ಮುಂಬೈ: ಸತತ ಮೂರು ದಿನಗಳಿಂದ ಕುಸಿತ ಕಾಣುತ್ತಿರುವ ಮುಂಬೈ ಷೇರುಪೇಟೆ ಸೂಚ್ಯಂಕ ಸೆನ್ಸೆಕ್ಸ್ ಇಂದೂ ಸಹ ಆರಂಭಿಕ ವಹಿವಾಟಿನಲ್ಲಿ 250 ಪಾಯಿಂಟ್ಗಳಷ್ಟು ಕುಸಿತ ಕಂಡಿದ್ದು, ಇದೀಗ 435 ಪಾಯಿಂಟ್ಗಳಷ್ಟು ಕುಸಿತ ಕಾಣುವ ಮುಖೇನ ದಿನದ ವಹಿವಾಟು ಮುಗಿಸಿದೆ.
ಐಸಿಐಸಿಐ ಬ್ಯಾಂಕ್, ಆ್ಯಕ್ಸಿಸ್ ಬ್ಯಾಂಕ್ ಮತ್ತು ಎಸ್‌ಬಿಐ ಷೇರುಗಳು ನಷ್ಟವನ್ನು ಅನುಭವಿಸುವ ಮೂಲಕ ಈಕ್ವಿಟಿ ಬೆಂಚ್‌ಮಾರ್ಕ್ ಸೆನ್ಸೆಕ್ಸ್ ಇಂದು ಸಂಜೆ ವೇಳೆಗೆ 435 ಪಾಯಿಂಟ್ಗಳಷ್ಟು ಕುಸಿತ ಕಂಡಿದೆ. ಬಿಎಸ್‌ಇ ಸೂಚ್ಯಂಕವು 434.93 ಪಾಯಿಂಟ್ ಅಥವಾ ಶೇ0.85 ರಷ್ಟು ಇಳಿಕೆ ಕಾಣುವ ಮೂಲಕ 50,889.76 ಪಾಯಿಂಟ್ಗೆ ತಲುಪಿದರೆ, ಎನ್ಎಸ್ಇ ನಿಫ್ಟಿ 137.20 ಪಾಯಿಂಟ್ ಅಥವಾ ಶೇ0.91 ರಷ್ಟು ಇಳಿಕೆ ಕಾಣುವ ಮುಖೇನ 14,981.75 ಕ್ಕೆ ತಲುಪಿದೆ.
ಇಂದು ಒಎನ್‌ಜಿಸಿ ಎಸ್‌ಬಿಐ, ಆ್ಯಕ್ಸಿಸ್ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಬಜಾಜ್ ಆಟೋ ಮತ್ತು ಮಾರುತಿ ಕಂಪನಿಗಳ ಷೇರು ಮೌಲ್ಯ ಕುಸಿದಿದ್ದು, ಇಂಡಸ್ಇಂಡ್ ಬ್ಯಾಂಕ್, ಹೆಚ್‌ಯುಎಲ್, ಡಾ. ರೆಡ್ಡೀಸ್, ಎನ್‌ಟಿಪಿಸಿ ಮತ್ತು ರಿಲಯನ್ಸ್ ಇಂಡಸ್ಟ್ರೀಸ್ ಷೇರುಗಳಲ್ಲಿ ಏರಿಕೆ ಕಂಡಿವೆ.
ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕಚ್ಚಾ ತೈಲದ ಬೆಲೆಯು ಶೇ 1.24ರಷ್ಟು ಕಡಿಮೆಯಾಗಿದ್ದು, ಪ್ರತಿ ಬ್ಯಾರೆಲ್‌ಗೆ 63.14 ಅಮೆರಿಕನ್ ಡಾಲರ್‌ಗೆ ತಲುಪಿದೆ.
