಾರತದಲ್ಲಿ ನೆಟ್ಫ್ಲಿಕ್ಸ್ನಲ್ಲಿ ಲಭ್ಯವಿರುವ ಕಂಟೆಂಟ್ ಅಥವಾ ವೀಡಿಯೊಗಳ ಪೈಕಿ ಕೇವಲ 12 ರಷ್ಟು ಮಾತ್ರ ಲೋಕಲ್ ಕಂಟೆಂಟ್ ಆಗಿದೆ ಎಂದು ವಿಶ್ಲೇಷಕರು ಹೇಳಿದ್ದಾರೆ. ಇದಕ್ಕೆ ಹೋಲಿಸಿದರೆ, ಅಮೆಜಾನ್ ಪ್ರೈಮ್ ವಿಡಿಯೋದ ಸುಮಾರು ಶೇಕಡಾ 60 ರಷ್ಟು ಕಂಟೆಂಟ್ ದೇಶದ ಸ್ಥಳೀಯ ಭಾಷೆಗಳಲ್ಲಿವೆ. ಪ್ರೈಮ್ ವಿಡಿಯೋ ಭಾರತದಲ್ಲಿ ಸುಮಾರು 2 ಕೋಟಿ ಚಂದಾದಾರರನ್ನು ಹೊಂದಿದೆ ಮತ್ತು ಡಿಸ್ನಿ + ಹಾಟ್ಸ್ಟಾರ್ 40 ದಶಲಕ್ಷಕ್ಕೂ ಹೆಚ್ಚು ಚಂದಾದಾರರೊಂದಿಗೆ ಮಾರುಕಟ್ಟೆಯಲ್ಲಿ ಪ್ರಾಬಲ್ಯವನ್ನು ಮುಂದುವರಿಸಿದೆ ಎಂದು ವರದಿ ತಿಳಿಸಿದೆ.
ಹಾಲಿವುಡ್ ಮುಷ್ಕರದ ಸಮಯದಲ್ಲಿ ಕಳೆದುಹೋದ ಆದಾಯವನ್ನು ಸರಿದೂಗಿಸಲು ಸ್ಟ್ರೀಮಿಂಗ್ ದೈತ್ಯ ನೆಟ್ ಫ್ಲಿಕ್ಸ್ ತನ್ನ ಸ್ಟ್ರೀಮಿಂಗ್ ಸೇವೆಯ ಬೆಲೆಯನ್ನು ಮತ್ತೆ ಹೆಚ್ಚಿಸಲು ಯೋಜಿಸುತ್ತಿದೆ ಎಂದು ಮಾಧ್ಯಮ ವರದಿಯೊಂದು ತಿಳಿಸಿದೆ.
ಭಾರತದಲ್ಲಿನ ಯಶಸ್ಸಿನಿಂದ ಪಾಠ ಕಲಿತ ನೆಟ್ಫ್ಲಿಕ್ಸ್ ಮೊದಲ ತ್ರೈಮಾಸಿಕದಲ್ಲಿ ಮತ್ತೆ 116 ದೇಶಗಳಲ್ಲಿ ಬೆಲೆಗಳನ್ನು ಕಡಿಮೆ ಮಾಡಿದೆ. ನೆಟ್ಫ್ಲಿಕ್ಸ್ ಎರಡನೇ ತ್ರೈಮಾಸಿಕದಲ್ಲಿ (ಕ್ಯೂ 2) ಜಾಗತಿಕವಾಗಿ 5.9 ಮಿಲಿಯನ್ ಚಂದಾದಾರರನ್ನು ಸೇರಿಸಿದೆ. ಯುಎಸ್ ಮತ್ತು ಕೆನಡಾದಲ್ಲಿ ಏಪ್ರಿಲ್-ಜೂನ್ ಅವಧಿಯಲ್ಲಿ 1.17 ಮಿಲಿಯನ್ ಹೊಸ ಸದಸ್ಯರನ್ನು ಸೇರಿಸಿಕೊಂಡಿದೆ.
ನೆಟ್ಫ್ಲಿಕ್ಸ್ ಚಂದಾದಾರಿಕೆ ಸೇವೆಯಾಗಿದ್ದು, ಹಣ ಪಾವತಿಸಿ ಇದನ್ನು ಬಳಸಬಹುದು. ನೀವು ಆಯ್ಕೆ ಮಾಡುವ ಚಂದಾದಾರಿಕೆ ಯೋಜನೆಯನ್ನು ಅವಲಂಬಿಸಿ, ನೀವು ಒಂದೇ ಸಮಯದಲ್ಲಿ ಅನೇಕ ಸಾಧನಗಳಲ್ಲಿ ನೆಟ್ಫ್ಲಿಕ್ಸ್ ವೀಕ್ಷಿಸಬಹುದು. ಅದರಂತೆ ವಿಭಿನ್ನ ಗುಣಮಟ್ಟದ ಸೆಟ್ಟಿಂಗ್ ಗಳಲ್ಲಿ ಕಂಟೆಂಟ್ ಅನ್ನು ವೀಕ್ಷಿಸಲು ನೀವು ಆಯ್ಕೆ ಮಾಡಬಹುದು. ಸ್ಟ್ಯಾಂಡರ್ಡ್, ಹೈ ಮತ್ತು 4 ಕೆ ಅಲ್ಟ್ರಾ ಎಚ್ ಡಿ ಗುಣಮಟ್ಟದಲ್ಲಿ ನೀವು ಕಂಟೆಂಟ್ ನೋಡಬಹುದು. ನೆಟ್ಫ್ಲಿಕ್ಸ್ 1997 ರಲ್ಲಿ ಅಂಚೆ ಮೂಲಕ ಡಿವಿಡಿಗಳನ್ನು ಬಾಡಿಗೆಗೆ ನೀಡುವ ಪರಿಕಲ್ಪನೆಯನ್ನು ಪ್ರವರ್ತಿಸಿದ ಕಂಪನಿಯಾಗಿ ಪ್ರಾರಂಭವಾಯಿತು.
ಇದನ್ನೂ ಓದಿ : ಅರ್ಬನ್ ಬ್ಯಾಂಕ್ಗಳ ಬುಲೆಟ್ ಚಿನ್ನದ ಸಾಲಮಿತಿ 4 ಲಕ್ಷಕ್ಕೆ ದ್ವಿಗುಣ
