ಕೋವಿಡ್ ಚಿಕಿತ್ಸೆಗೆ ಅತಿಯಾದ ಸ್ಟಿರಾಯ್ಡ್ ಬಳಕೆಯಿಂದ ಮೂಳೆ ನಾಶ

ಮೂಳೆ ನಾಶ ಅಥವಾ ಎವಿಎನ್ ಎಂದರೆ ಮೂಳೆಗೆ ರಕ್ತ ಪೂರೈಕೆಯ ತಾತ್ಕಾಲಿಕ ಅಥವಾ ಶಾಶ್ವತ ನಷ್ಟ. ಇದಕ್ಕೆ ಚಿಕಿತ್ಸೆಯಾಗಿ ರಕ್ತ ಪೂರೈಕೆಯನ್ನು ಸುಧಾರಿಸಬೇಕು ಮತ್ತು ಮೂಳೆ ಕೋಶಗಳ ನಾಶವನ್ನು ತಡೆಯಬೇಕು.

ಕೋವಿಡ್-19 ಚಿಕಿತ್ಸೆಗಾಗಿ ಸ್ಟಿರಾಯ್ಡ್​ಗಳ ಅತಿಯಾದ ಬಳಕೆಯು ಸೋಂಕಿನಿಂದ ಚೇತರಿಕೆಯ ಬಳಿಕ ಕಪ್ಪು ಶಿಲೀಂಧ್ರ ಅಥವಾ ಮ್ಯೂಕಾರ್ಮೈಕೋಸಿಸ್​ನಿಂದ ಮೂಳೆ ಅಂಗಾಂಶಗಳ ನಾಶದವರೆಗಿನ ಅನೇಕ ಸಮಸ್ಯೆಗಳಿಗೆ ಕಾರಣವಾಗಿದೆ ಎಂದು ವೈದ್ಯರು ಹೇಳುತ್ತಾರೆ.

ಅನೇಕ ರೋಗಿಗಳು ಕೀಲುಗಳು, ಸೊಂಟ, ಭುಜ ಮತ್ತು ಮೊಣಕಾಲುಗಳಲ್ಲಿ ನೋವು ಹೊಂದುತ್ತಾರೆ. ಇದನ್ನು ವೈದ್ಯಕೀಯವಾಗಿ ಅವಾಸ್ಕುಲರ್ ನೆಕ್ರೋಸಿಸ್ ಎಂದು ಕರೆಯಲಾಗುತ್ತದೆ. ಕೋವಿಡ್-19ನಿಂದ ಚೇತರಿಸಿಕೊಂಡ ನಂತರ ಕೆಲ ತಿಂಗಳುಗಳು ಅಥವಾ ಒಂದು ವರ್ಷದವರೆಗೆ ಇದು ಇರಲಿದೆ.

ಈ ಸ್ಥಿತಿಯು ಹೊಸದಲ್ಲ ಮತ್ತು ಚಿಕಿತ್ಸೆ ನೀಡಬಹುದಾದರೂ, ಕೋವಿಡ್ ಹೊಂದಿದ್ದ ರೋಗಿಗಳಲ್ಲಿ ಅಡ್ಡಪರಿಣಾಮವಾಗಿ ಇವು ಹೆಚ್ಚುತ್ತಿವೆ.

"ಕೋವಿಡ್-19 ಚಿಕಿತ್ಸೆಯ ಸಮಯದಲ್ಲಿ ಸ್ಟಿರಾಯ್ಡ್​ಗಳ ಬಳಕೆಯು ಈ ಅಸ್ವಾಭಾವಿಕ ಮೂಳೆ ಹಾನಿಯ ಹಿಂದಿನ ಕಾರಣವೆಂದು ಶಂಕಿಸಲಾಗಿದೆ. ಸ್ಟಿರಾಯ್ಡ್​ಗಳ ಅತಿಯಾದ ಬಳಕೆಯು ಮೂಳೆ ಸವೆತಕ್ಕೆ ಕಾರಣವಾಗುತ್ತದೆ ಮತ್ತು ಅದು ತನ್ನದೇ ಆದ ರಕ್ತ ಪೂರೈಕೆಯನ್ನು ಕಡಿತಗೊಳಿಸುತ್ತದೆ" ಎಂದು ಜಲಂಧರ್‌ನ ಎನ್‌ಎಚ್‌ಎಸ್ ಆಸ್ಪತ್ರೆಯ ಆರ್ಥೋಪೆಡಿಕ್ ಮತ್ತು ರೊಬೊಟಿಕ್ ಶಸ್ತ್ರಚಿಕಿತ್ಸಕ ಡಾ.ಸುಭಾಂಗ್ ಅಗರ್‌ವಾಲ್ ಐಎಎನ್‌ಎಸ್‌ಗೆ ತಿಳಿಸಿದ್ದಾರೆ.

"ಹೆಚ್ಚಿನ ಪ್ರಮಾಣದ ಸ್ಟಿರಾಯ್ಡ್​ ಬಳಕೆಯ ನಂತರ ಅವಾಸ್ಕುಲರ್ ನೆಕ್ರೋಸಿಸ್ (ಎವಿಎನ್) ಕಂಡುಬರುತ್ತಿದೆ" ಎಂದು ಅವರು ಹೇಳಿದರು. ಮೂಳೆ ನಾಶ ಅಥವಾ ಎವಿಎನ್ ಎಂದರೆ ಮೂಳೆಗೆ ರಕ್ತ ಪೂರೈಕೆಯ ತಾತ್ಕಾಲಿಕ ಅಥವಾ ಶಾಶ್ವತ ನಷ್ಟ. ಇದಕ್ಕೆ ಚಿಕಿತ್ಸೆಯಾಗಿ ರಕ್ತ ಪೂರೈಕೆಯನ್ನು ಸುಧಾರಿಸಬೇಕು ಮತ್ತು ಮೂಳೆ ಕೋಶಗಳ ನಾಶವನ್ನು ತಡೆಯಬೇಕು.

ಈ ಸ್ಥಿತಿಗೆ ತಕ್ಷಣದ ವೈದ್ಯಕೀಯ ಚಿಕಿತ್ಸೆ ಅಗತ್ಯವಿದೆ. ನೋವು ಮುಂದುವರಿದರೆ, ರೋಗಿಗಳಿಗೆ ಎಂಆರ್​ಐಗೆ ಒಳಗಾಗುವಂತೆ ಸೂಚಿಸಲಾಗುತ್ತದೆ. ಇದು ಮೂಳೆ ನಾಶದ ಪ್ರಕರಣವೋ ಅಥವಾ ಇಲ್ಲವೋ ಎಂಬುದನ್ನು ಪತ್ತೆ ಮಾಡುತ್ತದೆ. ತಜ್ಞರು ಸುಧಾರಿತ ಹಂತದಲ್ಲಿ ಶಸ್ತ್ರಚಿಕಿತ್ಸೆಯನ್ನು ಸೂಚಿಸುತ್ತಾರೆ.

ಈ ಸ್ಥಿತಿಯು ಧೂಮಪಾನ, ಮದ್ಯ ಮತ್ತು ಇತರ ಪರಿಸ್ಥಿತಿಗಳಿಗೂ ಸಂಬಂಧಿಸಿದೆ. "ಸ್ಟಿರಾಯ್ಡ್ ಬಳಕೆಯ ಜೊತೆಗೆ ಧೂಮಪಾನ ಮತ್ತು ಮದ್ಯಪಾನದಂತಹ ಅಂಶಗಳು ಎವಿಎನ್‌ಗೆ ಕಾರಣವಾಗಬಹುದು. ನೀವು ಕೋವಿಡ್​ನಿಂದ ಬಳಲುತ್ತಿದ್ದರೆ ಮತ್ತು ದೀರ್ಘಕಾಲದವರೆಗೆ ಸ್ಟೀರಾಯ್ಡ್ ಬಳಸಿದ್ದರೆ, ಧೂಮಪಾನ ಮತ್ತು ಆಲ್ಕೊಹಾಲ್ ಸೇವಿಸುವುದನ್ನು ತಪ್ಪಿಸುವುದು ಮುಖ್ಯ" ಎಂದು ಉಜಲಾ ಸಿಗ್ನಸ್ ಗ್ರೂಪ್ ಆಫ್ ಹಾಸ್ಪಿಟಲ್ಸ್ ಸಂಸ್ಥಾಪಕ-ಡೈರೆಕ್ಟರ್ ಡಾ.ಸುಚಿನ್ ಬಜಾಜ್ ಹೇಳಿದ್ದಾರೆ.