ಕರ್ಕರೆ, ಬಾಬ್ರಿ ಮಸೀದಿ ಬಗ್ಗೆ ವಿವಾದಿತ ಹೇಳಿಕೆ : ಆಯೋಗದಿಂದ ಸಾಧ್ವಿ ಮೇಲೆ ಮೂರು ದಿನ ಬ್ಯಾನ್​!

ಚುನಾವಣಾ ಪ್ರಚಾರದ ವೇಳೆ ಹುತಾತ್ಮ ಹೇಮಂತ್​ ಕರ್ಕರೆ ಹಾಗೂ ಬಾಬ್ರಿ ಮಸೀದಿ ಕುರಿತು ಸಾಧ್ವಿ ವಿವಾದಿತ ಹೇಳಿಕೆ ನೀಡಿದ್ದರು. ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಅವರಿಗೆ ಚುನಾವಣಾ ಆಯೋಗ ನೋಟಿಸ್​ ಸಹ ಜಾರಿ ಮಾಡಿತ್ತು.

ಭೋಪಾಲ್​ : ಇಲ್ಲಿನ ಲೋಕಸಭಾ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಸಾಧ್ವಿ ಪ್ರಜ್ಞಾ ಸಿಂಗ್​ ಮೇಲೆ ಚುನಾವಣಾ ಆಯೋಗ ಮೂರು ದಿನಗಳ ನಿಷೇಧ ಹೇರಿ ಆದೇಶ ಹೊರಡಿಸಿದೆ. ಹೀಗಾಗಿ ಮುಂದಿನ 72 ಗಂಟೆಗಳ ಕಾಲ ಯಾವುದೇ ಚುನಾವಣಾ ರ್ಯಾಲಿಯಲ್ಲಿ ಅವರು ಭಾಗಿಯಾಗುವಂತಿಲ್ಲ.

ಮಹಾರಾಷ್ಟ್ರ ಉಗ್ರ ನಿಗ್ರಹ ದಳದ ಮುಖ್ಯಸ್ಥರಾಗಿದ್ದ ಹೇಮಂತ್‌ ಕರ್ಕರೆ 26/11 ಮುಂಬೈ ದಾಳಿ ವೇಳೆ ಜೀವ ಕಳೆದುಕೊಂಡಿದ್ದು ತಮ್ಮ ಶಾಪದಿಂದ ಎಂದು ಹೇಳಿದ್ದ ಸಾಧ್ವಿ, ಬಾಬ್ರಿ ಮಸೀದಿ ಕೆಡವಿದ್ದಕ್ಕೆ ಬೇಸರವೇಕೆ ಮಾಡಿಕೊಳ್ಳಬೇಕು? ನನಗೆ ಆ ಬಗ್ಗೆ ಹೆಮ್ಮೆ ಇದೆ. ಬೇಡದ ವಸ್ತುಗಳನ್ನ ಕೆಡಿವಿ ಅದೇ ಜಾಗದಲ್ಲಿ ರಾಮಮಂದಿರ ನಿರ್ಮಾಣ ಮಾಡುತ್ತೇವೆ ಎಂದು ಹೇಳಿದ್ದರು.

ತಮ್ಮ ಹೇಳಿಕೆ ವಿವಾದ ರೂಪ ಪಡೆದುಕೊಳ್ಳುತ್ತಿದ್ದಂತೆ ಸಾಧ್ವಿ ಕ್ಷಮೆಯಾಚನೆ ಮಾಡಿದ್ದರು. ಆದರೆ, ಇದೇ ವಿಷಯಕ್ಕೆ ಸಂಬಂಧಿಸಿದಂತೆ ಅವರಿಗೆ ನೋಟಿಸ್​ ಕೂಡ ಜಾರಿಯಾಗಿದ್ದವು. ಇದೀಗ ಅವರ ಚುನಾವಣಾ ಪ್ರಚಾರದ ಮೇಲೆ ಬ್ಯಾನ್​ ಹಾಕಲಾಗಿದೆ. ಮಧ್ಯಪ್ರದೇಶ ಭೋಪಾಲ್​​ನಿಂದ ಸ್ಪರ್ಧೆ ಮಾಡಿರುವ ಪ್ರಜ್ಞಾ ಸಿಂಗ್​, ಕಾಂಗ್ರೆಸ್​ನ ದಿಗ್ವಿಜಯ್​ ಸಿಂಗ್​ ವಿರುದ್ಧ ಫೈಟ್ ನಡೆಸುತ್ತಿದ್ದಾರೆ.

ತಮ್ಮ ಮೇಲಿನ ಬ್ಯಾನ್​ಗೆ ಸಂಬಂಧಿಸಿದಂತೆ ಪ್ರತಿಕ್ರಿಯೆ ನೀಡಿರುವ ಪ್ರಜ್ಞಾ, ಯಾವುದೇ ತೊಂದರೆ ಇಲ್ಲ. ಈಗಾಗಲೇ ಇಂತಹ ಅನೇಕ ಬ್ಯಾನ್​ಗಳು ನನ್ನ ಮೇಲೆ ಆಗಿವೆ ಎಂದು ಹೇಳಿಕೊಂಡಿದ್ದಾರೆ.