ಲಂಡನ್: ಐಸಿಸಿ ವಿಶ್ವಕಪ್ನಲ್ಲಿ ಆಸ್ಟ್ರೇಲಿಯಾದ ಡೇವಿಡ್ ವಾರ್ನರ್ ಅತ್ಯದ್ಭುತ ಪ್ರದರ್ಶನ ನೀಡುತ್ತಿದ್ದು, ಕೆಲವೊಂದು ಪಂದ್ಯಗಳಲ್ಲಿ ತಂಡದ ಗೆಲುವಿನಲ್ಲಿ ಮಹತ್ವದ ಪಾತ್ರ ನಿರ್ವಹಿಸುತ್ತಿದ್ದಾರೆ. ಅವರ ಈ ಪ್ರದರ್ಶನಕ್ಕೆ ಕಾರಣ ಯಾರು ಎಂಬುದನ್ನು ತಿಳಿಸಿದ್ದಾರೆ.
ದಕ್ಷಿಣ ಆಫ್ರಿಕಾ ವಿರುದ್ಧದ ಟೆಸ್ಟ್ ಪಂದ್ಯದ ವೇಳೆ ಬಾಲ್ ವಿರೂಪಗೊಳಿಸಿದ ಆರೋಪದ ಮೇಲೆ ಒಂದು ವರ್ಷ ನಿಷೇಧಕ್ಕೊಳಗಾಗಿದ್ದ ಡೇವಿಡ್ ವಾರ್ನರ್, ಭವಿಷ್ಯದಲ್ಲಿ ಕ್ರಿಕೆಟ್ ಆಡುವುದು ಅನುಮಾನವಾಗಿತ್ತು. ಆದರೆ ಇಂಡಿಯನ್ ಪ್ರೀಮಿಯರ್ ಲೀಗ್ನಲ್ಲಿ ಮಿಂಚಿದ್ದ ಇವರಿಗೆ ಕ್ರಿಕೆಟ್ ಆಸ್ಟ್ರೇಲಿಯಾ ವಿಶ್ವಕಪ್ನಲ್ಲಿ ಭಾಗಿಯಾಗಲು ಮಹತ್ವದ ಅವಕಾಶ ನೀಡಿತ್ತು. ಅದರ ಸದುಪಯೋಗ ಪಡೆದುಕೊಂಡು ವಾರ್ನರ್ ಉತ್ತಮ ಪ್ರದರ್ಶನ ನೀಡಿ, ಪಾಕ್ ವಿರುದ್ಧ ಶತಕ ಸಹ ಸಿಡಿಸಿದ್ದಾರೆ.
ನಿನ್ನೆ ಪಾಕ್ ವಿರುದ್ಧ ಗೆಲುವು ದಾಖಲು ಮಾಡಿದ ಬಳಿಕ ಮಾತನಾಡಿದ್ದ ವಾರ್ನರ್, ಇಷ್ಟೊಂದು ಬೇಗ ಕಮ್ಬ್ಯಾಕ್ ಮಾಡಲು ಕಾರಣವಾಗಿದ್ದು ತಮ್ಮ ಪತ್ನಿ ಎಂದು ಹೇಳಿದ್ದಾರೆ. ಪತ್ನಿಯೇ ನನ್ನ ಸ್ಪೂರ್ತಿ.ನಾನು ಕ್ರಿಕೆಟ್ ಆಡದೇ ಮನೆಯಲ್ಲಿದ್ದ ದಿನಗಳಲ್ಲಿ ಆಕೆ ನನ್ನನ್ನು ಪ್ರೇರೇಪಿಸಿರುವುದೇ ಇದಕ್ಕೆ ಕಾರಣ ಎಂದಿದ್ದಾರೆ. ನಾನು ನಿರಾಶೆಗೊಳಗಾದ ಸಮಯದಲ್ಲಿ ಸ್ಪೂರ್ತಿ ನೀಡಿರುವುದೇ ಇವತ್ತು ನಾನು ಉತ್ತಮವಾಗಿ ಆಡಲು ಕಾರಣವಾಗಿದೆ ಎಂದು ತಿಳಿಸಿದ್ದಾರೆ. ಈಗಾಗಲೇ ಆಸ್ಟ್ರೇಲಿಯಾ ನಾಲ್ಕು ಪಂದ್ಯಗಳನ್ನಾಡಿದ್ದು, ವಾರ್ನರ್ ಕ್ರಮವಾಗಿ 89 (ಅಜೇಯ), 3, 56 ಹಾಗೂ 107ರನ್ ಸಿಡಿಸಿದ್ದಾರೆ.
