ನವದೆಹಲಿ: ಹಣಕಾಸಿನ ಬಿಕ್ಕಟ್ಟಿನಿಂದ ಮುಳುಗುವ ಹಡಗಿನಂತಾದ ಯೆಸ್ ಬ್ಯಾಂಕ್ ಪುನಶ್ಚೇತನಕ್ಕೆ ಆರ್ಬಿಐ ರೂಪಿಸಿದ ಕರಡು ನೀತಿ ಯೋಜನೆಗೆ ಈಗ ಮತ್ತೊಂದು ಖಾಸಗಿ ಬ್ಯಾಂಕ್ ಕೈಜೋಡಿಸಿದೆ.
ಯೆಸ್ ಬ್ಯಾಂಕ್ ಮೇಲೆ ₹ 1,000 ಕೋಟಿ ಬಂಡವಾಳ ಹೂಡಿಕೆ ಮಾಡಲು ಐಸಿಐಸಿಐ ಬ್ಯಾಂಕಿನ ಆಡಳಿತ ಮಂಡಳಿ ಮುಂದಾಗಿದೆ.
ಯೆಸ್ ಬ್ಯಾಂಕ್ ಲಿಮಿಟೆಡ್ನಲ್ಲಿ ಶೇ. 5ರಷ್ಟು ಷೇರು ಖರೀದಿಸಿ ಹೂಡಿಕೆ ಮಾಡಲು ಐಸಿಐಸಿಐ ಬ್ಯಾಂಕ್ ಲಿಮಿಟೆಡ್ ಮುಂದಾಗಿದೆ ಎಂದು ಕಂಪನಿಯು ರೆಗ್ಯೂಲೆಟರಿ ಫೈಲಿಂಗ್ನಲ್ಲಿ ತಿಳಿಸಿದೆ.
ನಿನ್ನೆಯಷ್ಟೇ ಯೆಸ್ ಬ್ಯಾಂಕ್ನ ತಲಾ ಪ್ರತಿ ಷೇರಿಗೆ ₹ 10 ಯಂತೆ ಒಟ್ಟು 725 ಕೋಟಿ ಮೌಲ್ಯದ ಷೇರುಗನ್ನು ಖರೀದಿಸಲು ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾದ ಕೇಂದ್ರ ಮಂಡಳಿಯ ಕಾರ್ಯಕಾರಿ ಸಮಿತಿಯು ಅನುಮತಿ ನೀಡಿತ್ತು.
ಹಣಕಾಸಿನ ಸಂಕಷ್ಟಕ್ಕೆ ಸಿಲುಕಿದ ಯೆಸ್ ಬ್ಯಾಂಕ್ ಪುನಶ್ಚೇತನಕ್ಕೆ ಹಾಗೂ ಹೂಡಿಕೆದಾರರ ಮತ್ತು ಗ್ರಾಹಕರ ಠೇವಣಿ ಭದ್ರತೆಗೆ ಆರ್ಬಿಐ, ನೂತನ ನೀತಿಯ ಕರಡು ಯೋಜನೆಯನ್ನು ವಹಿವಾಟಿನ ನಿರ್ಬಂಧ ಹೊರಡಿಸಿದ ದಿನವೇ ಜಾರಿಗೆ ತಂದಿತ್ತು.
