ನವದೆಹಲಿ: 2018-19ರ ವಿತ್ತೀಯ ವರ್ಷದಲ್ಲಿ ಬುಕ್ಕಿಂಗ್ ಮಾಡಿದ ಫ್ಲ್ಯಾಟ್ಗಳನ್ನು ಖರೀದಿದಾರರು ರದ್ದುಪಡಿಸಿದರೆ, ರಿಯಲ್ ಎಸ್ಟೇಟ್ ಸಂಸ್ಥೆಗಳು ಅವರಿಂದ ವಸೂಲಿ ಮಾಡಿದ್ದ ಜಿಎಸ್ಟಿ ಮರುಪಾವತಿಸಬೇಕು ಎಂದು ತೆರಿಗೆ ಇಲಾಖೆ ತಿಳಿಸಿದೆ.
ಒಂದೊಮ್ಮೆ ನಿರ್ಮಾಣಗಾರರು ಮನೆ ಖರೀದಿದಾರರಿಂದ 2019ರ ಏಪ್ರಿಲ್ 1ರಿಂದ ಶೇ 12ರಷ್ಟು ಜಿಎಸ್ಟಿ ಸಂಗ್ರಹಿಸಿ ಅನಂತರ ಹೊಸ ಜಿಎಸ್ಟಿ ದರ ಶೇ 5ನ್ನು ಆಯ್ಕೆ ಮಾಡಿಕೊಂಡರೆ, ಅಂತಹ ಸಂದರ್ಭದಲ್ಲಿ ಹೆಚ್ಚುವರಿ ತೆರಿಗೆ ದರವಾದ ಶೇ 7ರ ಸ್ಲ್ಯಾಬ್ ಅನ್ನು ಗ್ರಾಹಕರಿಗೆ ಮರುಪಾವತಿಸಬೇಕು ಎಂದು ಹೇಳಿದೆ.
ರಿಯಲ್ ಎಸ್ಟೇಟ್ ವಲಯಕ್ಕೆ ಹೊಸ ಜಿಎಸ್ಟಿ ದರ ಆಯ್ಕೆಗೆ ಅವಕಾಶ ನೀಡಲಾಗಿದೆ. ಹೀಗಾಗಿ, ಈ ಕುರಿತು ಪರೋಕ್ಷ ತೆರಿಗೆ ಮತ್ತು ಕಸ್ಟಮ್ಸ್ನ ಕೇಂದ್ರೀಯ ಮಂಡಳಿಯು (ಸಿಬಿಐಸಿ) ಸ್ಪಷ್ಟನೆ ನೀಡಿದೆ.
ಜಿಎಸ್ಟಿ ದರ ಆಯ್ಕೆಯ ಅವಕಾಶವನ್ನು ತಿಳಿಸಲು ರಿಯಲ್ ಎಸ್ಟೇಟ್ ಸಂಸ್ಥೆಗಳಿಗೆ ಮೇ 10ರ ವರೆಗೆ ಕಾಲಾವಕಾಶ ನೀಡಲಾಗಿದೆ. ಇನ್ಪುಟ್ ಟ್ಯಾಕ್ಸ್ ಕ್ರೆಡಿಟ್ನೊಂದಿಗೆ (ಐಟಿಸಿ) ಹಳೆಯ ಜಿಎಸ್ಟಿ ದರಗಳಲ್ಲಿಯೇ ಮುಂದುವರಿಯಲು ಬಯಸುವ ಸಂಸ್ಥೆಗಳು ಆಯಾ ಸ್ಥಳೀಯ ಅಧಿಕಾರಿಗಳಿಗೆ ತಮ್ಮ ನಿರ್ಧಾರವನ್ನು ತಿಳಿಸಬೇಕು. ಇಲ್ಲವಾದರೆ, ಸ್ವಯಂಚಾಲಿತವಾಗಿ ಹೊಸ ತೆರಿಗೆ ದರಗಳು ಅನ್ವಯವಾಗಲಿದೆ.
