ಸಣ್ಣ ಖಾಸಗಿ ಬ್ಯಾಂಕ್​ ಮಾಲೀಕರಾಗ್ಬೇಕಾ..? ಆರ್​​ಬಿಐ ನೀಡುತ್ತೆ ಮಾರ್ಗದರ್ಶನ!

ಪ್ರಸ್ತುತ ಕಾರ್ಯನಿರ್ವಹಿಸುತ್ತಿರುವ ಎಲ್ಲ ಎಸ್‌ಎಫ್‌ಬಿಗಳ ನಿವ್ವಳ ಮೌಲ್ಯ 200 ಕೋಟಿ ರೂ. ಆಗಿರುತ್ತದೆ. ಮಾರ್ಗಸೂಚಿಗಳ ಪ್ರಕಾರ, ಕಾರ್ಯಾಚರಣೆ ಆರಂಭವಾದ ದಿನಾಂಕದಿಂದ ಎಸ್‌ಎಫ್‌ಬಿಗಳಿಗೆ ಬ್ಯಾಂಕಿಂಗ್ ಚಟುವಟಿಕೆ ತೆರೆಯಲು ಸಾಮಾನ್ಯ ಅನುಮತಿ ಇರುತ್ತದೆ. ಆದರೆ, ಪಾವತಿ ಬ್ಯಾಂಕ್​ಗಳು ಎಸ್‌ಎಫ್‌ಬಿಯಾಗಿ ಪರಿವರ್ತನೆಯಾಗಲು ಐದು ವರ್ಷ ಕಾರ್ಯಾಚರಣೆ ನಡೆಸಿ ಬಳಿಕ ಅರ್ಜಿ ಸಲ್ಲಿಸಬಹುದು. ಅದು ಮಾರ್ಗಸೂಚಿಗಳ ಮಾನದಂಡಗಳ ಪ್ರಕಾರ ಅವು ಅರ್ಹರಾಗಿದ್ದರೆ ಮಾತ್ರ ಮಾನ್ಯತೆ ಸಿಗುತ್ತದೆ.

ಮುಂಬೈ: ಖಾಸಗಿ ವಲಯದ ಸಣ್ಣ ಹಣಕಾಸು ಬ್ಯಾಂಕ್‌ಗಳಿಗೆ (ಎಸ್​​ಎಫ್​​ಬಿ) 'ಆನ್ ಟ್ಯಾಪ್' ಪರವಾನಗಿಗಾಗಿ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್​ಬಿಐ) ನೂತನ ಮಾರ್ಗಸೂಚಿಗಳನ್ನು ಹೊರಡಿಸಿದ್ದು, ಇಂತಹ ಬ್ಯಾಂಕ್​ ಸ್ಥಾಪಿಸಲು ಕನಿಷ್ಠ 200 ಕೋಟಿ ರೂ. ನಿವ್ವಳ ಮೌಲ್ಯ ಇರಿಸಬೇಕು ಎಂದಿದೆ.

ಸಣ್ಣ ಹಣಕಾಸು ಘಟಕಗಳು, ಕಿರು ಮತ್ತು ಸಣ್ಣ ರೈತರು, ಸೂಕ್ಷ್ಮ ಮತ್ತು ಸಣ್ಣ ಕೈಗಾರಿಕೆಗಳು ಹಾಗೂ ಅಸಂಘಟಿತ ವಲಯದ ಘಟಕಗಳು ಸೇರಿದಂತೆ ಇತರ ಘಟಕಗಳಿಂದ ಠೇವಣಿಗಳನ್ನು ಸ್ವೀಕರಿಸುವ ಮತ್ತು ಸಾಲ ನೀಡುವಂತಹ ಹಣಕಾಸು ಚಟುವಟಿಕೆಗಳನ್ನು ಸಣ್ಣ ಹಣಕಾಸು ಬ್ಯಾಂಕ್​ಗಳು ನಡೆಸುತ್ತವೆ.

ಪರವಾನಗಿ ಮೊತ್ತವು 'ಆನ್-ಟ್ಯಾಪ್' ಆಧಾರದ ಮೇಲೆ 200 ಕೋಟಿ ರೂ. ಕನಿಷ್ಠ ಇಕ್ವಿಟಿ ಕ್ಯಾಪಿಟಲ್ ಅಥವಾ ನಿವ್ವಳ ಮೌಲ್ಯ ಪಾವತಿಸಬೇಕು. ಪ್ರಾಥಮಿಕ (ನಗರ) ಸಹಕಾರಿ ಬ್ಯಾಂಕ್​​ಗಳಿಗೆ (ಯುಸಿಬಿ), ಸಣ್ಣ ಹಣಕಾಸು ಬ್ಯಾಂಕ್​ಗಳಿಗೆ (ಎಸ್‌ಎಫ್‌ಬಿ) ಸ್ವಯಂಪ್ರೇರಣೆಯಿಂದ ಹಣಕಾಸು ಚಟುವಟಿಕೆ ನಡೆಸುವ ಇಚ್ಛಿಸುವವರಿಗೆ ನಿವ್ವಳ ಮೌಲ್ಯದ ಆರಂಭಿಕ ಮೊತ್ತ 100 ಕೋಟಿ ರೂ. ಆಗಿತ್ತು. ಪರಿಷ್ಕೃತ ನೂತನ ನಿಯಮದಡಿ ವ್ಯವಹಾರ ಆರಂಭವಾದ ದಿನಾಂಕದಿಂದ ಮುಂದಿನ 5 ವರ್ಷಗಳವರೆಗೆ ಈ ಮೊತ್ತವು 200 ಕೋಟಿ ರೂ.ಗೆ ಏರಿಕೆ ಆಗಿದೆ ಎಂದು ಆರ್​ಬಿಐ ತಿಳಿಸಿದೆ.