ಲಂಡನ್: ಐಸಿಸಿ ವಿಶ್ವಕಪ್ ಮಹಾಸಮರದಲ್ಲಿ ಇಂಡೋ-ಪಾಕ್ ಹೈ ವೋಲ್ಟೇಜ್ ಕದನಕ್ಕೆ ಕ್ಷಣಗಣನೆ ಶುರುವಾಗಿದೆ. ಸಾಂಪ್ರದಾಯಿಕ ಎದುರಾಳಿಗಳ ಹೈ ವೋಲ್ಟೇಜ್ ಕದನ ಭಾರೀ ಕುತೂಹಲ ಮೂಡಿಸಿದೆ. ಈ ನಡುವೆ ಪಂದ್ಯ ಕಣ್ತುಂಬಿಕೊಳ್ಳಲು ಕ್ರೀಡಾಭಿಮಾನಿಗಳು ತುದಿಗಾಲಲ್ಲಿ ನಿಂತಿದ್ದಾರೆ.
ಜೂನ್ 16ರಂದು ಇಂಗ್ಲೆಂಡ್ನ ಮ್ಯಾಂಚೆಸ್ಟರ್ನಲ್ಲಿ ಪಂದ್ಯ ನಡೆಯಲಿದ್ದು, ಕೇವಲ ಎರಡು ದಿನಗಳು ಮಾತ್ರ ಬಾಕಿ ಉಳಿದಿರುವ ಕಾರಣ ಟಿಕೆಟ್ ಬೆಲೆ ಗಗನಕ್ಕೇರಿದ್ದು, ಒಂದು ಟಿಕೆಟ್ ಪಡೆದುಕೊಳ್ಳಲು ಬರೋಬ್ಬರಿ 60 ಸಾವಿರ ಹಣ ನೀಡಬೇಕಾಗಿದೆ. 2013ರ ನಂತರ ಇಂಡೋ-ಪಾಕ್ ಐಸಿಸಿ ಪ್ರಾಯೋಜಿತ ಟೂರ್ನಿಗಳಲ್ಲಿ ಮಾತ್ರ ಭಾಗಿಯಾಗುತ್ತಿವೆ. ಹೀಗಾಗಿ ಈ ಮ್ಯಾಚ್‌ ನೋಡಲು ಉಭಯ ದೇಶದ ಕ್ರೀಡಾಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದಾರೆ.
ಲಂಡನ್ನಲ್ಲಿ ಲಕ್ಷಾಂತರ ಸಂಖ್ಯೆಯಲ್ಲಿ ಭಾರತ ಹಾಗೂ ಪಾಕಿಸ್ತಾನ ಮೂಲದವರು ವಾಸವಾಗಿದ್ದಾರೆ. ಹೀಗಾಗಿ ಅವರಲ್ಲಿ ಬಹುತೇಕರು ಈ ಮೆಗಾ ಪಂದ್ಯ ವೀಕ್ಷಣೆಗೆ ಮುಂದಾಗಿದ್ದಾರೆ. ಈಗಾಗಲೇ ಪಂದ್ಯದ ಎಲ್ಲಾ ಟಿಕೆಟ್ ಸೇಲ್ ಆಗಿದ್ದು, ಹೆಚ್ಚಿನ ಸಂಖ್ಯೆಯಲ್ಲಿ ಟಿಕೆಟ್ ಪಡೆದುಕೊಂಡಿರುವ ಕೆಲವರು ಮರುಮಾರಾಟ ಮಾಡುತ್ತಿದ್ದು, ಅವುಗಳಿಗೆ ಭಾರೀ ಬೇಡಿಕೆ ಬಂದಿದೆ. ಲಂಡನ್ ವೆಬ್ಸೈಟ್ವೊಂದು ತಾನು ಖರೀದಿ ಮಾಡಿದ್ದ 480 ಟಿಕೆಟ್ ಮರು ಮಾರಾಟ ಮಾಡಿದ್ದು, ಎಲ್ಲಾ ಟಿಕೆಟ್ಗಳು ಬರೋಬ್ಬರಿ 60 ಸಾವಿರ ರೂ.ಗೆ ಬಿಕರಿಯಾಗಿವೆ ಎಂದು ತಿಳಿಸಿದೆ. ಟಿಕೆಟ್‌ಗಳಲ್ಲಿ ವಜ್ರ, ಗೋಲ್ಡ್ ,ಪ್ಲಾಟಿನಮ್ ಹಾಗೂ ಸಿಲ್ವರ್ ಎಂಬ ವಿಭಾಗಗಳಿದ್ದು, ಎಲ್ಲ ಟಿಕೆಟ್ಗಳ ಬೆಲೆ 17 ಸಾವಿರದಿಂದ 27 ಸಾವಿರ ರೂ ಆಗಿದೆ. ಆದರೆ, ಮಾರಾಟಗೊಂಡಿದ್ದು ಮಾತ್ರ ಹೆಚ್ಚಿನ ಹಣಕ್ಕೆ ಎಂಬುದು ಗಮನಾರ್ಹ ಸಂಗತಿ.
ಈ ಹಿಂದೆ ಇಂಗ್ಲೆಂಡ್ನಲ್ಲಿ ನಡೆದ ಚಾಂಪಿಯನ್ಸ್ ಟ್ರೋಫಿ ವೇಳೆ ಭಾರತ ಸೋಲು ಕಂಡಿರುವ ಕಾರಣ, ಅದರ ಸೇಡು ತೀರಿಸಿಕೊಳ್ಳಲು ಕೊಹ್ಲಿ ಪಡೆ ತಯಾರಾಗಿದೆ.
