ವಿಜಯಪುರ: ಕಳೆದೊಂದು ತಿಂಗಳಿನಿಂದ ತೀವ್ರ ಜಿದ್ದಾಜಿದ್ದಿಯಿಂದ ಕೂಡಿದ್ದ ವಿಜಯಪುರ ಸ್ಥಳೀಯ ಸಂಸ್ಥೆಗಳ ಚುನಾವಣೆ ಶೇ. 71.20 ರಷ್ಟು ಮತದಾನವಾಗುವ ಮೂಲಕ ಚುನಾವಣೆಗೆ ತೆರೆ ಬಿದ್ದಿದೆ.
ಜಿಲ್ಲೆಯ ಇಂಡಿ, ಬಸವನಬಾಗೇವಾಡಿ ಮತ್ತು ತಾಳಿಕೋಟೆ ಪುರಸಭೆಗಳಿಗೆ ಬುಧವಾರ ಬೆಳಗ್ಗೆ 7 ರಿಂದ ಸಂಜೆ 5 ವರೆಗೆ ಮತದಾನ ಪ್ರಕ್ರಿಯೆ ನಡೆಯಿತು. ಒಟ್ಟು 69 ಸ್ಥಾನಗಳ ಪೈಕಿ 64 ವಾರ್ಡ್‌ಗಳಿಗೆ ಚುನಾವಣೆ ನಡೆದಿದೆ. ಐದು ಸ್ಥಾನಗಳಿಗೆ ಮೊದಲೇ ಅವಿರೋಧ ಆಯ್ಕೆ ನಡೆದಿತ್ತು. ಕಣದಲ್ಲಿದ್ದ ಒಟ್ಟು 225 ಅಭ್ಯರ್ಥಿಗಳ ಭವಿಷ್ಯ ಬರೆದ ಮತದಾರರು ಅದನ್ನು ವಿದ್ಯುನ್ಮಾನ ಮತಯಂತ್ರದಲ್ಲಿ ಭದ್ರವಾಗಿರಿಸಿದ್ದಾರೆ.
ಇಂಡಿ - 35, ತಾಳಿಕೋಟಿ -28 ಮತ್ತು ಬಸವನಬಾಗೇವಾಡಿ- 28 ಮತಗಟ್ಟೆಗಳಲ್ಲಿ ಬೆಳಗ್ಗೆಯಿಂದ ಸಂಜೆವರೆಗೆ ಸಾಂಗವಾಗಿ ಮತದಾನ ಪ್ರಕ್ರಿಯೆ ನೆರವೇರಿದೆ. ಬಸವನಬಾಗೇವಾಡಿ ಪುರಸಭೆಗೆ ಅತೀ ಹೆಚ್ಚು (ಶೇ.75.63) ಮತದಾನವಾಗಿದೆ. ನಂತರ ಇಂಡಿ (ಶೇ.70.11) ಮತ್ತು ತಾಳಿಕೋಟೆ (ಶೇ.67.67) ಕ್ರಮವಾಗಿ ಮತಪ್ರಮಾಣ ದಾಖಲಿಸಿವೆ.
ಬಸವನಬಾಗೇವಾಡಿ: ಒಟ್ಟು 22 ವಾರ್ಡ್‌ಗಳಿಗೆ ಮತದಾನ ನಡೆದಿದ್ದು ಒಟ್ಟು 25,263 ಮತದಾರರ ಪೈಕಿ 19,106 (ಪುರುಷ-9764, ಮಹಿಳೆಯರು-9342) ಮತದಾರರು ಹಕ್ಕು ಚಲಾಯಿಸಿದ್ದಾರೆ. ಬೆಳಗ್ಗೆ ಮತದಾನ ಪ್ರಕ್ರಿಯೆ ನಿಧಾನಗತಿಯಲ್ಲಿ ಇತ್ತು. ಬೆಳಗ್ಗೆ 7 ರಿಂದ ಸಂಜೆ 5 ರ ವೇಳೆಗೆ ಒಟ್ಟು 75.63 ಮತ ಪ್ರಮಾಣ ದಾಖಲಾಯಿತು.
ಇಂಡಿ ಪುರಸಭೆ: ಪಟ್ಟಣದ 23 ವಾರ್ಡ್‌ಗಳಿಗೆ ನಡೆದ ಮತದಾನ ಪ್ರಕ್ರಿಯೆಯಲ್ಲಿ ಒಟ್ಟು 32,385 ಮತದಾರರ ಪೈಕಿ 22706 (ಪುರುಷ-11938, ಮಹಿಳೆ-10767, ಇತರೆ-1) ಹಕ್ಕು ಚಲಾಯಿಸಿದ್ದಾರೆ. ಬೆಳಗ್ಗೆಯಿಂದಲೇ ಮತದಾನ ಪ್ರಮಾಣ ಚುರುಕಾಗಿತ್ತು. ಒಟ್ಟು 70.11 ರಷ್ಟು ವೋಟಿಂಗ್ ಆಗಿದೆ.
ತಾಳಿಕೋಟೆ: ಇಲ್ಲಿನ 23 ವಾರ್ಡ್‌ಗಳ ಪೈಕಿ 4 ವಾರ್ಡ್‌ಗಳಿಗೆ ಮೊದಲೇ ಅವಿರೋಧ ಆಯ್ಕೆ ಆಗಿದೆ. ಇನ್ನುಳಿದ 19 ವಾರ್ಡ್‌ಗಳಿಗೆ ಬುಧವಾರ ಶಾಂತಿಯುತ ಮತದಾನ ನಡೆದಿದೆ. ಒಟ್ಟು 21,669 ಮತದಾರರ ಪೈಕಿ 14663 (ಪುರುಷ-7435, ಮಹಿಳೆ-7228) ಮತದಾರರು ಹಕ್ಕು ಚಲಾಯಿಸಿದ್ದಾರೆ. ಇಲ್ಲಿ ಬೆಳಗ್ಗೆಯಿಂದಲೇ ಮತದಾನ ಪ್ರಕ್ರಿಯೆ ಚುರುಕಾಗಿತ್ತು. ಒಟ್ಟು 67.67 ರಷ್ಟು ಮತದಾನವಾಗಿದೆ. ಒಟ್ಟಾರೆ ಜಿಲ್ಲೆಯ ಮೂರು ಪುರಸಭೆಗೆ ಶೇ. 71.20 ರಷ್ಟು ಮತದಾನವಾಗಿದೆ.
