ನವದೆಹಲಿ: ಭಾರತದ ಷೇರು ಮಾರುಕಟ್ಟೆಯಲ್ಲಿ ಎಫ್ಐಐಗಳು ಕಳೆದ ಎರಡು ವಾರಗಳಲ್ಲಿ ಬೃಹತ್ ಖರೀದಿ ಸೇರಿದಂತೆ ಸುಮಾರು 20,000 ಕೋಟಿ ರೂ. ಗಳನ್ನು ಹೂಡಿಕೆ ಮಾಡುವ ಮೂಲಕ ದೊಡ್ಡ ಖರೀದಿದಾರರಾಗಿ ಮಾರ್ಪಟ್ಟಿದ್ದಾರೆ ಎಂದು ಜಿಯೋಜಿತ್ ಫೈನಾನ್ಷಿಯಲ್ ಸರ್ವೀಸಸ್ನ ಮುಖ್ಯ ಹೂಡಿಕೆ ತಂತ್ರಜ್ಞ ವಿ.ಕೆ. ವಿಜಯ ಕುಮಾರ್ ಹೇಳಿದ್ದಾರೆ.
ಬ್ಯಾಂಕಿಂಗ್ ಮತ್ತು ಐಟಿಯಂಥ ವಿಭಾಗಗಳಲ್ಲಿ ಈ ಹೆಚ್ಚಿನ ಖರೀದಿ ನಡೆಯುತ್ತಿದೆ. ಕಳೆದ ಎರಡು ವಾರಗಳಲ್ಲಿ ನಿಫ್ಟಿ ಶೇಕಡಾ 6, ಬ್ಯಾಂಕ್ ನಿಫ್ಟಿ ಶೇಕಡಾ 7.4 ಮತ್ತು ನಿಫ್ಟಿ ಐಟಿ ಶೇಕಡಾ 11 ರಷ್ಟು ಏರಿಕೆಯಾಗಿವೆ. ಈ ವಿಭಾಗಗಳಲ್ಲಿ ಭಾರಿ ಡೆಲಿವರಿ ಆಧಾರಿತ ಖರೀದಿ ನಡೆದಿರುವುದರಿಂದ ಅವು ಸ್ಥಿತಿಸ್ಥಾಪಕತ್ವವನ್ನು ಉಳಿಸಿಕೊಳ್ಳುವ ಸಾಮರ್ಥ್ಯ ಹೊಂದಿವೆ ಎಂದು ಅವರು ಹೇಳಿದರು.
ಮೌಲ್ಯಮಾಪನಗಳನ್ನು ಹೊರತುಪಡಿಸಿ ಜಾಗತಿಕ ಮತ್ತು ದೇಶೀಯ ಅಂಶಗಳು ಮಾರುಕಟ್ಟೆಗೆ ಅನುಕೂಲಕರವಾಗಿವೆ. ವಿಶೇಷವಾಗಿ ದೊಡ್ಡ ಕ್ಯಾಪ್ ಗಳಲ್ಲಿ ಈಗ ಹೂಡಿಕೆ ಮಾಡುವುದು ಅರ್ಥಪೂರ್ಣವಾಗಿದೆ. ಮೌಲ್ಯಮಾಪನಗಳು ತುಂಬಾ ಹೆಚ್ಚಿರುವ ಮಧ್ಯಮ ಮತ್ತು ಸಣ್ಣ ಕ್ಯಾಪ್ಗಳಲ್ಲಿ ಕೆಲ ಲಾಭ ಬುಕಿಂಗ್ ಮಾಡಿಕೊಳ್ಳಬಹುದು ಎಂದು ಅವರು ತಿಳಿಸಿದರು. ಬಿಎಸ್ಇ ಸೆನ್ಸೆಕ್ಸ್ ಸೋಮವಾರ 27 ಪಾಯಿಂಟ್ಸ್ ಏರಿಕೆಗೊಂಡು 71511 ಪಾಯಿಂಟ್ಸ್ ತಲುಪಿದೆ.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಎಂದರೆ ಈ ಸಂಸ್ಥೆಗಳು ತಾವು ನೆಲೆಗೊಂಡಿರುವ ದೇಶವನ್ನು ಹೊರತುಪಡಿಸಿ ಬೇರೆ ದೇಶಕ್ಕೆ ಸೇರಿದ ಸ್ವತ್ತುಗಳಲ್ಲಿ ಹೂಡಿಕೆ ಮಾಡುವ ಹೂಡಿಕೆದಾರರು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ದೇಶವೊಂದರ ಆರ್ಥಿಕತೆಯಲ್ಲಿ ಬಹಳ ಮುಖ್ಯ ಪಾತ್ರ ವಹಿಸುತ್ತಾರೆ. ಹೂಡಿಕೆ ಬ್ಯಾಂಕುಗಳು, ಮ್ಯೂಚುವಲ್ ಫಂಡ್ ಗಳು ಮುಂತಾದ ದೊಡ್ಡ ಕಂಪನಿಗಳು ಭಾರತೀಯ ಮಾರುಕಟ್ಟೆಗಳಲ್ಲಿ ಗಣನೀಯ ಪ್ರಮಾಣದ ಹಣ ಹೂಡಿಕೆ ಮಾಡುತ್ತವೆ.
ಈ ದೊಡ್ಡ ಕಂಪನಿಗಳು ಸೆಕ್ಯುರಿಟಿಗಳನ್ನು ಖರೀದಿಸುವುದರಿಂದ ಮಾರುಕಟ್ಟೆಗಳು ಮೇಲಕ್ಕೇರುತ್ತವೆ ಮತ್ತು ಅವು ಆರ್ಥಿಕತೆಗೆ ಬರುವ ಒಟ್ಟು ಒಳಹರಿವಿನ ಮೇಲೆ ಬಲವಾದ ಪ್ರಭಾವ ಬೀರುತ್ತವೆ. ಮಾರುಕಟ್ಟೆ ನಿಯಂತ್ರಕ ಸೆಬಿಯಲ್ಲಿ 1450 ಕ್ಕೂ ಹೆಚ್ಚು ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು ನೋಂದಾಯಿಸಿಕೊಂಡಿದ್ದಾರೆ. ಎಫ್ಐಐಗಳನ್ನು ಎಲ್ಲ ವರ್ಗದ ಹೂಡಿಕೆದಾರರಿಂದ ಹೂಡಿಕೆಯನ್ನು ಉತ್ತೇಜಿಸುವ ಮೂಲಕ ಮಾರುಕಟ್ಟೆ ಕಾರ್ಯಕ್ಷಮತೆಗೆ ಪ್ರಚೋದಕ ಮತ್ತು ವೇಗವರ್ಧಕ ಎಂದು ಪರಿಗಣಿಸಲಾಗುತ್ತದೆ.
ಎಫ್ಐಐಗಳಿಗೆ ದೇಶದ ಪೋರ್ಟ್ಫೋಲಿಯೊ ಹೂಡಿಕೆ ಯೋಜನೆಯ ಮೂಲಕ ಮಾತ್ರ ಭಾರತದ ಪ್ರಾಥಮಿಕ ಮತ್ತು ದ್ವಿತೀಯ ಬಂಡವಾಳ ಮಾರುಕಟ್ಟೆಗಳಲ್ಲಿ ಹೂಡಿಕೆ ಮಾಡಲು ಅವಕಾಶವಿದೆ. ಈ ಯೋಜನೆಯು ಎಫ್ಐಐಗಳಿಗೆ ದೇಶದ ಸಾರ್ವಜನಿಕ ವಿನಿಮಯ ಕೇಂದ್ರಗಳಲ್ಲಿ ಭಾರತೀಯ ಕಂಪನಿಗಳ ಷೇರುಗಳು ಮತ್ತು ಡಿಬೆಂಚರ್ಗಳನ್ನು ಖರೀದಿಸಲು ಅನುವು ಮಾಡಿಕೊಡುತ್ತದೆ.
ಇದನ್ನೂ ಓದಿ : ಜನವರಿಯಲ್ಲಿ ಬ್ಯಾಂಕುಗಳೊಂದಿಗೆ ಸಂಸದೀಯ ಸಮಿತಿ ಸಭೆ; ಮತ್ತೆ ಮುನ್ನೆಲೆಗೆ ಬಂದ ವಿಲೀನ ವಿಚಾರ
