ನವದೆಹಲಿ : ಈ ವರ್ಷದ ಜುಲೈನಲ್ಲಿಯೂ ಭಾರತಕ್ಕೆ ಎಫ್ಪಿಐ (Foreign portfolio investment -FPI) ಹೂಡಿಕೆ ಹರಿವು ಅವ್ಯಾಹತವಾಗಿ ಮುಂದುವರಿದಿದೆ. ಉದಯೋನ್ಮುಖ ಮಾರುಕಟ್ಟೆಗಳಲ್ಲಿ ಭಾರತವು ಎಫ್ಪಿಐ ಹರಿವಿನ YTDಯನ್ನು ಅತಿ ಹೆಚ್ಚು ಸ್ವೀಕರಿಸುವ ದೇಶವಾಗಿದೆ ಎಂದು ಜಿಯೋಜಿತ್ ಫೈನಾನ್ಷಿಯಲ್ ಸರ್ವಿಸಸ್‌ನ ಮುಖ್ಯ ಹೂಡಿಕೆ ತಂತ್ರಜ್ಞ ವಿಕೆ ವಿಜಯಕುಮಾರ್ ಹೇಳಿದ್ದಾರೆ.
ಜುಲೈ 21ರವರೆಗೆ ಎಫ್ಪಿಐಗಳು ಭಾರತದಲ್ಲಿ 43,804 ಕೋಟಿ ರೂ. ಹೂಡಿಕೆ ಮಾಡಿದ್ದಾರೆ. ಷೇರು ಮಾರುಕಟ್ಟೆಗಳು, ಪ್ರಾಥಮಿಕ ಮಾರುಕಟ್ಟೆ ಮತ್ತು ಬೃಹತ್ ವ್ಯವಹಾರಗಳಲ್ಲಿ ಇಷ್ಟೊಂದು ಮೊತ್ತದ ಹೂಡಿಕೆಯನ್ನು ಎಫ್ಪಿಐಗಳು ಭಾರತದಲ್ಲಿ ಮಾಡಿದ್ದಾರೆ.
ಎಫ್ಪಿಐಗಳು ಹಣಕಾಸು, ಆಟೋಮೊಬೈಲ್‌ಗಳು, ಬಂಡವಾಳ ಸರಕುಗಳು, ರಿಯಾಲ್ಟಿ ಮತ್ತು ಎಫ್‌ಎಂಸಿಜಿಯಲ್ಲಿ ಹೂಡಿಕೆ ಮಾಡುವುದನ್ನು ಮುಂದುವರಿಸಲಿದ್ದಾರೆ. ಈ ವಲಯಗಳಲ್ಲಿನ ಎಫ್ಪಿಐ ಖರೀದಿಯು ಈ ವಿಭಾಗಗಳಲ್ಲಿನ ಷೇರುಗಳ ಬೆಲೆ ಏರಿಕೆಗೆ ಮತ್ತು ಸೆನ್ಸೆಕ್ಸ್ ಮತ್ತು ನಿಫ್ಟಿ ದಾಖಲೆಯ ಗರಿಷ್ಠ ಏರಿಕೆಗೆ ಭಾರಿ ಕೊಡುಗೆ ನೀಡಿದೆ ಎಂದು ವಿ.ಕೆ.ವಿಜಯಕುಮಾರ್ ಹೇಳಿದರು.
ಆದಾಗ್ಯೂ ಹೆಚ್ಚುತ್ತಿರುವ ಮೌಲ್ಯಮಾಪನಗಳು ಆತಂಕದ ವಿಷಯವಾಗಿದೆ. ಹೆಚ್ಚಿನ ಮೌಲ್ಯಮಾಪನಗಳಲ್ಲಿ ಕೆಲವು ನಕಾರಾತ್ಮಕ ಪ್ರಚೋದಕಗಳು ಮಾರುಕಟ್ಟೆಯು ತೀವ್ರಗತಿಯಲ್ಲಿ ಕುಸಿಯಲು ಕಾರಣವಾಗಬಹುದು. ಶುಕ್ರವಾರ ಇನ್ಫೋಸಿಸ್ ಮತ್ತು ಎಚ್‌ಯುಎಲ್‌ನಿಂದ ಬಂದ ಋಣಾತ್ಮಕ ಸುದ್ದಿಗಳಿಂದ ಸೆನ್ಸೆಕ್ಸ್ 887 ಪಾಯಿಂಟ್‌ಗಳಷ್ಟು ಕುಸಿದಿತ್ತು. ಆವಾಗ ಇಂಥದೇ ನಕಾರಾತ್ಮಕ ಪರಿಸ್ಥಿತಿ ಸೃಷ್ಟಿಯಾಗಿತ್ತು ಎಂದು ಅವರು ಹೇಳಿದರು.
ಏಪ್ರಿಲ್ 2022 ರ ನಂತರ US ಡಾಲರ್ ಇಂಡೆಕ್ಸ್ (DXY) ಮೊದಲ ಬಾರಿಗೆ $100 ಕ್ಕಿಂತ ಕಡಿಮೆಯಾಗಿದೆ. ಡಾಲರ್ ಸೂಚ್ಯಂಕ ಕುಸಿದಾಗ ಭಾರತೀಯ ರೂಪಾಯಿ ಮೌಲ್ಯಯುತವಾಗುತ್ತದೆ ಮತ್ತು ಡಾಲರ್ ದುರ್ಬಲಗೊಳ್ಳುತ್ತದೆ. ಇದು FII ಮತ್ತು FPI ಗಳಿಂದ ಹೆಚ್ಚಿನ ನಿಧಿ ಹರಿವಿಗೆ ಕಾರಣವಾಗುತ್ತದೆ. ಭಾರೀ ಒಳಹರಿವು ಮಾರುಕಟ್ಟೆಯನ್ನು ಎತ್ತರಕ್ಕೇರಿಸಲು ಸಹಾಯ ಮಾಡುತ್ತದೆ ಎಂದು ಎಸ್ಬಿಐ ಸೆಕ್ಯುರಿಟೀಸ್ ವರದಿಯಲ್ಲಿ ತಿಳಿಸಿದೆ.
ವಿದೇಶಿ ಬಂಡವಾಳ ಹೂಡಿಕೆ (FPI) ಎಂಬುದು ಮತ್ತೊಂದು ದೇಶದಲ್ಲಿ ಹೂಡಿಕೆದಾರರು ಹೊಂದಿರುವ ಸೆಕ್ಯೂರಿಟೀಸ್ ಮತ್ತು ಇತರ ಹಣಕಾಸು ಸ್ವತ್ತುಗಳನ್ನು ಒಳಗೊಂಡಿರುತ್ತದೆ. ಇದು ಹೂಡಿಕೆದಾರರಿಗೆ ಕಂಪನಿಯ ಸ್ವತ್ತುಗಳ ನೇರ ಮಾಲೀಕತ್ವವನ್ನು ಒದಗಿಸುವುದಿಲ್ಲ ಮತ್ತು ಮಾರುಕಟ್ಟೆಯ ಚಂಚಲತೆಯನ್ನು ಅವಲಂಬಿಸಿ ತುಲನಾತ್ಮಕವಾಗಿ ಪರಿವರ್ತನೆಯಾಗುತ್ತಿರುತ್ತದೆ. ವಿದೇಶಿ ನೇರ ಹೂಡಿಕೆ (FDI) ಜೊತೆಗೆ, FPI ಸಾಗರೋತ್ತರ ಆರ್ಥಿಕತೆಯಲ್ಲಿ ಹೂಡಿಕೆ ಮಾಡುವ ಸಾಮಾನ್ಯ ವಿಧಾನಗಳಲ್ಲಿ ಒಂದಾಗಿದೆ. ಎಫ್‌ಡಿಐ ಮತ್ತು ಎಫ್ಪಿಐ ಎರಡೂ ಆರ್ಥಿಕತೆಗಳಿಗೆ ಹಣಕಾಸು ನಿಧಿಯ ಪ್ರಮುಖ ಮೂಲಗಳಾಗಿವೆ.
ಎಫ್ಪಿಐ ಹಿಡುವಳಿಗಳು ಷೇರುಗಳು, ಎಡಿಆರ್‌ಗಳು, ಜಿಡಿಆರ್‌ಗಳು, ಬಾಂಡ್‌ಗಳು, ಮ್ಯೂಚುಯಲ್ ಫಂಡ್‌ಗಳು ಮತ್ತು ಎಕ್ಸ್‌ಚೇಂಜ್ ಟ್ರೇಡೆಡ್ ಫಂಡ್‌ಗಳನ್ನು ಒಳಗೊಂಡಿರಬಹುದು. ವಿದೇಶಿ ನೇರ ಹೂಡಿಕೆ (FDI) ಜೊತೆಗೆ FPI ಹೂಡಿಕೆದಾರರು ಸಾಗರೋತ್ತರ ಆರ್ಥಿಕತೆಯಲ್ಲಿ ಪಾಲುದಾರರಾಗುವ ಸಾಮಾನ್ಯ ಮಾರ್ಗಗಳಲ್ಲಿ ಒಂದಾಗಿದೆ. ಹೊರಗಿನ ದೇಶದಲ್ಲಿ ಬಂಡವಾಳ ಹೂಡಲು ಆಸಕ್ತಿ ಹೊಂದಿರುವ ವೈಯಕ್ತಿಕ ಹೂಡಿಕೆದಾರರು ಹೆಚ್ಚಾಗಿ FPI ಮೂಲಕ ಹೂಡಿಕೆ ಮಾಡುತ್ತಾರೆ.
ಇದನ್ನೂ ಓದಿ : iPhoneನ 5ನೇ ಅತಿದೊಡ್ಡ ಮಾರುಕಟ್ಟೆ ಭಾರತ: ಶೇ 68ರಷ್ಟು ಮಾರಾಟ ವೃದ್ಧಿ
