ನವದೆಹಲಿ: ದೇಶದಲ್ಲಿ ಕೊರೊನಾ ವೈರಸ್ ಭೀತಿ ಹೆಚ್ಚಾದ ಬೆನ್ನಲ್ಲೇ ಈ ವೈರಸ್ ಹರಡುವಿಕೆಯನ್ನ ಸ್ವಲ್ಪಮಟ್ಟಿಗೆ ತಡೆಗಟ್ಟಬಲ್ಲ ಎನ್-95 ಹೆಸರಿನ ಮುಖಗವಸು ಬೆಲೆಯಲ್ಲಿ ಭಾರೀ ಪ್ರಮಾಣದಲ್ಲಿ ಇಳಿಕೆಯಾಗಿದೆ.
ದೇಶದಲ್ಲಿ ಕೈಗೆಟುಕುವ ದರದಲ್ಲಿ ಉಸಿರಾಟದ ಸಂರಕ್ಷಣಾ ಸಾಧನದ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು ಬೆಲೆ ನಿಯಂತ್ರಕ ರಾಷ್ಟ್ರೀಯ ಔಷಧೀಯ ಬೆಲೆ ಪ್ರಾಧಿಕಾರದ (ಎನ್ಪಿಪಿಎ) ಸಲಹೆಯ ಬಳಿಕ ಎನ್ -95 ಮುಖಗವಸುಗಳ ದರವನ್ನು ಶೇ 47ರಷ್ಟು ಕಡಿತಗೊಳಿಸಲಾಗಿದೆ.
ಎನ್ -95 ಮಾಸ್ಕ್ಗಳು ಈ ಮೊದಲು ಮಾರುಕಟ್ಟೆಯಲ್ಲಿ ಪ್ರತಿ ಯೂನಿಟ್‌ಗೆ 150 ರಿಂದ 300 ರೂ.ಗಳಿಗೆ ಮಾರಾಟ ಮಾಡಲಾಗುತ್ತಿತ್ತು. ಎನ್ಪಿಪಿಎ ಸಲಹೆಯ ಮೇರೆಗೆ ದರ ಕಡಿತವಾಗಿದ್ದು, ಸೋಂಕು ನಿವಾರಣೆಗೆ ಮಾಸ್ಕ್ ಧರಿಸುವಿಕೆ ಹೆಚ್ಚಳವಾಗಬಹುದು.
ಎನ್ -95 ಮುಖಗವಸುಗಳ ಹೆಚ್ಚಿನ ಬೆಲೆಗಳ ಸಮಸ್ಯೆಯನ್ನು ಪರಿಹರಿಸಲಾಗಿದೆ. ದೇಶದಲ್ಲಿ ಕೈಗೆಟುಕುವ ಬೆಲೆಯಲ್ಲಿ ಅವುಗಳ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು ಎನ್ಪಿಪಿಎ ಮಧ್ಯೆ ಪ್ರವೇಶಿಸಿದೆ ಎಂದು ರಾಸಾಯನಿಕ ಮತ್ತು ರಸಗೊಬ್ಬರ ಸಚಿವಾಲಯ ಪ್ರಕಟಣೆಯಲ್ಲಿ ತಿಳಿಸಿದೆ.
ಎನ್ಪಿಪಿಎ 2020ರ ಮೇ 21ರಂದು ಎನ್ -95 ಮುಖಗವಸುಗಳ ಎಲ್ಲ ತಯಾರಕರು / ಆಮದುದಾರರು / ಪೂರೈಕೆದಾರರಿಗೆ ಸರ್ಕಾರೇತರ ಖರೀದಿಗಳ ಬೆಲೆಗಳಲ್ಲಿ ಸಮಾನತೆಯನ್ನು ಕಾಪಾಡಿಕೊಳ್ಳಲು ಮತ್ತು ಸಮಂಜಸವಾದ ಬೆಲೆಯಲ್ಲಿ ಲಭ್ಯವಾಗುವಂತೆ ಸಲಹೆಯನ್ನು ನೀಡಿತು ಎಂದು ಹೇಳಿದೆ.
