ಅನಂತಪುರ(ಆಂಧ್ರಪ್ರದೇಶ): ವಾಹನ ತಯಾರಕ ಸಂಸ್ಥೆಯಾದ ಕಿಯಾ ಇಂಡಿಯಾ, ಸುಮಾರು 5 ಲಕ್ಷ ವಾಹನಗಳನ್ನು ಆಂಧ್ರಪ್ರದೇಶದ ಅನಂತಪುರದಲ್ಲಿರುವ ಪ್ಲಾಂಟ್ನಿಂದ ರಫ್ತು ಮಾಡಿದೆ ಎಂದು ಮಂಗಳವಾರ ಮಾಹಿತಿ ನೀಡಿದೆ. ಈ ರಫ್ತು ದೇಶಿಯವಾಗಿ ಜನರಿಗೆ ಪೂರೈಕೆ ಮಾಡಿರುವುದು ಮಾತ್ರವಲ್ಲದೇ, ವಿದೇಶಿಗಳಿಗೆ ರಫ್ತು ಮಾಡುವ ಮಾರುಕಟ್ಟೆಗೆ ಪೂರೈಸುವುದನ್ನು ಒಳಗೊಂಡಿದೆ ಎಂದು ಕಿಯಾ ಸ್ಪಷ್ಟನೆ ನೀಡಿದೆ.
ಇದರೊಂದಿಗೆ ದೇಶದಲ್ಲಿ ನಾಲ್ಕು ಲಕ್ಷ ಯುನಿಟ್ಗಳನ್ನು ಕಿಯಾ ಮಾರಾಟ ಮಾಡಿದೆ. 2019ರ ಸೆಪ್ಟೆಂಬರ್ನಲ್ಲಿ ಸೆಲ್ಟೋಸ್ ಕಾರನ್ನು ಮಾರಾಟ ಮಾಡಲು ಆರಂಭ ಮಾಡಿದ ನಂತರ 91ಕ್ಕೂ ಹೆಚ್ಚು ದೇಶಗಳಿಗೆ ಒಂದು ಲಕ್ಷಕ್ಕೂ ಹೆಚ್ಚು ಕಾರುಗಳನ್ನು ರಫ್ತು ಮಾಡಲಾಗಿದೆ ಎಂದು ಕಂಪನಿ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ. ಈ ಮೂಲಕ ಒಟ್ಟು 5 ಲಕ್ಷ ಯುನಿಟ್ಗಳನ್ನು ಮಾರಲಾಗಿದೆ.
ಕಿಯಾ ಇಂಡಿಯಾವು 2021ರ ವಾಹನ ರಫ್ತು ವಹಿವಾಟಿನಲ್ಲಿ ಶೇಕಡಾ 25ಕ್ಕಿಂತ ಹೆಚ್ಚಿನ ಮಾರುಕಟ್ಟೆ ಪಾಲನ್ನು ಹೊಂದಿದ್ದು, ಈ ಮೂಲಕ ದೇಶದಲ್ಲಿ ವಾಹನಗಳ ರಫ್ತುಗಳಲ್ಲಿ ಪ್ರಮುಖ ಕಂಪನಿಯಾಗಿ ಮಾರ್ಪಟ್ಟಿದೆ.
5 ಲಕ್ಷ ಯುನಿಟ್ಗಳ ಮಾರಾಟ ಅತ್ಯಂತ ದೊಡ್ಡ ಸಂಖ್ಯೆಯಾಗಿದ್ದು, ಕಡಿಮೆ ಅವಧಿಯಲ್ಲಿ ಈ ಮೈಲಿಗಲ್ಲನ್ನು ತಲುಪಿರುವುದಕ್ಕೆ ನಾವು ಹೆಮ್ಮೆಪಡುತ್ತೇವೆ. ಭಾರತದಲ್ಲಿ ಪ್ರಾರಂಭದಿಂದಲೂ ನಮ್ಮ ಗ್ರಾಹಕರಿಗೆ ಉತ್ತಮ ಸೇವೆಯನ್ನು ಒದಗಿಸಲು ನಾವು ಗಮನಹರಿಸಿದ್ದೇವೆ. ಪ್ರಸ್ತುತ ಕಿಯಾ 4 ಲಕ್ಷ ಭಾರತೀಯ ಕುಟುಂಬಗಳ ಭಾಗವಾಗಿದೆ. ಗ್ರಾಹಕರು ನಮಗೆ ನೀಡಿದ ಪ್ರೀತಿಗಾಗಿ ನಾವು ಅತ್ಯಂತ ಕೃತಜ್ಞರಾಗಿರುತ್ತೇವೆ ಎಂದು ಕಿಯಾ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಮತ್ತು ಸಿಇಒ ಟೇ-ಜಿನ್ ಪಾರ್ಕ್ ಧನ್ಯವಾದ ಸಲ್ಲಿಸಿದ್ದಾರೆ.
ಇದನ್ನೂ ಓದಿ: ಮುಂದಿನ ದಿನಗಳಲ್ಲಿ ಪರಿಸರ ಸ್ನೇಹಿ ಇಂಧನ ಸೌರ ಮತ್ತು ಹೈಡ್ರೋಜನ್ ಶಕ್ತಿಯ ಪ್ರಮುಖ ಸಂಪನ್ಮೂಲವಾಗಲಿದೆ: ಅಂಬಾನಿ
ಇತ್ತೀಚೆಗಷ್ಟೇ ಅಂದರೆ ಫೆಬ್ರವರಿ 15ರಂದು ಕಿಯಾ ಕ್ಯಾರೆನ್ಸ್ ಕಾರನ್ನು ಬಿಡುಗಡೆ ಮಾಡಿದ್ದು, ಇದು ಕಿಯಾ ಇಂಡಿಯಾದ ನಾಲ್ಕನೇ ಉತ್ಪನ್ನವಾಗಿದೆ. ಈಗಾಗಲೇ ಭಾರತೀಯರಿಂದ ಕ್ಯಾರೆನ್ಸ್ಗೆ ಅದ್ಭುತ ಪ್ರತಿಕ್ರಿಯೆಯನ್ನು ಪಡೆದಿದ್ದೇವೆ ಎಂದು ಕಿಯಾ ಹೇಳಿಕೊಂಡಿದೆ.
