ಹೈದರಾಬಾದ್: ಜೂನಿಯರ್ ಎನ್ಟಿಆರ್ ಅಭಿನಯದ ಆ್ಯಕ್ಷನ್ ಡ್ರಾಮಾ 'ದೇವರ' ಬಿಡುಗಡೆಯಾದಾಗಿನಿಂದಲೂ ಬಾಕ್ಸ್ ಆಫೀಸ್‌ನಲ್ಲಿ ಕಮಾಲ್ ಮಾಡುತ್ತಿದೆ. ಗಲ್ಲಾಪೆಟ್ಟಿಗೆಯಲ್ಲಿ ದೊಡ್ಡ ಅಂಕಿ - ಅಂಶಗಳೊಂದಿಗೆ ಪ್ರಯಾಣ ಆರಂಭಿಸಿದ ಚಿತ್ರ ಮೊದಲ ವಾರಾಂತ್ಯಕ್ಕೆ ವಿಶ್ವಾದ್ಯಂತ ಬರೋಬ್ಬರಿ 300 ಕೋಟಿ ರೂ. ಕಲೆಕ್ಷನ್ ಮಾಡಿದೆ. ಆದ್ರೆ ಮೊದಲ ಸೋಮವಾರ ಕಲೆಕ್ಷನ್ ವಿಚಾರದಲ್ಲಿ ಕೊಂಚ ಇಳಿಕೆ ಕಂಡುಬಂದಿದೆ.
ಸಿನಿಮಾ ತೆರೆಗಪ್ಪಳಿಸಿದ ದಿನ ಭಾರತದಲ್ 82.5 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿತ್ತು. ಅದಾಗ್ಯೂ, ಚಿತ್ರ ತನ್ನ ಎರಡನೇ ದಿನ ಶೇ.53.7ರಷ್ಟು ಕುಸಿತ ಕಂಡು, 38.2 ಕೋಟಿ ರು. ಗಳಿಸಿತು. ಮೂರನೇ ದಿನ ಅಂಕಿ ಅಂಶದಲ್ಲಿ ಕೊಂಚ ಏರಿಕೆಯಾಗಿ, 39.9 ಕೋಟಿ ರೂ. ಸಂಪಾದಿಸಿತು. ಅದಾಗ್ಯೂ ಸೋಮವಾರದ ಹೊತ್ತಿಗೆ ಬಾಕ್ಸ್ ಆಫೀಸ್ ವ್ಯವಹಾರದಲ್ಲಿ ಶೇ.68.67ರಷ್ಟು ಕುಸಿತ ಕಂಡಿದೆ. ಹೌದು, ದೇವರ ತನ್ನ ಮೊದಲ ಸೋಮವಾರ 12.5 ಕೋಟಿ ರೂಪಾಯಿಗಳನ್ನು ಸಂಪಾದಿಸಿದೆ. ಈ ಮೂಲಕ ಭಾರತದಲ್ಲಿ ಬಹುನಿರೀಕ್ಷಿತ ಚಿತ್ರದ ಒಟ್ಟು ಕಲೆಕ್ಷನ್ 173.1 ಕೋಟಿ ರೂಪಾಯಿ.
ಸಿನಿಮಾ ತನ್ನ ತೆಲುಗು ವರ್ಷನ್ನಿಂದ 136.5 ಕೋಟಿ ರೂಪಾಯಿ ಸಂಪಾದಿಸುವ ಮೂಲಕ ಮುನ್ನಡೆ ಸಾಧಿಸಿದೆ. ಹಿಂದಿ ಆವೃತ್ತಿಯಿಂದ 31 ಕೋಟಿ ರೂ. ಬಂದಿದೆ. ಸಿನಿಮಾ ಇಂಡಸ್ಟ್ರಿ ಟ್ರ್ಯಾಕರ್ ಸ್ಯಾಕ್ನಿಲ್ಕ್ ವರದಿ ಪ್ರಕಾರ, ತಮಿಳು ಆವೃತ್ತಿಯಿಂದ 3.45 ಕೋಟಿ ರೂಪಾಯಿ, ಕನ್ನಡ ಮತ್ತು ಮಲಯಾಳಂ ಭಾಷೆಗಳಿಂದ ಕ್ರಮವಾಗಿ 1.15 ಕೋಟಿ ರೂ. ಮತ್ತು 1 ಕೋಟಿ ರೂ. ಸಂಪಾದಿಸಿದೆ.
ಹಿಂದಿ ಆವೃತ್ತಿಯ ಯಶಸ್ಸು ಜೂನಿಯರ್ ಎನ್ಟಿಆರ್ ಅವರ ಜನಪ್ರಿಯತೆಗೆ ಹಿಡಿದ ಕೈಗನ್ನಡಿ. ಸಿನಿಮಾ ಮತ್ತು ನಟನೆಗೆ ಭಾಷೆಯ ಹಂಗಿಲ್ಲ, ಗಡಿ ಮೀರಿ ಪ್ರೇಕ್ಷಕರನ್ನು ಸಂಪಾದಿಸಬಹುದು ಎಂಬುದನ್ನು ಮತ್ತೊಮ್ಮೆ ಸಾಬಿತುಪಡಿಸಿದ್ದಾರೆ. ಕಡಿಮೆ ಪ್ರಚಾರದ ಹೊರತಾಗಿಯೂ ಸಿನಿಮಾ ಹಿಂದಿ ಮಾರುಕಟ್ಟೆಯಲ್ಲಿ 30 ಕೋಟಿ ರೂಪಾಯಿ (ನೆಟ್ ಕಲೆಕ್ಷನ್) ಗಳಿಸಿದೆ. ಶೀಘ್ರವೇ 50 ಕೋಟಿ ರೂಪಾಯಿಗಳನ್ನು ಮೀರುವ ನಿರೀಕ್ಷೆ ಇದೆ.
ಇದನ್ನೂ ಓದಿ: ತಮ್ಮದೇ ರಿವಾಲ್ವಾರ್ನಿಂದ ಮಿಸ್ ಫೈರ್: ನಟ ಗೋವಿಂದ ಆಸ್ಪತ್ರೆಗೆ ದಾಖಲು - Actor Govinda
ಕೊರಟಾಲ ಶಿವ ನಿರ್ದೇಶನದ ಈ ಚಿತ್ರ ತೆಲುಗು ಹೊರತುಪಡಿಸಿದರೆ ಹಿಂದಿ ಮಾರುಕಟ್ಟೆಯಲ್ಲಿ ಉತ್ತಮ ಪ್ರದರ್ಶನ ಮುಂದುವರಿಸಿದೆ. ಆಲಿಯಾ ಭಟ್ ನಟನೆಯ ಜಿಗ್ರಾ ಅಕ್ಟೋಬರ್ 11 ರಂದು ಚಿತ್ರಮಮದಿರ ಪ್ರವೇಶಿಸಲಿದ್ದು, ಅಲ್ಲಿವರೆಗೆ ದೇವರ ಉತ್ತಮ ಪ್ರದರ್ಶನ ಮುಂದುವರಿಸುವ ನಿರೀಕ್ಷೆಯಿದೆ. ಸದ್ಯಕ್ಕೆ ಹಿಂದಿ ವಲಯದಲ್ಲಿ ಯಾವುದೇ ದೊಡ್ಡ ಸಿನಿಮಾಗಳ ಬಿಡುಗಡೆಗಳಿಲ್ಲ. ಸೋಮವಾರದ ಅಂಕಿ - ಅಂಶದಲ್ಲಿ ಕುಸಿತ ಕಂಡಿದ್ದರೂ, ಚಿತ್ರ ಅಕ್ಟೋಬರ್ 2 ರಂದು ಅತಿ ಹೆಚ್ಚು ಕಲೆಕ್ಷನ್ ಮಾಡುವ ನಿರೀಕ್ಷೆಯಿದೆ. ಗಾಂಧಿ ಜಯಂತಿಯ ರಜಾದಿನ ಸಿನಿಮಾದ ಗಳಿಕೆಗೆ ಸಹಾಯವಾಗುವ ಸಾಧ್ಯತೆಗಳಿವೆ.
ಪ್ರಕಾಶ್ ರಾಜ್, ಮೇಕಾ ಶ್ರೀಕಾಂತ್, ಶೈನ್ ಟಾಮ್ ಚಾಕೊ, ನರೇನ್ ಮತ್ತು ಮುರಳಿ ಶರ್ಮಾ ಸೇರಿದಂತೆ ಹಲವರು ಚಿತ್ರದಲ್ಲಿ ನಟಿಸಿದ್ದಾರೆ. ಬಾಲಿವುಡ್ ಸೂಪರ್ ಸ್ಟಾರ್ಗಳಾದ ಸೈಫ್ ಅಲಿ ಖಾನ್ ಮತ್ತು ಜಾಹ್ನವಿ ಕಪೂರ್ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದು, ನಟಿಗಿದು ಚೊಚ್ಚಲ ತೆಲುಗು ಚಿತ್ರ. ಈ ಮೊದಲು ಒಂದೇ ಸಿನಿಮಾ ಮಾಡುವ ಯೋಜನೆ ಚಿತ್ರತಂಡ ಹೊಂದಿತ್ತು. ಚಿತ್ರೀಕರಣ ಮುಂದುವರಿದಂತೆ ಎರಡು ಭಾಗಗಳನ್ನು ಸಿನಿಮಾ ತರಲು ಮುಂದಾದರು. ಮೊದಲ ಭಾಗ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಿದ್ದು, ಸೀಕ್ವೆಲ್ ಮೇಲಿನ ನಿರೀಕ್ಷೆಗಳು ಹೆಚ್ಚಾಗಿವೆ.
