ಚೀನಾ ಬಿಟ್ಟು ಭಾರತದತ್ತ ಬರ್ತಿವೆ ಅಮೆರಿಕದ 200 ಕಂಪನಿಗಳು!

ಪಲಾಯನ ಮಾಡುತ್ತಿರುವ ಬಹುತೇಕ ಕಂಪನಿಗಳ ಮುಖ್ಯಸ್ಥರು ಭಾರತದಲ್ಲಿ ಹೂಡಿಕೆ ಮಾಡುವುದರ ಮೂಲಕ ಚೀನಾಕ್ಕೆ ಪರ್ಯಾಯ ಮಾರ್ಗವನ್ನು ಹೇಗೆ ಸ್ಥಾಪಿಸಬೇಕು ಎಂಬುದರ ಬಗ್ಗೆ ಮಾತುಕತೆ ನಡೆಸುತ್ತಿವೆ ಎಂದು ಭಾರತ- ಅಮೆರಿಕ ಸ್ಟ್ರಾಟೆಜಿಕ್‌​ ಮತ್ತು ಪಾಲುದಾರಿಕೆ ವೇದಿಕೆಯ ಅಧ್ಯಕ್ಷ ಮುಖೇಶ್​ ಅಘಿ ಹೇಳಿದ್ದಾರೆ.

ವಾಷಿಂಗ್ಟನ್​: ಲೋಕಸಭೆ ಚುನಾವಣೆ ಫಲಿತಾಂಶದ ಬಳಿಕ ಚೀನಾದಲ್ಲಿರುವ ಅಮೆರಿಕ ಮೂಲದ ಸುಮಾರು 200 ಕಂಪನಿಗಳು ಭಾರತಕ್ಕೆ ಬರಲು ಸಿದ್ದವಾಗಿವೆ ಎಂದು ಅಮೆರಿಕದ ಉದ್ದಿಮೆ ತಜ್ಞರು ಹೇಳಿದ್ದಾರೆ.

ಭಾರತದಲ್ಲಿ ನೂತನ ಸರ್ಕಾರ ಅಸ್ಥಿತ್ವಕ್ಕೆ ಬರುತ್ತಿದ್ದಂತೆ ತ್ವರಿತಗತಿಯ ಸುಧಾರಣೆಗಳು ಹಾಗೂ ಪಾರದರ್ಶಕವಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುವಂತೆ ಯುಎಸ್​ಐಎಸ್​ಪಿಎಫ್ ಶಿಫಾರಸು ಮಾಡಲಿದೆ. ಅಮೆರಿಕ ಕಂಪನಿಗಳು ಇಲ್ಲಿನ ಇ- ವಾಣಿಜ್ಯ ಅಥವಾ ಡೇಟಾ ಸ್ಥಳೀಕರಣ ಪ್ರಕ್ರಿಯೆಯನ್ನು ಎಚ್ಚರಿಕೆಯಿಂದ ಗಮನಿಸುತ್ತಿವೆ. ಕಳೆದ 12-18 ತಿಂಗಳ ಹಿಂದಿನ ನಡೆಯನ್ನು ಅವಲೋಕಿಸಿ ವಾಣಿಜ್ಯ ವಲಯದಲ್ಲಿ ಹೆಚ್ಚು ಪಾರದರ್ಶಕತೆ ತರುವಂತೆ ಸರ್ಕಾರಕ್ಕೆ ಸಲಹೆ ನೀಡುತ್ತೇವೆ ಎಂದು ತಿಳಿಸಿದರು.

ನೂತನ ಸರ್ಕಾರದ ಕಾರ್ಯಸೂಚಿಗಳು ಹೂಡಿಕೆಯ ಸೆಳೆತಗಳನ್ನು ಒಳಗೊಂಡಿರಬೇಕು. ಸುಧಾರಣಾ ಕ್ರಮಗಳನ್ನು ಈ ಹಿಂದಿಗಿಂತ ವೇಗಗೊಳಿಸುವ ಅಗತ್ಯವಿದ್ದು, ಆ ಪ್ರಕ್ರಿಯೆಯಲ್ಲಿ ಹೆಚ್ಚು ಪಾರದರ್ಶಕವಾಗಿರಬೇಕು. ನಾವು ಆ ಕಂಪನಿಗಳನ್ನು ಹೇಗೆ ಆಕರ್ಷಿಸಬಹುದು ಎಂಬುದನ್ನು ಅರ್ಥಮಾಡಿಕೊಳ್ಳಬೇಕು ಎಂದು ಅಘಿ ಹೇಳಿದ್ದಾರೆ.