ಬೆಂಗಳೂರು: ಕೇವಲ 12 ಅಂಕಗಳೊಂದಿಗೆ ಪ್ಲೇ ಆಫ್ ಪ್ರವೇಶಿಸಿರುವ ಹೈದರಾಬಾದ್ ಇತಿಹಾಸ ಸೃಷ್ಟಿಸಿದರೆ, ಇತ್ತ ಆರ್ಸಿಬಿಗೆ 7ನೇ ಪಂದ್ಯದಲ್ಲಿ ಅಂಪೈರ್ ಮಾಡಿದ ಎಡವಟ್ಟಿನಿಂದ ಕೈಗೆ ಬಂದ ತುತ್ತು ಬಾಯಿಗೆ ಇಲ್ಲವಾದಂತಾಗಿದೆ.
ಹೌದು, ಐಪಿಎಲ್ನ ಮುಂಬೈ ಹಾಗೂ ಬೆಂಗಳೂರು ನಡುವಿನ ಮೊದಲ ಪಂದ್ಯದಲ್ಲಿ ಆರ್ಸಿಬಿ 6 ರನ್ಗಳಿಂದ ಸೋಲನುಭವಿಸಿತ್ತು. ಆದರೆ, ಪಂದ್ಯದ ಕೊನೆಯ ಎಸೆತದಲ್ಲಿ ಆರ್ಸಿಬಿಗೆ 7 ರನ್ಗಳ ಅವಶ್ಯಕತೆಯಿತ್ತು. ಮಲಿಂಗಾ ಎಸೆದ ಕೊನೆಯ ಎಸೆತ ನೋಬಾಲ್ ಆಗಿದ್ದರೂ ಅಂಪೈರ್ ಅದನ್ನು ಗಮನಿಸಿದೇ ಇದ್ದುದ್ದರಿಂದ ಆರ್ಸಿಬಿ ಇರಬೇಕಾದ ಜಾಗದಲ್ಲಿ ಇಂದು ಸನ್ರೈಸರ್ಸ್ ಹೈದರಾಬಾದ್ ಆಡುವಂತಾಗಿದೆ.
12ನೇ ಆವೃತ್ತಿಯ 7 ನೇ ಪಂದ್ಯದಲ್ಲಿ 188 ರನ್ಗಳನ್ನು ಬೆನ್ನೆತ್ತಿದ ಆರ್ಸಿಬಿ ಗೆಲುವು ಸಾಧಿಸಲು ಕೊನೆಯ ಎಸೆತದಲ್ಲಿ 7 ರನ್ಗಳಿಸಬೇಕಿತ್ತು. ಆದರೆ ಸ್ಟೈಕ್ನಲ್ಲಿದ್ದ ಶಿವಂದುಬೆ ಚಂಡನ್ನು ಲಾಂಗ್ ಆನ್ಗೆ ಬಾರಿಸಿದರು . ಆ ಬಾಲ್ ಫೀಲ್ಡರ್ ಕೈಸೇರಿದ್ದರಿಂದ ಶಿವಂ ದುಬೆ ರನ್ ತೆಗೆದುಕೊಳ್ಳಲು ಮುಂದಾಗಲಿಲ್ಲ. ಮುಂಬೈ ವಿಜಯಿ ಎಂದು ಘೋಷಿಸಿದ ನಂತರ ರಿಪ್ಲೇಯಲ್ಲಿ ಮಲಿಂಗಾ ನೋಬಾಲ್ ಎಸೆದಿದ್ದು ಖಚಿತವಾಗಿತ್ತು. ಆದರೆ, ಅಂಪೈರ್ ಬೌಲರ್ ಅನ್ನು ಗಮನಿಸದಿದ್ದರಿಂದ ಅಂದಿನ ಪಂದ್ಯ ಮುಂಬೈ ಪಾಲಾಗಿತ್ತು.
ಇನ್ನು ಅಂದು ಅಂಪೈರ್ ನೋಬಾಲ್ ನೀಡಿದ್ದರೆ ಕೊನೆಯ ಎಸೆತದಲ್ಲಿ ಫ್ರೀ ಹಿಟ್ ಉಪಯೋಗಿಸಿಕೊಂಡು ಕ್ರೀಸ್ನಲ್ಲಿ ಎಬಿ ಡಿ ವಿಲಿಯರ್ಸ್ ಅಗತ್ಯವಿದ್ದ 5 ರನ್ಗಳಲ್ಲಿ ಒಂದು ಬೌಂಡರಿ ಅಥವಾ ಸಿಕ್ಸರ್ ಬಾರಿಸಿ ಪಂದ್ಯವನ್ನು ಆರ್ಸಿಬಿ ಪರ ಮಾಡುತ್ತಿದ್ದರು. ಅಂದು ಅಂಪೈರ್ ಮಾಡಿದ ಪ್ರಮಾದ ಅಷ್ಟು ಪರಿಣಾಮ ಬೀರದಿದ್ದರೂ ಇಂದು ಹೈದರಾಬಾದ್ ಕೇವಲ ಆರ್ಸಿಬಿಗಿಂತ 1 ಅಂಕ ಹೆಚ್ಚಿಗೆ ಪಡೆದು ಪ್ಲೇ ಆಫ್ ತಲುಪಿರುವುದು ನಿಜಕ್ಕೂ ಆರ್ಸಿಬಿ ಅಭಿಮಾನಿಗಳಿಗೆ ನುಂಗಲಾರದ ತುತ್ತಾಗಿದ್ದು ಅಂಪೈರ್ ವಿರುದ್ದ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ
