ನವದೆಹಲಿ: ಪ್ರೀಮಿಯಂ ಸೆಡಾನ್ ಸೂಪರ್ಬ್ನ ಹೊಸ ಮರು ಆವೃತ್ತಿಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿರುವುದಾಗಿ ಜೆಕ್ ವಾಹನ ತಯಾರಕ ಸ್ಕೋಡಾ ತಿಳಿಸಿದೆ. ಇದರ ಬೆಲೆ 31.99 ಲಕ್ಷ ರೂ.ಯಿಂದ (ಎಕ್ಸ್ ಶೋ ರೂಂ) ಆರಂಭವಾಗುತ್ತದೆ.
ಸೆಡಾನ್ ಸೂಪರ್ಬ್ ಎರಡು ರೂಪಾಂತರಗಳಲ್ಲಿ ಮಾರುಕಟ್ಟೆ ಬರುತ್ತಿದೆ. ಸ್ಕೋಡಾ ಸೂಪರ್ಬ್ ಸ್ಪೋರ್ಟ್‌ಲೈನ್ ಬೆಲೆ 31.99 ಲಕ್ಷ ರೂ. ಮತ್ತು ಲೌರಿನ್/ ಕ್ಲೆಮೆಂಟ್ ದರ 34.99 ಲಕ್ಷ ರೂ. (ಎಲ್ಲಾ ಬೆಲೆ ಸೇರಿ ಎಕ್ಸ್ ಶೋ ರೂಂ) ಎಂದು ಸ್ಕೋಡಾ ಆಟೋ ಇಂಡಿಯಾ ಪ್ರಕಟಣೆಯಲ್ಲಿ ತಿಳಿಸಿದೆ.
ಈ ಮಾದರಿಯು 2 ಲೀಟರ್ ಪೆಟ್ರೋಲ್ ಎಂಜಿನ್‌ ಹೊಂದಿದೆ. ಸ್ಕೋಡಾ ಸೂಪರ್ಬ್ ಭಾರತದ ಅನೇಕ ಐಷಾರಾಮಿ ಗ್ರಾಹಕರ ಅಭಿರುಚಿಯನ್ನು ಗಮನದಲ್ಲಿ ಇರಿಸಿಕೊಂಡು ತಯಾರಿಸಲಾಗಿದೆ ಎಂದು ಸ್ಕೋಡಾ ಆಟೋ ಇಂಡಿಯಾ ಬ್ರಾಂಡ್ ನಿರ್ದೇಶಕ ಝಾಕ್ ಹೋಲಿಸ್ ತಿಳಿಸಿದರು.
ಇದನ್ನೂ ಓದಿ: ಸಾವಿರ ಕೋಟಿ ಮೌಲ್ಯದ ಬೈ ಬ್ಯಾಕ್ ಯೋಜನೆ ಘೋಷಿಸಿದ ಗೇಲ್: ಪ್ರತಿ ಷೇರಿನ ಬೆಲೆಯೆಷ್ಟು ಗೊತ್ತೇ?
ರಿಫ್ರೆಶ್ ಸ್ಕೋಡಾ ಸೂಪರ್ಬ್ ಕೆಲವು ಸಮಕಾಲೀನ ನವೀಕರಣಗಳನ್ನು ಪರಿಚಯ ಮಾಡುತ್ತದೆ. ಅದು ಅದರ ಆಕರ್ಷಣೆಯನ್ನು ಇನ್ನಷ್ಟು ಹೆಚ್ಚಿಸುತ್ತದೆ ಮತ್ತು ಎಲ್ಲರಿಂದ ಮೆಚ್ಚುಗೆ ಪಡೆಯುತ್ತದೆ ಎಂಬ ವಿಶ್ವಾಸ ವ್ಯಕ್ತಪಡಿಸಿದರು.
ನವೀಕರಿಸಿದ ಆವೃತ್ತಿಯು ಅಡಾಪ್ಟಿವ್ ಫ್ರಂಟ್-ಲೈಟಿಂಗ್ ಸಿಸ್ಟಮ್ ಹೊಂದಿದೆ. 20.32 ಸೆಂ.ಮೀ ಫ್ಲೋಟಿಂಗ್ ಕೆಪ್ಯಾಸಿಟಿವ್ ಟಚ್ ಡಿಸ್ಪ್ಲೇ, ಪ್ರಾಕ್ಸಿಮಿಟಿ ಸೆನ್ಸರ್, ಗಾಜಿನ ವಿನ್ಯಾಸ ಮತ್ತು ನವೀಕರಿಸಿದ ಬಳಕೆದಾರ ಇಂಟರ್ಫೇಸ್ ಒಳಗೊಂಡಿದೆ. ಇದು ಹೊಸ ತಲೆಮಾರಿನ ಅಮುಂಡ್‌ಸೆನ್ ಇನ್ಫೋಟೈನ್‌ಮೆಂಟ್ ಸಿಸ್ಟಮ್‌ನ ಭಾಗವಾಗಿ ಅಭಿವೃದ್ಧಿಪಡಿಸಲಾಗಿದೆ ಎಂದರು.
