ನವದೆಹಲಿ: ಬಜೆಟ್‌ನಲ್ಲಿ ಘೋಷಿಸಲಾದ ತೆರಿಗೆ ವಿನಾಯಿತಿ ಮೊತ್ತವು ಜಿಫ್ಟ್ ಸಿಟಿ (ಗುಜರಾತ್ ಇಂಟರ್ನ್ಯಾಷನಲ್ ಫೈನಾನ್ಸ್ ಟೆಕ್) ಅಂತಾರಾಷ್ಟ್ರೀಯ ಹಣಕಾಸು ಕ್ಷೇತ್ರದ ಆಕರ್ಷಣೆಯಾಗಲಿದೆ ಎಂದು ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಹೇಳಿದ್ದಾರೆ.
ಇಂಡಿಯಾ ಏರ್‌ಕ್ರಾಫ್ಟ್ ಲೀಸಿಂಗ್ ಶೃಂಗಸಭೆಯಲ್ಲಿ ಮಾತನಾಡಿದ ಅವರು, ವೆಚ್ಚ- ಪರಿಣಾಮಕಾರಿ ವೈಶಿಷ್ಟ್ಯದಿಂದಾಗಿ ಸರ್ಕಾರವು ಅಂತಾರಾಷ್ಟ್ರೀಯ ಹಣಕಾಸು ಸೇವೆಗಳ ಕೇಂದ್ರವನ್ನು (ಐಎಫ್‌ಎಸ್‌ಸಿ) ವೇಗವಾಗಿ ನಿರ್ಮಿಸಿದೆ. ಜಿಫ್ಟ್ ನಗರದಲ್ಲಿ ಅಂತಾರಾಷ್ಟ್ರೀಯ ಹಣಕಾಸು ಕ್ಷೇತ್ರವನ್ನು ಆಕರ್ಷಿಸುವಂತಹ ಘೋಷಣೆಗಳ ಪ್ಯಾಕೇಜ್ಅನ್ನು ಬಜೆಟ್ ಮೂಲಕ ನೀಡಲಾಗಿದೆ ಎಂದು ಹೇಳಿದರು.
ಸೀತಾರಾಮನ್ ತಮ್ಮ 2021-22ರ ಬಜೆಟ್ ಭಾಷಣದಲ್ಲಿ ಜಿಫ್ಟ್ ಸಿಟಿಯಲ್ಲಿ ಇರುವ ಅಂತಾರಾಷ್ಟ್ರೀಯ ಹಣಕಾಸು ಸೇವೆಗಳ ಕೇಂದ್ರವನ್ನು (ಐಎಫ್‌ಎಸ್‌ಸಿ) ಜಾಗತಿಕ ಹಣಕಾಸು ಕೇಂದ್ರವನ್ನಾಗಿ ಮಾಡಲು ಸರ್ಕಾರ ಬದ್ಧವಾಗಿದೆ ಎಂದು ಹೇಳಿದ್ದರು.
ಇದನ್ನೂ ಓದಿ: ಜನವರಿ ಅಂತ್ಯದ ವೇಳೆಗೆ ಹಣಕಾಸು ಕೊರತೆ 12.34 ಲಕ್ಷ ಕೋಟಿ ರೂ.ಗೆ ಏರಿಕೆ!
ಈಗಾಗಲೇ ಒದಗಿಸಿರುವ ತೆರಿಗೆ ಪ್ರೋತ್ಸಾಹದ ಜೊತೆಗೆ ವಿಮಾನ ಗುತ್ತಿಗೆ ಕಂಪನಿಗಳಿಗೆ ಬಂಡವಾಳ ಆದಾಯಕ್ಕೆ ತೆರಿಗೆ ರಜೆ, ವಿದೇಶಿ ಬಾಡಿಗೆದಾರರಿಗೆ ಪಾವತಿಸುವ ವಿಮಾನ ಗುತ್ತಿಗೆ ಬಾಡಿಗೆಗೆ ತೆರಿಗೆ ವಿನಾಯಿತಿ, ಐಎಫ್‌ಎಸ್‌ಸಿಯಲ್ಲಿ ವಿದೇಶಿ ಹಣ ವರ್ಗಾವಣೆಗೆ ತೆರಿಗೆ ಪ್ರೋತ್ಸಾಹ, ಐಎಫ್‌ಎಸ್‌ಸಿಯಲ್ಲಿ ಇರುವ ವಿದೇಶಿ ಬ್ಯಾಂಕ್ಗಳ ಹೂಡಿಕೆ ವಿಭಾಗಕ್ಕೆ ತೆರಿಗೆ ವಿನಾಯಿತಿ ನೀಡಲಾಗುವುದು ಎಂದರು.
ಗುಜರಾತ್ ಇಂಟರ್ನ್ಯಾಷನಲ್ ಫೈನಾನ್ಸ್ ಟೆಕ್-ಸಿಟಿ (ಜಿಫ್ಟ್ ಸಿಟಿ) ದೇಶದ ಏಕೈಕ ಅಂತಾರಾಷ್ಟ್ರೀಯ ಹಣಕಾಸು ಸೇವಾ ಕೇಂದ್ರವಾಗಿದೆ.
