ನವದೆಹಲಿ: ಸರಕು ಸಾಗಾಣೆ ಜಿಎಸ್ಟಿ ರಿಟರ್ನ್ಸ್ ಸಲ್ಲಿಕೆಯ ಇ-ವೇ ಬಿಲ್ ಪಾವತಿದಾರರು ಎರಡು ತಿಂಗಳು ತೆರಿಗೆ ಸಲ್ಲಿಸದಿದರೇ ಇ-ವೇ ಬಿಲ್ ವ್ಯವಸ್ಥೆ ಕಡಿತಗೊಳಿಸಲಾಗುವುದು ಎಂದು ಹಣಕಾಸು ಸಚಿವಾಲಯ ಎಚ್ಚರಿಕೆಯ ಕರೆಗಂಟೆ ಬಾರಿಸಿದೆ.
ಸಕಾಲದಲ್ಲಿ ಇ- ವೇ ಬಿಲ್ ಸಲ್ಲಿಕೆ ಆಗದಿದ್ದಲ್ಲಿ ಸರಕು ರವಾನೆದಾರ, ಸರಕು ಸ್ವೀಕಾರದಾರ, ಸಾಗಾಣೆದಾರ, ಇ- ಕಾಮರ್ಸ್ ನಿರ್ವಾಹಕ, ಕೊರಿಯರ್ ಏಜೆನ್ಸಿ ಸೇರಿದಂತೆ ಇದರ ವ್ಯಾಪ್ತಿಯಲ್ಲಿ ಬರುವ ಉದ್ದಿಮೆಗಳ ವಿದ್ಯುನ್ಮಾನ ಹಾಗೂ ಇ-ವೇ ಬಿಲ್ ಸೇವಾ ವ್ಯವಸ್ಥೆ ನಿಷೇಧವಾಗಲಿದೆ ಎಂದು ನೇರ ತೆರಿಗೆ ಮತ್ತು ಕಸ್ಟಮ್ಸ್‌ನ ಕೇಂದ್ರೀಯ ಮಂಡಳಿ ತಿಳಿಸಿದೆ.
ನಿಯಮಗಳ ಅನುಸಾರ, ತೆರಿಗೆದಾರರು ಸತತ ಎರಡು ತಿಂಗಳು ಅಥವಾ ಆರು ತಿಂಗಳಲ್ಲಿ ಎರಡು ಬಾರಿ ಇ ವೇ ಬಿಲ್ ಪಾವತಿಗೆ ವಿಳಂಬ ಮಾಡಿದರೆ, ಈ ವ್ಯವಸ್ಥೆಯಿಂದ ನಿಷೇಧಕ್ಕೆ ಒಳಗಾಗಬೇಕಾಗುತ್ತದೆ. ವ್ಯಾಪಾರಿಗಳು ಹಿಂದಿನ ಮಾಸಿಕದ ತೆರಿಗೆಯನ್ನು ಮುಂದಿನ ತಿಂಗಳ 20ರೊಳಗೆ ಪಾವತಿಸಬೇಕು. ತ್ರೈಮಾಸಿಕದ ಆದಾಯ ತೆರಿಗೆಯನ್ನು ಸೂಚಿತ ತಿಂಗಳ 18ರ ಒಳಗೆ ಸಲ್ಲಿಸುವಂತೆ ಎಚ್ಚರಿಕೆ ನೀಡಿದೆ.
ಇ-ವೇ ಬಿಲ್ ವಂಚನೆಯ ಪ್ರಕರಣಗಳು ಇತ್ತೀಚಿನ ದಿನಗಳಲ್ಲಿ ಅಧಿಕವಾಗುತ್ತಿವೆ. ಏಪ್ರಿಲ್- ಡಿಸೆಂಬರ್ ಅವಧಿಯಲ್ಲಿ 3,626 ಪ್ರಕರಣಗಳು ದಾಖಲಾಗಿದ್ದು, ₹ 15,278 ಕೋಟಿಯಷ್ಟು ವಂಚಿಸಿದ್ದಾರೆ. ಒಂದೇ ಇ-ವೇ ಬಿಲ್ ಇಟ್ಟುಕೊಂಡು ಕೆಲವು ಸಾಗಣೆದಾರರು ಎರಡು ಮೂರು ಸಲ ನಾನಾ ಸರಕುಗಳನ್ನು ಸಾಗಣೆ ಮಾಡಿದ್ದಾರೆ ಎಂಬ ಆರೋಪಗಳು ಕೂಡಾ ಕೇಳಿಬಂದಿವೆ. ಈ ಹಿನ್ನೆಲೆಯಲ್ಲಿ ಸಿಬಿಐಸಿ ಕಠಿಣ ಕ್ರಮಕ್ಕೆ ಮುಂದಾಗಿದೆ.
