ಹೈದರಾಬಾದ್: ಡಿಜಿಟಲ್ ಪಾವತಿಗಳು ಮತ್ತು ಹಣಕಾಸು ಸೇವೆಗಳ ಕಂಪನಿ ಪೇಟಿಎಂ ಸುಮಾರು 20,000 ಫೀಲ್ಡ್ ಸೇಲ್ಸ್ ಎಕ್ಸಿಕ್ಯೂಟಿವ್ ಸಿಬ್ಬಂದಿಯನ್ನು ನೇಮಿಸಿಕೊಳ್ಳುವ ಪ್ರಕ್ರಿಯೆಯನ್ನು ಆರಂಭಿಸಿದ್ದು, ವ್ಯಾಪಾರಿಗಳಿಗೆ ಡಿಜಿಟಲ್ ಅಳವಡಿಕೆ ಕುರಿತು ಶಿಕ್ಷಣ ನೀಡಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಪೇಟಿಎಂ ನೇಮಕಾತಿ ಜಾಹೀರಾತಿನ ಪ್ರಕಾರ, ಫೀಲ್ಡ್ ಸೇಲ್ಸ್ ಎಕ್ಸಿಕ್ಯೂಟಿವ್‌ಗಳು (ಎಫ್‌ಎಸ್‌ಇ) ಮಾಸಿಕ ವೇತನ ಮತ್ತು ಕಮಿಷನ್‌ಗಳಲ್ಲಿ ರೂ. 35,000 ಮತ್ತು ಅದಕ್ಕಿಂತ ಹೆಚ್ಚಿನದನ್ನು ಗಳಿಸುವ ಅವಕಾಶವನ್ನು ಹೊಂದಿರುತ್ತಾರೆ. ಕಂಪನಿಯು ಯುವಕರು ಮತ್ತು ಪಿಯುಸಿ ಮುಗಿಸಿದವರನ್ನು ಎಫ್‌ಎಸ್‌ಇ ಆಗಿ ನೇಮಿಸಿಕೊಳ್ಳಲು ಮುಂದಾಗಿದೆ.
ಪೇಟಿಎಂ ಎಫ್‌ಎಸ್‌ಇಗಳನ್ನು ನೇಮಿಸಿಕೊಳ್ಳಲು ಆರಂಭಿಸಿದೆ. ಇದು 10 ನೇ ತರಗತಿ, 12 ನೇ ತರಗತಿ ಪಾಸಾದ ಅಥವಾ ಪದವೀಧರರಿಗೆ ಉತ್ತಮ ಅವಕಾಶವಾಗಿದೆ. ಇದು ಸಣ್ಣ ನಗರಗಳು ಮತ್ತು ಪಟ್ಟಣಗಳಲ್ಲಿ ಉದ್ಯೋಗ ಸೃಷ್ಟಿಗೆ ಸಹಾಯ ಮಾಡುತ್ತದೆ. ವಿಶೇಷವಾಗಿ ಸಾಂಕ್ರಾಮಿಕ ಸಮಯದಲ್ಲಿ ಉದ್ಯೋಗ ಕಳೆದುಕೊಂಡವರಿಗೆ ಇದು ವರದಾನವಾಗಲಿದೆ.
ಕಂಪನಿಯು ಮಹಿಳಾ ವ್ಯಾಪಾರಿಗಳಿಗೆ ಡಿಜಿಟಲ್ ಪಾವತಿಯ ಬಗ್ಗೆ ಶಿಕ್ಷಣ ನೀಡುವ ಸಲುವಾಗಿ ಮಹಿಳೆ ಉದ್ಯೋಗಿಗಳಿಗೆ ಪ್ರೋತ್ಸಾಹಿಸಲು ಬಯಸುತ್ತಿದೆ ಎಂದು ಮೂಲಗಳು ತಿಳಿಸಿವೆ. ಪೇಟಿಎಂ ಆಲ್ ಇನ್ ಒನ್ ಕ್ಯೂಆರ್ ಕೋಡ್‌ಗಳು, ಪೇಟಿಎಂ ಆಲ್ ಇನ್ ಒನ್ ಪಿಒಎಸ್ ಯಂತ್ರಗಳು, ಪೇಟಿಎಂ ಸೌಂಡ್‌ಬಾಕ್ಸ್ ಹಾಗೂ ಕಂಪನಿಯ ಪರಿಸರ ವ್ಯವಸ್ಥೆಯಾದ ವ್ಯಾಲೆಟ್, ಯುಪಿಐ, ಪೇಟಿಎಂ ಪೋಸ್ಟ್‌ಪೇಯ್ಡ್, ವ್ಯಾಪಾರಿ ಸಾಲ ಸೇರಿದಂತೆ ಎಲ್ಲಾ ಉತ್ಪನ್ನಗಳು ಮತ್ತು ವಿಮಾ ಕೊಡುಗೆಗಳ ಬಗ್ಗೆ ಎಫ್‌ಎಸ್‌ಇ ಪ್ರೊಮೋಟ್ ಮಾಡಲು ಉತ್ತೇಜಿಸುತ್ತದೆ.
ಕನಿಷ್ಠ 18 ವರ್ಷ, 10 ನೇ ತರಗತಿ ಅಥವಾ 12 ನೇ ತರಗತಿ ಉತ್ತೀರ್ಣರಾಗಿರುವ ಅಥವಾ ಪದವೀಧರ ಮತ್ತು ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಹೊಂದಿರುವ ಯಾವುದೇ ವ್ಯಕ್ತಿ ಪೇಟಿಎಂ ಆ್ಯಪ್ ಬಳಸಿ ಅರ್ಜಿ ಸಲ್ಲಿಸಬಹುದು.
ದ್ವಿಚಕ್ರ ವಾಹನ ಹೊಂದಿರುವವರಿಗೆ, ಈ ಮೊದಲು ಮಾರ್ಕೆಟಿಂಗ್ ಕ್ಷೇತ್ರದಲ್ಲಿ ಅನುಭವ ಹೊಂದಿರುವವರಿಗೆ ಆದ್ಯತೆ ನೀಡಲಾಗುವುದು. ಅರ್ಜಿದಾರರು ಸ್ಥಳೀಯ ಭಾಷೆ ಮತ್ತು ಪ್ರದೇಶದ ಬಗ್ಗೆ ಉತ್ತಮ ಜ್ಞಾನವನ್ನು ಹೊಂದಿರಬೇಕು ಎಂದು ಮೂಲಗಳು ತಿಳಿಸಿವೆ.
ಡೇಟಾ ಸಂಸ್ಥೆಯಾದ ರೆಡ್‌ಸೀರ್ಸ್ ಪ್ರಕಾರ, ಪೇಟಿಎಂನ ಒಟ್ಟು ಸರಕು ಮೌಲ್ಯ (ಜಿಎಂವಿ) ಸುಮಾರು 4 ಲಕ್ಷ ಕೋಟಿ ರೂಪಾಯಿಗಳಾಗಿದ್ದು ಪಾವತಿ ಉದ್ಯಮದಲ್ಲಿ ಅತ್ಯಧಿಕವಾಗಿದೆ.
ಇತ್ತೀಚೆಗೆ, ಪೇಟಿಎಂ ಪಾವತಿ ಬ್ಯಾಂಕ್ FASTag ಗಳನ್ನು ನೀಡುವಲ್ಲಿ 1-ಕೋಟಿಯ ಗಡಿ ದಾಟಿದೆ. ಇದು ದೇಶದ ಉಳಿದ ಬ್ಯಾಂಕುಗಳು ನೀಡಿದ ಒಟ್ಟು ಟ್ಯಾಗ್‌ಗಳಲ್ಲಿ ಮೂರನೇ ಒಂದು ಭಾಗವಾಗಿದೆ.
