ಸಿಯಾಟಲ್(ವಾಷಿಂಗ್ಟನ್): ಪ್ರಪಂಚದಾದ್ಯಂತ ಮಹಾಮಾರಿ ಕೊರೊನಾ ವೈರಸ್ ಹಾವಳಿ ಸಂದರ್ಭದಲ್ಲಿ ಬಹುತೇಕ ಎಲ್ಲ ಕಂಪನಿಗಳು ವರ್ಕ್ ಫ್ರಂ ಹೋಂ ಅವಕಾಶ ಕಲ್ಪಿಸಿದ್ದು, ಕೆಲವೊಂದು ಕಂಪನಿಗಳಲ್ಲಿ ಈಗಲೂ ಈ ನಿರ್ಧಾರ ಮುಂದುವರೆದಿದೆ. ವಿಶ್ವದ ಅತಿದೊಡ್ಡ ಇ-ಕಾಮರ್ಸ್ ಕಂಪನಿಗಳಲ್ಲಿ ಒಂದಾಗಿರುವ ಅಮೆಜಾನ್( Amazon) ಕೂಡ ಇದೇ ರೀತಿಯ ನಿರ್ಧಾರ ಕೈಗೊಂಡಿದೆ.
ಅಮೆಜಾನ್ ಕಾರ್ಪೋರೇಟ್ ಸಿಬ್ಬಂದಿ ತಾವು ಇರುವ ಸ್ಥಳಗಳಿಂದಲೇ ಕೆಲಸ ಮಾಡುವುದನ್ನ ಮುಂದುವರೆಸಲು ಅನುವು ಮಾಡಿಕೊಟ್ಟಿದೆ. ಟೆಕ್ ಮತ್ತು ಕಾರ್ಪೋರೇಟ್ ಸಿಬ್ಬಂದಿ ಸದ್ಯ ತಾವು ಇರುವ ಸ್ಥಳದಿಂದಲೇ ಕೆಲಸ ಮಾಡುವಂತೆ ಕಂಪನಿ ತಿಳಿಸಿದ್ದು, ಅಗತ್ಯವಿದ್ದಾಗ ಕಚೇರಿಗೆ ಬರುವಂತೆ ತಿಳಿಸಲಾಗುವುದು ಎಂದಿದೆ.
ಹಿಂದಿನ ನಿಯಮದಲ್ಲಿ ಬದಲಾವಣೆ
ಕೊರೊನಾ ಮಹಾಮಾರಿಯಿಂದ ಈಗಾಗಲೇ ಎಲ್ಲ ವಲಯ ಚೇತರಿಕೆ ಕಾಣುತ್ತಿದ್ದು, ಹೀಗಾಗಿ ಈ ಹಿಂದೆ ಉದ್ಯೋಗಿಗಳು ವಾರದಲ್ಲಿ ಕನಿಷ್ಠ ಮೂರು ದಿನಗಳ ಕಾಲ ಕಚೇರಿಯಲ್ಲಿ ಕೆಲಸ ಮಾಡಬೇಕು ಎಂಬ ನಿರ್ಧಾರ ಹೊರಡಿಸಲಾಗಿತ್ತು. ಆದರೆ, ಇದೀಗ ತಾವು ಇರುವ ಸ್ಥಳಗಳಿಂದಲೇ ಕೆಲಸ ಮಾಡಬಹುದು ಎಂದಿದೆ. ಇದಕ್ಕೆ ಅಮೆಜಾನ್ ಸಿಇಒ ಆಂಡಿ ಜಾನ್ಸಿ ಅನುಮೋದನೆ ನೀಡಿದ್ದಾರೆ ಎಂದು ಸಿಯಾಟಲ್ ಟಯಮ್ಸ್ ವರದಿ ಮಾಡಿದೆ.
ಇದನ್ನೂ ಓದಿರಿ: ಹೆಚ್ಚುತ್ತಿರುವ ಜನಪ್ರಿಯತೆ : ಐಪಿಒ ಮೂಲಕ ₹1,900 ಕೋಟಿ ಸಂಗ್ರಹಕ್ಕೆ ಮುಂದಾದ ಮೊಬಿಕ್ವಿಕ್‌
ಸುಮಾರು 50 ಸಾವಿರ ಟೆಕ್ ಮತ್ತು ಕಚೇರಿ ಉದ್ಯೋಗಿಗಳು ಪ್ರಧಾನ ಕಚೇರಿಯ ಕ್ಯಾಂಪಸ್ ಹಾಗೂ ಸುತ್ತಲಿನ ಪ್ರದೇಶದಲ್ಲಿ ಕೆಲಸ ಮಾಡ್ತಿದ್ದು, ಇದೀಗ ಮನೆಯಿಂದಲೇ ಕೆಲಸ ಮಾಡುವ ನಿರ್ಧಾರ ಕೈಗೊಂಡಿದೆ.
