ನವದೆಹಲಿ: ಕೊರೊನಾ ಬಿಕ್ಕಟ್ಟಿನಿಂದಾಗಿ ಸಂಕಷ್ಟಕ್ಕೆ ಸಿಲುಕಿರುವ ಬಡ ಜನರನ್ನು ರಕ್ಷಿಸಲು ವಿಶ್ವ ಬ್ಯಾಂಕ್‌ನೊಂದಿಗೆ 400 ಮಿಲಿಯನ್ ಡಾಲರ್ ಮೊತ್ತದ ಒಪ್ಪಂದಕ್ಕೆ ಭಾರತ ಸಹಿ ಹಾಕಿದೆ.
ಕಳೆದ ಮೇ ತಿಂಗಳಲ್ಲಿ 750 ಮಿಲಿಯನ್ ಡಾಲರ್ ಯೋಜನೆಯನ್ನು ಭಾರತ ಆರಂಭಿಸಿತ್ತು. ಈ ಯೋಜನೆಯಡಿಯಲ್ಲಿ ಎರಡನೇ ಕಾರ್ಯಾಚರಣೆ ಇದಾಗಿದೆ. ರಿಯಾಯಿತಿ ದರದಲ್ಲಿ ಸಾಲ ನೀಡುವ ವಿಶ್ವ ಬ್ಯಾಂಕಿನ ಅಂತಾರಾಷ್ಟ್ರೀಯ ಅಭಿವೃದ್ಧಿ ಸಂಘ (ಐಡಿಎ) 400 ಮಿಲಿಯನ್ ಡಾಲರ್ ಅನ್ನು ಭಾರತಕ್ಕೆ ನೀಡುತ್ತಿದೆ.
ಇದನ್ನೂ ಓದಿ: ಮಕ್ಕಳ ಭವಿಷ್ಯದ ಮೇಲೆ ಗಂಭೀರ ಪ್ರಭಾವ ಬೀರಿದ ಕೊರೊನಾ
ಕೋವಿಡ್ನಿಂದ ಉಂಟಾದ ಸಮಸ್ಯೆಗಳಿಂದ ವಲಸಿಗರು, ಬಡವರನ್ನು ಹೊರತರಲು, ಅವರಿಗೆ ಸಾಮಾಜಿಕ ರಕ್ಷಣೆಯನ್ನು ಒದಗಿಸಲು ಎಲ್ಲ ರಾಜ್ಯ ಸರ್ಕಾರಗಳ ಸಾಮರ್ಥ್ಯವನ್ನು ಬಲಪಡಿಸುವುದು ಈ ಕಾರ್ಯಕ್ರಮದ ಗುರಿಯಾಗಿದೆ. ಕೊರೊನಾ ಸಾಂಕ್ರಾಮಿಕವು ಭವಿಷ್ಯದಲ್ಲಿ ಪ್ರಕೃತಿಯಿಂದಾಗುವ ವಿಪತ್ತುಗಳಿಗೆ ಸನ್ನದ್ಧತೆಯನ್ನು ಮತ್ತಷ್ಟು ಬಲಪಡಿಸುವ ಸರ್ಕಾರಗಳ ಅಗತ್ಯಗಳ ಮನವರಿಕೆ ಮಾಡಿದೆ ಎಂದು ಆರ್ಥಿಕ ವ್ಯವಹಾರಗಳ ಇಲಾಖೆಯ ಹೆಚ್ಚುವರಿ ಕಾರ್ಯದರ್ಶಿ ಡಾ. ಸಿ.ಎಸ್. ಮೊಹಾಪಾತ್ರ ಹೇಳಿದ್ದಾರೆ.
ಈ ಒಪ್ಪಂದಕ್ಕೆ ಭಾರತ ಸರ್ಕಾರದ ಪರವಾಗಿ ಡಾ.ಮೊಹಾಪಾತ್ರ ಮತ್ತು ವಿಶ್ವ ಬ್ಯಾಂಕ್ ಪರವಾಗಿ ಭಾರತದ ಕಾರ್ಯಕಾರಿ ನಿರ್ದೇಶಕ ಸುಮಿಲಾ ಗುಲ್ಯಾನಿ ಸಹಿ ಹಾಕಿದ್ದಾರೆ.
