ಮೂಗಿನ ಮೂಲಕ ಹಾಕುವ ಇಂಕೋವ್ಯಾಕ್ಸ್​ ಕೊರೊನಾ ಲಸಿಕೆಗೆ ದರ ನಿಗದಿ.. ದರ ಎಷ್ಟು ಗೊತ್ತಾ?

ಕೊರೊನಾ ಸೋಂಕಿಗೆ ಇಂಟ್ರಾನಾಸಲ್​ ಲಸಿಕೆ- ವಿಶ್ವದ ಮೊದಲ ಮೂಗಿನ ಮೂಲಕದ ಲಸಿಕೆ- ಭಾರತ್​ ಬಯೋಟೆಕ್​ ಸಂಸ್ಥೆಯ ಲಸಿಕೆ- ಇಂಕೋವ್ಯಾಕ್ ಲಸಿಕೆಗೆ ದರ ನಿಗದಿ

ಹೈದರಾಬಾದ್: ಕೊರೊನಾ ಮಾರಿಗೆ ಕೊವ್ಯಾಕ್ಸಿನ್​ ಮದ್ದು ಅರೆದಿದ್ದ ಭಾರತ್ ಬಯೋಟೆಕ್‌ ಸಂಸ್ಥೆ ಇದೀಗ ವಿಶ್ವದಲ್ಲಿಯೇ ಮೊದಲ ಇಂಟ್ರಾನಾಸಲ್​ ಲಸಿಕೆಯನ್ನು ಪರಿಚಯಿಸಿದ್ದು ದರ ಕೂಡ ನಿಗದಿ ಮಾಡಿದೆ. ಬೂಸ್ಟರ್​ ಡೋಸ್​ ಆಗಿ ಮೂಗಿನ ಮೂಲಕ ಪಡೆಯುವ ಇಂಕೋವ್ಯಾಕ್​ ಲಸಿಕೆಯನ್ನು CoWin ವೆಬ್​ಸೈಟ್​ನಲ್ಲಿ ಲಭ್ಯವಿದೆ.

ಖಾಸಗಿ ಮಾರುಕಟ್ಟೆಯಲ್ಲಿ ಇಂಕೋವ್ಯಾಕ್​ 800 ರೂಪಾಯಿ, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳಿಗೆ ಸರಬರಾಜು ಮಾಡಲು 325 ರೂಪಾಯಿಯನ್ನು ದರ ನಿಗದಿ ಮಾಡಲಾಗಿದೆ ಎಂದು ಹೈದರಾಬಾದ್ ಮೂಲದ ಕಂಪನಿ ತಿಳಿಸಿದೆ. ಕಳೆದ ತಿಂಗಳು ಭಾರತ್ ಬಯೋಟೆಕ್​ನ iNCOVACC ಇಂಟ್ರಾನಾಸಲ್​ ಲಸಿಕೆಯನ್ನು ಬೂಸ್ಟರ್ ಡೋಸ್‌ ಆಗಿ ನೀಡಲು ಕೇಂದ್ರ ಔಷಧೀಯ ನಿಯಂತ್ರಣ ಮಂಡಳಿ ಅನುಮತಿ ನೀಡಿತ್ತು.

ವಿಶ್ವದಲ್ಲಿಯೇ ಮೊದಲ ಇಂಟ್ರಾನಾಸಲ್​ ಲಸಿಕೆ ಮಾರುಕಟ್ಟೆಯಲ್ಲಿ ಲಭ್ಯವಿದೆ. ಇದು SARS-CoV-2 ಸ್ಪೈಕ್ ಪ್ರೊಟೀನ್‌ನೊಂದಿಗೆ ಮರುಸಂಯೋಜಿಸಿ ಅಡೆನೊವೈರಸ್ ವೆಕ್ಟರ್ಡ್ ಲಸಿಕೆಯಾಗಿದೆ. ಇದನ್ನು ಮೂರು ಹಂತಗಳಲ್ಲಿ ವೈದ್ಯಕೀಯ ಪರೀಕ್ಷೆಗೆ ಒಳಪಡಿಸಲಾಗಿದೆ ಎಂದು ಕಂಪನಿ ತಿಳಿಸಿದೆ.

ಇಂಟ್ರಾನಾಸಲ್ ಲಸಿಕೆಗಳು ಮತ್ತು ಅವುಗಳ ಕಾರ್ಯವಿಧಾನ

• ಈವರೆಗೆ ನೀಡಲಾದ ಲಸಿಕೆಗಳನ್ನು ಇಂಟ್ರಾಮಸ್ಕುಲರ್ ಅಥವಾ ಸಬ್ಕ್ಯುಟೇನಿಯಸ್ ಚುಚ್ಚುಮದ್ದಿನ ಮೂಲಕ ನೀಡಲಾಗಿತ್ತು. ಆದರೆ, ಈ ಲಸಿಕಾ ವಿಧಾನವು ಮೂಗಿನ ಹೊಳ್ಳೆಯ ಮೂಲಕ ನೀಡಲಾಗುವುದರಿಂದ, ಇದು ಸೂಜಿಯ ಮೇಲಿನ ಅನಗತ್ಯ ಖರ್ಚನ್ನು ಕಡಿಮೆ ಮಾಡುತ್ತದೆ.
• ಕೋವಿಡ್​-19 ಪಿಡುಗಿನ ವಿರುದ್ಧ ಹೋರಾಡಲು 'ಭಾರತ್ ಬಯೋಟೆಕ್' ಸಂಸ್ಥೆಯು ಅಭಿವೃದ್ಧಿಪಡಿಸಿರುವ ಇಂಟ್ರಾನಾಸಲ್ ಲಸಿಕೆಯು ಸೂಜಿ ಮುಕ್ತವಾಗಿದೆ. ಸಾಮಾನ್ಯವಾಗಿ ಕೊರೊನಾ ವೈರಸ್ ನಮ್ಮ ಮೂಗಿನ ಮೂಲಕ ದೇಹವನ್ನು ಪ್ರವೇಶಿಸುವುದರಿಂದ, ಈ ಲಸಿಕೆ ರಕ್ತದಲ್ಲಿ ರೋಗ ನಿರೋಧಕ ಶಕ್ತಿಯನ್ನು ಮತ್ತು ಮೂಗಿನಲ್ಲಿ ಪ್ರೋಟೀನ್‌ಗಳನ್ನು ಉತ್ಪಾದಿಸಿ ವೈರಸ್ ವಿರುದ್ಧ ಹೋರಾಡುತ್ತದೆ.
• ಈ ರೀತಿಯ ಲಸಿಕೆಯ ನಿರ್ವಹಣೆ ಸುಲಭವಲ್ಲದಿದ್ದರೂ, ಸೂಜಿಗೆ ಭಯಪಡುವವರಿಗೆ ಇದು ಉತ್ತಮ ಆಯ್ಕೆಯಾಗಿದೆ. ಅಲ್ಲದೇ, ಇದನ್ನು ಸೂಜಿ, ಸಿರಿಂಜ್​ಗಳ ಬಳಕೆಯಿಲ್ಲದೆ ನೀಡುವುದರಿಂದ ಇದು ರೋಗಿಗಳ ನಡುವೆ ಹರಡಬಹುದಾದ ಸೋಂಕನ್ನು ಕಡಿಮೆಗೊಳಿಸಲಿದೆ.
• ಇಂಟ್ರಾನಾಸಲ್ ಲಸಿಕೆಯನ್ನು ಇತರೆ ಲಸಿಕೆಗಳಿಗೆ ಹೋಲಿಸಿದರೆ, ಉತ್ತಮ ರೋಗನಿರೋಧಕ ಶಕ್ತಿಯನ್ನು ಒದಗಿಸುವುದರ ಜೊತೆಗೆ ಇದನ್ನು ಸ್ವಯಂ-ನಿರ್ವಹಣೆ ಮಾಡುವುದು ಸುಲಭವಾಗಿದೆ. ಅಲ್ಲದೇ, ಇದು ಸೂಜಿ, ಸಿರಿಂಜ್​ಗಳಂತಹ ವೈದ್ಯಕೀಯ ಉಪಭೋಗ್ಯದ ಬಳಕೆಯನ್ನು ಕಡಿತಗೊಳಿಸಲು ಸಹಾಯ ಮಾಡುತ್ತದೆ ಮತ್ತು ವ್ಯಾಕ್ಸಿನೇಷನ್ ಡ್ರೈವ್​ ಮೇಲಿನ ಒಟ್ಟಾರೆ ವೆಚ್ಚವನ್ನು ಕಡಿಮೆ ಮಾಡುತ್ತದೆ.

ಭಾರತ್ ಬಯೋಟೆಕ್ ಏನು ಹೇಳುತ್ತದೆ?

ಇಂಟ್ರಾನಾಸಲ್ ಲಸಿಕೆಗಳನ್ನು ಉತ್ಪಾದಿಸಿರುವ ಭಾರತ್ ಬಯೋಟೆಕ್ ಸಂಸ್ಥೆಯು ಇದರ ಅನುಕೂಲಕರ ಅಂಶಗಳ ಬಗ್ಗೆ ಈ ರೀತಿಯಾಗಿ ಹೇಳಿದೆ.

• ಇಂಟ್ರಾನಾಸಲ್ ಲಸಿಕೆ ದೀರ್ಘವಾದ ರೋಗನಿರೋಧಕ ಶಕ್ತಿಯನ್ನು ಉತ್ತೇಜಿಸುತ್ತದೆ. ಇದನ್ನು ಮೂಗಿನ ಹೊಳ್ಳೆ( ಲೋಳೆಪೊರೆ)ಯಲ್ಲಿ ಹಾಕುವುದರಿಂದ ಸೋಂಕು ಮತ್ತು ಕೊರೊನಾ ಹರಡುವಿಕೆ ಎರಡನ್ನೂ ತಡೆಯಲು ಸಾಧ್ಯವಾಗುತ್ತದೆ.
• ಈ ಲಸಿಕೆಯು ಸೂಜಿ ಮುಕ್ತವಾಗಿದ್ದು, ಅಡ್ಡಪರಿಣಾಮಗಳಿಲ್ಲ.
• ಲಸಿಕೆ ನಿರ್ವಹಣೆ ಸುಲಭ - ತರಬೇತಿ ಪಡೆದ ಆರೋಗ್ಯ ಕಾರ್ಯಕರ್ತರ ಅಗತ್ಯವಿಲ್ಲ.
• ಸೂಜಿ ಸಂಬಂಧಿತ ಅಪಾಯಗಳು ಇರುವುದಿಲ್ಲ (ಗಾಯಗಳು ಮತ್ತು ಸೋಂಕುಗಳು).
• ಮಕ್ಕಳು ಮತ್ತು ವಯಸ್ಕರಿಗೆ ಸೂಕ್ತವಾಗಿದೆ.
• ಜಾಗತಿಕ ಬೇಡಿಕೆಯನ್ನು ಪೂರೈಸಲು ಸಾಧ್ಯವಾಗುತ್ತದೆ.