ಜು.1 ರಿಂದ ಚಿನ್ನದ ಹಾಲ್​ಮಾರ್ಕಿಂಗ್​ ಕಡ್ಡಾಯ ನಿಯಮ ಜಾರಿ ಸಾಧ್ಯತೆ ಇಲ್ಲ!

ಚಿನ್ನದ ಗಟ್ಟಿಗಳಿಗೆ ಹಾಲ್ ಮಾರ್ಕಿಂಗ್ ಕಡ್ಡಾಯವಾಗಲಿದೆ ಎಂದು ಹೇಳಲಾಗಿತ್ತು. ಆದರೆ ಈ ನಿಯಮ ಈಗಲೇ ಜಾರಿಯಾಗುವ ಸಾಧ್ಯತೆಯಿಲ್ಲ ಎನ್ನಲಾಗಿದೆ.

ನವದೆಹಲಿ : ಚಿನ್ನದ ಗಟ್ಟಿಗಳಿಗೆ ಕಡ್ಡಾಯವಾಗಿ ಹಾಲ್​ ಮಾರ್ಕಿಂಗ್ ಮಾಡುವ ನಿಯಮ ಇದೇ ಜುಲೈ 1 ರಿಂದ ಜಾರಿಯಾಗುವ ಸಾಧ್ಯತೆಗಳಿಲ್ಲ ಎಂದು ವರದಿಗಳು ತಿಳಿಸಿವೆ. ಸಂಬಂಧಿಸಿದ ಉದ್ಯಮದ ಪ್ರತಿನಿಧಿಗಳೊಂದಿಗೆ ಕೇಂದ್ರ ಸರ್ಕಾರವು ಈ ಬಗ್ಗೆ ಈಗಷ್ಟೇ ಮಾತುಕತೆ ಆರಂಭಿಸಿರುವುದರಿಂದ ನಿಯಮ ಈಗಲೇ ಕಡ್ಡಾಯವಾಗದು ಎನ್ನಲಾಗಿದೆ. ಜುಲೈ 1 ರಿಂದ ಹಾಲ್​ಮಾರ್ಕಿಂಗ್ ಕಡ್ಡಾಯಗೊಳಿಸುವ ವಿಚಾರದಲ್ಲಿ ಸಾಕಷ್ಟು ಗೊಂದಲಗಳು ಉಂಟಾಗಿರುವುದನ್ನು ಒಪ್ಪಿಕೊಂಡಿರುವ ಗ್ರಾಹಕ ವ್ಯವಹಾರಗಳ ಇಲಾಖೆಯು, ಅಂಥ ಪ್ರಸ್ತಾವನೆ ಸದ್ಯಕ್ಕಿಲ್ಲ ಎಂದು ಹೇಳಿದೆ.

ಚಿನ್ನಕ್ಕೆ ಹಾಲ್‌ಮಾರ್ಕಿಂಗ್ ಕಡ್ಡಾಯ ನಿಯಮ ಜುಲೈ 1 ರಿಂದ ಜಾರಿಗೆ ಬರುವುದಿಲ್ಲ. ಅದನ್ನು ಕಡ್ಡಾಯಗೊಳಿಸುವ ಪ್ರಕ್ರಿಯೆಯು ಈಗಷ್ಟೇ ಪ್ರಾರಂಭವಾಗಿದೆ. ಪ್ರಕ್ರಿಯೆಯನ್ನು ಪ್ರಾರಂಭಿಸಲು ಉಪ ಸಮಿತಿಯನ್ನು ರಚಿಸಲಾಗಿದೆ ಮತ್ತು ಎಲ್ಲಾ ಮಧ್ಯಸ್ಥಗಾರರೊಂದಿಗೆ ಚರ್ಚೆಗಳು ನಡೆಯುತ್ತಿವೆ ಎಂದು ಎಂದು ಉನ್ನತ ಮೂಲಗಳು ಮಾಧ್ಯಮಕ್ಕೆ ತಿಳಿಸಿವೆ. ಬ್ಯೂರೋ ಆಫ್ ಇಂಡಿಯನ್ ಸ್ಟ್ಯಾಂಡರ್ಡ್ಸ್ (ಬಿಐಎಸ್) ಮುಖ್ಯಸ್ಥ ಪ್ರಮೋದ್ ಕುಮಾರ್ ತಿವಾರಿ ಅವರು ಈ ವರ್ಷದ ಮಾರ್ಚ್‌ನಲ್ಲಿ ಚಿನ್ನದ ಗಟ್ಟಿಗಳ ಹಾಲ್‌ಮಾರ್ಕ್ ಅನ್ನು ಕಡ್ಡಾಯಗೊಳಿಸಲು ಸರ್ಕಾರ ಯೋಜಿಸಿದೆ ಮತ್ತು ಕರಡು ಮಾರ್ಗಸೂಚಿಗಳೊಂದಿಗೆ ಸಿದ್ಧವಾಗಿದೆ ಎಂದು ಹೇಳಿದ್ದರು.

ಚಿನ್ನದ ಗಟ್ಟಿಯನ್ನು ಆಭರಣಗಳ ತಯಾರಿಕೆಗೆ ಕಚ್ಚಾ ವಸ್ತುವಾಗಿ ಬಳಸಲಾಗುತ್ತದೆ. ಬಹಳ ದೊಡ್ಡ ಪ್ರಮಾಣದಲ್ಲಿ ಚಿನ್ನಾಭರಣ ತಯಾರಿಸಲು ಗಟ್ಟಿಗಳನ್ನು ಬಳಸುವುದರಿಂದ ಅದು ಪರಿಶುದ್ಧವಾಗಿರುವುದು ಅತ್ಯಗತ್ಯ. ಹಾಲ್‌ ಮಾರ್ಕ್ ಮಾಡಿದ ಚಿನ್ನದ ಗಟ್ಟಿಗಳು ದೇಶದಲ್ಲಿ ತಯಾರಾಗುತ್ತಿರುವ ಚಿನ್ನದ ಆಭರಣಗಳ ಅಪೇಕ್ಷಿತ ಶುದ್ಧತೆಯನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತದೆ. ಭಾರತವು ವಿಶ್ವದ ಅತಿದೊಡ್ಡ ಗ್ರಾಹಕ ಮತ್ತು ಚಿನ್ನದ ಆಮದುದಾರ ದೇಶವಾಗಿದೆ. ದೇಶವು ವಾರ್ಷಿಕವಾಗಿ ಸುಮಾರು 700 ರಿಂದ 800 ಟನ್ ಚಿನ್ನವನ್ನು ಆಮದು ಮಾಡಿಕೊಳ್ಳುತ್ತದೆ.

ಚಿನ್ನದ ತಜ್ಞರ ಪ್ರಕಾರ, ಭೌತಿಕ ಚಿನ್ನವನ್ನು ಖರೀದಿಸುವ ಮೊದಲು ಬಿಐಎಸ್ ಹಾಲ್ ಮಾರ್ಕ್ ಅನ್ನು ಪರಿಶೀಲಿಸಬೇಕು. ಹಾಲ್ ಮಾರ್ಕ್ ವಿಭಿನ್ನ ಮಾಹಿತಿಯನ್ನು ಒದಗಿಸುವ ಮೂರು ಚಿಹ್ನೆಗಳಿಂದ ಕೂಡಿದೆ. ಮೊದಲ ಚಿಹ್ನೆ BIS ಲೋಗೋ, ಎರಡನೇ ಚಿಹ್ನೆಯು ಶುದ್ಧತೆ ಮತ್ತು ಸೂಕ್ಷ್ಮತೆಯನ್ನು ಪ್ರತಿನಿಧಿಸುತ್ತದೆ ಮತ್ತು ಮೂರನೇ ಚಿಹ್ನೆಯು ಆರು ಅಂಕಿಯ ಆಲ್ಫಾನ್ಯೂಮರಿಕ್ ಕೋಡ್ (HUID) ಆಗಿದೆ. ಗೂಗಲ್ ಪ್ಲೇ ಸ್ಟೋರ್‌ನಿಂದ ಡೌನ್‌ಲೋಡ್ ಮಾಡಬಹುದಾದ BIS CARE ಅಪ್ಲಿಕೇಶನ್‌ನಲ್ಲಿನ 'ವೆರಿಫೈ HUID' ವೈಶಿಷ್ಟ್ಯವನ್ನು ಬಳಸಿಕೊಂಡು ಗ್ರಾಹಕರು HUID ಸಂಖ್ಯೆಗಳನ್ನು ಬಳಸಿ ಹಾಲ್‌ಮಾರ್ಕ್ ಮಾಡಿದ ಚಿನ್ನದ ಆಭರಣಗಳ ದೃಢೀಕರಣ ಮತ್ತು ಶುದ್ಧತೆಯನ್ನು ಪರಿಶೀಲಿಸಬಹುದು.

ಏನಿದು ಬಿಐಎಸ್ ಹಾಲ್​ಮಾರ್ಕ್? : ಹಾಲ್‌ಮಾರ್ಕ್‌ಗಳು ಬೆಲೆಬಾಳುವ ಲೋಹದ ವಸ್ತುಗಳ ಶುದ್ಧತೆ ಅಥವಾ ಸೂಕ್ಷ್ಮತೆಯನ್ನು ಖಚಿತಪಡಿಸಿಕೊಳ್ಳಲು ಭಾರತದಲ್ಲಿ ಬಳಸಲಾಗುವ ಅಧಿಕೃತ ಗುರುತುಗಳಾಗಿವೆ. ಚಿನ್ನದ ಆಭರಣಗಳು/ಕಲಾಕೃತಿಗಳ ಹಾಲ್‌ಮಾರ್ಕ್ ಅವುಗಳ ವಿಶ್ವಾಸಾರ್ಹತೆಯನ್ನು ಹೆಚ್ಚಿಸುತ್ತದೆ ಮತ್ತು ಶುದ್ಧತೆಯ ಬಗ್ಗೆ ಗ್ರಾಹಕರ ತೃಪ್ತಿಗೆ ಕಾರಣವಾಗುತ್ತದೆ. ಗ್ರಾಹಕರ ರಕ್ಷಣೆಗೆ ಇದು ಒಂದು ಪ್ರಮುಖ ಹೆಜ್ಜೆಯಾಗಿದೆ.

ಇದನ್ನೂ ಓದಿ : 2023ರಲ್ಲಿ ಅತ್ಯಧಿಕ ಬಡ್ಡಿ ಆದಾಯ ನೀಡುವ ಎಫ್​ಡಿ ಯೋಜನೆ ಯಾವುದು? ಇಲ್ಲಿದೆ ಮಾಹಿತಿ..