ಮುಂಬೈ: 2023ರ ಹಣಕಾಸು ವರ್ಷದಲ್ಲಿ ರಾಜ್ಯಗಳ ಹಣಕಾಸು ಕೊರತೆ ಜಿಡಿಪಿಯ ಶೇಕಡಾ 3.6ರಷ್ಟು ಇರುತ್ತದೆ ಎಂದು ಇಂಡಿಯಾ ರೇಟಿಂಗ್ಸ್ ಮತ್ತು ರಿಸರ್ಚ್ (ಇಂಡ್-ರಾ) ಏಜೆನ್ಸಿ ಅಂದಾಜು ಮಾಡಿದೆ. 2022ರ ಹಣಕಾಸು ವರ್ಷದ ಪರಿಷ್ಕೃತ ಅಂಕಿ- ಅಂಶಗಳಿಗಿಂತ ಸ್ವಲ್ಪ ಹೆಚ್ಚಿಗೆ ಇರುತ್ತದೆ ಎಂದು ಹೇಳಿದ್ದು, ಈ ಮೊದಲು 2022ರ ಹಣಕಾಸು ವರ್ಷದಲ್ಲಿ ಹಣಕಾಸು ಕೊರತೆ ಶೇಕಡಾ 4.1ರಷ್ಟಿತ್ತು ಎಂದು ಇಂಡ್-ರಾ ಹೇಳಿತ್ತು.
ಆದಾಯ ಸ್ವೀಕೃತಿಗಳಲ್ಲಿ ನಿರೀಕ್ಷೆಗಿಂತ ಉತ್ತಮವಾದ ಬೆಳವಣಿಗೆಯಾಗಿದೆ. 2022 ಹಣಕಾಸು ವರ್ಷದಲ್ಲಿ ನಾಮಮಾತ್ರ ಜಿಡಿಪಿಯಲ್ಲಿ ಹೆಚ್ಚಿನ ಬೆಳವಣಿಗೆಯಾಗಿದ್ದು, ಇದೇ ಕಾರಣದಿಂದ ಜಿಡಿಪಿಯನ್ನು ಪರಿಷ್ಕರಣೆ ಮಾಡಲಾಗಿದೆ ಎಂದು ಸಂಸ್ಥೆ ಹೇಳಿದೆ.
ಇದಲ್ಲದೇ, 2022ರ ಹಣಕಾಸು ವರ್ಷದಲ್ಲಿ ಭಾರತದ ನಾಮಮಾತ್ರ ಜಿಡಿಪಿ ಶೇಕಡಾ 17.6ರಷ್ಟು ಬೆಳವಣಿಗೆಯಾಗಲಿದೆ ಎಂದು ಇಂಡ್-ರಾ ಅಂದಾಜಿಸಿದೆ. ಕೋವಿಡ್ ಪ್ರಭಾವದಿಂದಾಗಿ ಹದಗೆಟ್ಟಿದ್ದ ಹಣಕಾಸು ಪರಿಸ್ಥಿತಿ 2022-2023ರ ಹಣಕಾಸು ವರ್ಷದಲ್ಲಿ ಸುಧಾರಣೆಗೊಳ್ಳುವ ಸಾಧ್ಯತೆಯಿದೆ.
ಇದನ್ನೂ ಓದಿ: ಕೇವಲ 42 ಸೆಕೆಂಡ್ನಲ್ಲಿ 1 ಕೋಟಿ 75 ಲಕ್ಷ ಸಂಪಾದಿಸಿದ ಯೂಟ್ಯೂಬರ್
26 ರಾಜ್ಯಗಳ ಒಟ್ಟು ಆದಾಯ 2022ರ ಏಪ್ರಿಲ್-ನವೆಂಬರ್ ತಿಂಗಳ ಅವಧಿಯಲ್ಲಿ ಶೇಕಡಾ 25.1ರಷ್ಟು ಅಂದರೆ 16.4 ಟ್ರಿಲಿಯನ್‌ಗೆ ಏರಿಕೆಯಾಗಿದೆ. ಇದೇ ಅವಧಿಯಲ್ಲಿ 26 ರಾಜ್ಯಗಳ ಆದಾಯ ವೆಚ್ಚವು ಶೇಕಡಾ 12ರಷ್ಟು ಏರಿಕೆಯಾಗಿದೆ. ಆರ್ಥಿಕ ಚೇತರಿಕೆಯು ಆದಾಯ ಸಂಗ್ರಹಣೆಯಲ್ಲಿ ಸುಧಾರಣೆಗೆ ಕಾರಣವಾಗಿದೆ ಎಂದು ಇಂಡ್-ರಾ ಹೇಳಿದೆ.
ಕೇಂದ್ರ ಸರ್ಕಾರವು ತನ್ನ 2023ನೇ ಹಣಕಾಸು ಬಜೆಟ್‌ನಲ್ಲಿ 50 ವರ್ಷಗಳ ಬಡ್ಡಿ ರಹಿತ ಸಾಲವನ್ನು ರಾಜ್ಯಗಳಿಗೆ ನೀಡಲು ನಿರ್ಧಾರ ಮಾಡಿದೆ. ಇದಕ್ಕಾಗಿ ಒಂದು ಟ್ರಿಲಿಯನ್ ರೂಪಾಯಿ ಮೀಸಲಿಡಲಾಗಿದೆ. ಈ ಮೂಲಕ ಬಂಡವಾಳ ವೆಚ್ಚ ಹೆಚ್ಚಿಸಿಕೊಳ್ಳಲು ರಾಜ್ಯಗಳು ಅವಕಾಶ ಹೊಂದಿವೆ.
